اقمولا وبلىسىندا تىكۇشاقتى قوندىرۋ كەزىندە 3 ەكيپاج مۇشەسى زارداپ شەكتى، - دەپ حابارلايدى Qamshy.kz اقپارات اگەنتتىگى.

ايتا كەتەتىن بولساق، وقىس وقيعا بۇگىن 22 قىركۇيەكتە بولعان. اۋە كولىگى اپاتىندا ەكيپاجدىڭ بارلىق مۇشەلەرى امان قالعان.

وبلىستىق دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتى بويىنشا، توتەنشە جاعداي قىركۇيەكتىڭ 22-دە تۇندە ورىن العان. اقكول اۋدانى اۋماعىندا مي-2 تىك ۇشاعىن قوندىرۋ كەزىندە اۋە كولىگى جەرگە قاتتى قونىپ، بورتتان ءورت شىققان. وسىنىڭ سالدارىنان تىكۇشاق ىشىندە بولعان ەكيپاج مۇشەلەرى 1969 جىلى تۋعان بورت كومانديرى الەكساندر مانكوۆ، بورت مەحانيگى 1956 جىلعى گەنناديي بالۋيەۆ جانە تاعى ءبىر ەكيپاج مۇشەسى 1969 جىلعى دۋمان بايبۋسينوۆ زارداپ شەككەن.

تىكۇشاق  اقكولدەگى مالوالەكسادروۆكا اۋىلى ماڭىندا جەرگە جوعارى جىلدامدىقپەن قونىپ، بورتتان ءورت شىعىپ، تۇگەلدەي ورتەنىپ كەتكەن.

بورت كومانديرى الەكساندر مانكوۆ پەن ەكيپاج مۇشەسى بايبۋسينوۆ تىكۇشاقتان شىعىپ ۇلگەرگەن، ال بورت مەحانيگى بالۋيەۆتى كۇيىك شالىپ، اۋرۋحانادا جاتىر.