قازاقستان پرەزيدەنتى نۇرسۇلتان نازاربايەۆ گەرمانيانىڭ فەدەرالدىق كانسلەرى انگەلا مەركەلگە قۇتتىقتاۋ جەدەلحاتىن جولدادى، ― دەپ حابارلايدى Qamshy.kz اقپارات اگەنتتىگى اقورداعا سىلتەمە جاساپ.
نۇرسۇلتان نازاربايەۆ انگەلا مەركەلدى حريستيان دەموكراتيالىق وداعىنىڭ گەرمانيا بۋندەستاگىنا سايلاۋدا جەڭىسكە جەتۋىمەن قۇتتىقتادى. مەملەكەت باسشىسى سايلاۋ قورىتىندىلارى فەدەرالدىق كانسلەردىڭ الەۋمەتتىك-ەكونوميكالىق ساياساتىنا نەمىس حالقىنىڭ قولداۋ كورسەتىپ وتىرعانىنىڭ جارقىن مىسالى ەكەنىن اتاپ ءوتتى.
قازاقستان پرەزيدەنتى انگەلا مەركەلدىڭ حالىقارالىق بەدەلىنە توقتالىپ، ونىڭ وڭىرلىك جانە جاھاندىق قاۋىپسىزدىكتى قامتاماسىز ەتۋگە قوسقان ۇلەسىن جوعارى باعالادى.
«25 جىل ىشىندە قازاقستان مەن گەرمانيا اراسىنداعى دوستىق قارىم-قاتىناستار جوعارى دەڭگەيگە كوتەرىلدى. ەلدەرىمىزدى جاقىنداستىرۋعا سەپتىگىن تيگىزگەن بىرلەسكەن جوبالاردى تابىستى ىسكە اسىرۋعا ءسىزدىڭ زور ۇلەس قوسقانىڭىزدى اتاپ وتكىم كەلەدى»، ― دەلىنگەن جەدەلحاتتا.
سوڭىندا نۇرسۇلتان نازاربايەۆ انگەلا مەركەلگە زور دەنساۋلىق پەن تابىس، ال دوستاس گەرمانيا حالقىنا باق-بەرەكە تىلەدى.
