شەنەۋنىكتەردىڭ قازاق تىلىندە سويلەمەۋى ءماجىلىس دەپۋتاتى باقىتجان ءابدىرايىمنىڭ نامىسىنا ءتيدى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساي وتىرىپ.
"بۇگىنگى ءبىزدىڭ تالقىلاپ جاتقان سۇراق وتە ماڭىزدى جانە وزەكتى. ءبىراق بۇدان دا زور ءبىر ماسەلەگە ءبىز بۇگىن جاۋاپ تاپپادىق، قۇرمەتتى ارىپتەستەر. جانە ول مەنىڭ كوڭىلىمە، نامىسىما قاتتى ءتيدى. 12 قازاق تىلىندە، ياعني مەملەكەتتىك تىلدە بەرىلگەن سۇراقتىڭ 11-ىنە ورىس تىلىندە جاۋاپ بەردى. كىم جاۋاپ بەردى؟ اكىمنىڭ ورىنباسارى، الەۋمەتتىك قورعاۋ ءمينيسترىنىڭ ورىنباسارى، ولار كىممەن جۇمىس ىستەيدى؟ حالىقپەن جۇمىس ىستەيدى. ولار قازاق تىلىندە جاۋاپ بەرە الماسا، قالاي جۇمىس ىستەيدى؟"، — دەپ كەيىدى دەپۋتات.
حالىق قالاۋلىسى ەلباسىنىڭ رۋحاني جاڭعىرۋ جونىندەگى ءوز ماقالاسىندا "مەملەكەتتىك ءتىلدى قۇرمەتتەۋ — تاۋەلسىزدىكتى قۇرمەتتەۋ" دەپ ايتقانىن ەسكە سالدى.
"مىنە، بۇگىن جيىننىڭ باسىنان سوڭىنا دەيىن ءتوراعامىز ۆلاديمير كارپوۆيچ (ۆلاديمير بوجكو – ءماجىلىس ءتوراعاسىنىڭ ورىنباسارى) قازاق تىلىندە جۇرگىزىپ جاتىر. ماگەرراموۆ مىرزا بايانداماسىن تازا قازاق تىلىندە وقىدى، سنەجاننا يماشيەۆا دەگەن ءبىزدىڭ قارىنداسىمىز قازاق تىلىندە سويلەيدى. شيپوۆسكيح بولسا بىزدەن جاقسى قازاقشا سويلەيدى"، — دەدى ءابدىرايىم.
"ءبىزدىڭ رەگلامەنتتە قازاق تىلىندە، ياعني مەملەكەتتىك تىلدە سۇراق قويىلسا، سول تىلدە جاۋاپ بەرىلۋى كەرەك دەپ تىكەلەي كورسەتىلگەن. ءبىز بۇعان ءقازىر شەكتەۋ قويماساق، وسىلاي جالعاسا بەرەدى. سول سەبەپتەن، ءتوراعا مىرزا، مەنىڭ ءوتىنىشىم، بولاشاقتا بىزگە كەلەتىن لاۋازىمدى قىزمەتكەرلەر مەملەكەتتىك تىلدە سۇراق قويىلسا، سول تىلدە جاۋاپ بەرۋگە تىرىسسىن"، — دەگەن ءوتىنىشىن ءبىلدىردى دەپۋتات.
ايتا كەتسەك، وسى جيىندا دايىندالماي كەلىپ، قاعازدان باس كوتەرمەگەن شەنەۋنىكتەر دەپۋتات زاعيپا بالييەۆادان دا ءسوز ەستىگەن بولاتىن.
