الماتى قالاسىندا راحمان الشانوۆتىڭ قاتىسۋىمەن قوعامدىق كەڭەستىڭ وتىرىسى بولدى. قوعامدىق كەڭەستىڭ وتىرىسىندا لاتىن الىپبيىنە كوشۋ ماسەلەسى تالقىعا ءتۇستى، دەپ حابارلايدى Qamshy.kz اقپارات اگەنتتىگى.

وتىرىس بارىسىندا «تۇران» ۋنيۆەرسيتەتىنىڭ رەكتورى قازىرگى تاڭدا كوتەرىلىپ وتىرعان لاتىن الىپبيىنە كوشۋ ماسەلەسى وتكەن كۇننىڭ تاريحىنا بايلانىستى ەمەس ەكەندىگىن اتاپ ءوتتى.

«الماتى – مادەنيەت پەن ءتىلدى دامىتۋدىڭ ورتالىعى. ءدال وسى قالا عىلىم مەن شىعارماشىلىقتىڭ وشاعى بولىپ تابىلادى. سول سەبەپتى دە، بۇل قالا لاتىن الىپبيىنە كوشۋ ماسەلەسىندە قارقىندى جۇمىس اتقارۋى ءتيىس، بۇعان كوپ نارسە بايلانىستى. قازىرگى تاڭدا عالامتوردىڭ 90 پايىزى اعىلشىن تىلىندە. لاتىن الىپبيىنە كوشۋ – ەلىمىزدىڭ بولاشاعى ءۇشىن وتە ءتيىمدى»، - دەدى راحمان الشانوۆ.

كەڭەس مۇشەلەرى، ساراپشىلار اتالعان تاقىرىپتا ءوز پىكىرلەرىن ءبىلدىردى.

لاتىن الىپبيىنە كوشۋگە بايلانىستى وتكەن قوعامدىق كەڭەستىڭ وتىرىسىندا ساياساتكەر مارات شيبۋتوۆ اتالمىش رەفورمانىڭ ءتيىمدى جاقتارى مەن بەلگىلى فاكتورلارى جايىندا ايتىپ ءوتتى. ونىڭ ايتۋىنشا، بۇل شەشىم يننوۆاسياعا اينالمايدى، الايدا ءىس جۇزىندە بەلگىلەنگەن تىلدىك پراكتيكانى كورسەتەدى.

«لاتىن الفاۆيتىنە كوشۋ ماسەلەسى 1991 جىلى تاۋەلسىزدىگىمىزدى العاننان كەيىن كوتەرىلگەن بولاتىن. وسى ۋاقىتقا دەيىن ول ۇمىتىلىپ كەتپەدى، كەرىسىنشە كوپتەگەن جەرلەردە ايتىلىپ ءجۇردى. بۇل ماسەلەنى ب ا ق وكىلدەرى قايتا-قايتا كوتەرىپ وتىردى. لاتىن ءالىپبيى – جاڭالىق ەمەس، ول ءبىزدىڭ وتكەنىمىز، تاريحىمىز، بۇگىنگى تاڭداعى تاجىريبەمىز. كەز كەلگەن الەۋمەتتىك جەلىدە نەمەسە قاراپايىم حابارلاما جىبەرۋدە ەشكىم دە كيريلل قارىپىندەگى قازاق ءتىلىن سمارتفوندارىنا ورناتىپ وتىرمايدى دەسەم ارتىق بولماس. كوپشىلىك حالىق لاتىن ارىپتەرىمەن جازادى. دەمەك، لاتىن ءالىپبيى حالىق اراسىندا قولدانىستا بار دەگەن ءسوز. ارينە، ءبىرشاما كەلەڭسىزدىكتەر، ماسەلەلەر تۋىنداۋى مۇمكىن. الايدا، ورفوەپيا مەن ورفوگرافيالىق زاڭدىلىقتارعا سۇيەنە وتىرىپ، دۇرىس شەشىم قابىلدانادى دەگىم كەلەدى. ەڭ الدىمەن 100 000 سوزدەن تۇراتىن سوزدىك شىعادى. ۋاقىت وتە كەلە بۇل قالىپتى جاعدايعا اينالىپ، بارلىق ماسەلەلەر ءوز شەشىمىن تابادى»، - دەيدى ساياساتكەر مارات شيبۋتوۆ.

قوعامدىق كەڭەس مۇشەسى قازىبەك شايح جاڭا ءالىپبيدى جاساۋعا كەتەتىن قارجىنىڭ بوسقا دالاعا شاشىلماي، ەل ەكونوميكاسىندا قالاتىنىن ايتتى.

«سوڭعى ايلاردا لاتىن الىپبيىنە قاتىستى كوپ پىكىر ايتىلىپ جاتىر. اسىرەسە، بۇل بيۋدجەتكە تومپاق كەلەدى دەگەن ءسوز كوپ. ءبىراق مەن ايتار ەدىم، بۇل ارگۋمەنت سىن كوتەرمەيدى. سەبەبى، ءالىپبيدى اۋىستىرۋعا ءبىز دوللار جۇمسامايمىز، تەڭگە جۇمسايمىز. تەڭگەنى ءوزىمىز جاسايمىز. بۇل اقشاعا مىڭداعان جۇمىس ورىندارى اشىلادى، كىتاپتار قايتا باسىلىپ، قالا اتتارى، كارتا اتاۋلارى وزگەرتىلەدى. مۇنىڭ ءبارى ءوز وتانداستارىمىزدىڭ يگىلىگىنە جۇمىس جاسايدى»، - دەدى قازىبەك شايح.

ەكونوميستىڭ ايتۋىنشا، قازىرگى زاماننىڭ ادامى اقپاراتتىڭ 80 پايىزىن ينتەرنەتتەن الادى.

«سوندىقتان، وسى ۋاقىتقا دەيىنگى ءبىلىم قورى قۇردىمعا كەتەدى دەگەن بوس ءسوز. ءقازىر مۇنداي كىتاپتاردىڭ ەلەكتروندى نۇسقاسى كلاۆياتۋرانىڭ ءبىر عانا بەلگىسىن باسۋ ارقىلى دايىن بولادى»، - دەدى ول.