ءال-فارابي اتىنداعى قازاق ۇلتتىق ۋنيۆەرسيتەتىندە «ورتالىق ازيا – وڭتۇستىك كاۆكاز – تاياۋ شىعىس ءۇشتاعانىنداعى قاۋىپسىزدىك، گەوساياسات جانە تۇركى ينتەگراسياسى» اتتى حالىقارالىق عىلىمي-پراكتيكالىق كونفەرەنسيا ءوتتى.
ءىس-شارا 2026 جىلعى 29-30 ساۋىردە قازۇۋ-دىڭ حالىقارالىق قاتىناستار فاكۋلتەتىندە ۇيىمداستىرىلدى. كونفەرەنسيا جۇمىسى قازاق، ورىس جانە اعىلشىن تىلدەرىندە جۇرگىزىلدى.
كونفەرەنسيانى ءال-فارابي اتىنداعى قازۇۋ حالىقارالىق قاتىناستار فاكۋلتەتىنىڭ حالىقارالىق قاتىناستار جانە الەمدىك ەكونوميكا كافەدراسى، ايماقتىق قاتىناستاردى تالداۋ ورتالىعى جانە حالىقارالىق عىلىمدى دامىتۋ ورتالىعى ۇيىمداستىردى.
كونفەرەنسيا PhD، دوسەنت مىندەتىن اتقارۋشى ادىلبەك الپىسباي ۇلى ەرمەكبايەۆ جەتەكشىلىك ەتەتىن AP22788787 «قازاقستاننىڭ ۇلتتىق مۇددەلەرىن قامتاماسىز ەتۋ كونتەكستىندە حالىقارالىق ترانسكاسپيي باعىتىن ىسكە اسىرۋداعى سىن-قاتەرلەر مەن مۇمكىندىكتەر» جانە AP23483774 «تۇركى ينتەگراسياسىن تەرەڭدەتۋ: قازاقستان ءۇشىن پەرسپەكتيۆالار، گەوساياسي تاۋەكەلدەر مەن قاۋىپتەر» عىلىمي جوبالارى اياسىندا جۇزەگە اسىرىلدى.
كونفەرەنسياعا قازاقستان، ازەربايجان، تۇركيا، ءۇندىستان، پاكىستان، قىرعىزستان، وزبەكستان، ارمەنيا، گرۋزيا، رەسەي جانە ۇلىبريتانيادان كەلگەن 100-گە جۋىق وكىل قاتىستى. پانەلدىك سەسسيالاردا 25 ۋنيۆەرسيتەت، عىلىمي-زەرتتەۋ ينستيتۋتى، تالداۋ ورتالىعى جانە ساراپشىلىق ۇيىمنان 40-قا جۋىق عالىم مەن ساراپشى بايانداما جاسادى.
قاتىسۋشىلارعا قۇتتىقتاۋ ءسوزدى ءال-فارابي اتىنداعى قازۇۋ حالىقارالىق قاتىناستار فاكۋلتەتىنىڭ دەكانى، زاڭ عىلىمدارىنىڭ كانديداتى، پروفەسسور جۇلدىز تالعات قىزى سايرامبايەۆا جانە حالىقارالىق عىلىمدى دامىتۋ ورتالىعى باس ديرەكتورىنىڭ ورىنباسارى ولەگ بالىبەك ۇلى ەسەنوۆ ارنادى.
كونفەرەنسيا بارىسىندا ورتالىق ازيا، وڭتۇستىك كاۆكاز جانە تاياۋ شىعىس كەڭىستىگىندەگى قاۋىپسىزدىك ماسەلەلەرى، گەوساياسي وزگەرىستەر، تۇركى ينتەگراسياسىنىڭ كەلەشەگى، حالىقارالىق كولىك دالىزدەرى، ترانسكاسپيي حالىقارالىق كولىك باعىتى، ورتا ءدالىز جانە وڭىرلىك ىنتىماقتاستىقتىڭ وزەكتى باعىتتارى تالقىلاندى.
ساراپشىلار قازاقستاننىڭ ءوڭىرارالىق بايلانىستاردى دامىتۋداعى، كولىك-لوگيستيكا باعىتتارىن ىلگەرىلەتۋدەگى جانە حالىقارالىق عىلىمي-ساراپشىلىق ديالوگتى نىعايتۋداعى رولىنە ەرەكشە نازار اۋداردى.
كونفەرەنسيا قورىتىندىسى بويىنشا قاتىسۋشىلار عىلىمي جانە ساراپشىلىق ىنتىماقتاستىقتى كەڭەيتۋ، بىرلەسكەن زەرتتەۋلەردى دامىتۋ جانە وڭىرلىك قاۋىپسىزدىك، گەوەكونوميكا مەن ينتەگراسيالىق ۇدەرىستەر بويىنشا تۇراقتى اكادەميالىق ديالوگتى جالعاستىرۋ قاجەتتىگىن اتاپ ءوتتى.
