رەسەي فەدەراسياسىنىڭ سىرتقى ىستەر ءمينيسترى سەرگەي لاۆروۆ وتكەن اپتاداعى قازاقستانعا جاساعان رەسمي ساپارىندا ق ر پرەزيدەنتىنىڭ اكىمشىلىگى باسشىسىنىڭ ءبىرىنشى ورىنباسارى مارات تاجينگە «دوستىق وردەنىن» تابىس ەتتى. ول استاناعا ماسكەۋ مەملەكەتتىك حالىقارالىق قاتىناستار ينستيتۋتى (ممحقي) تۇلەكتەرىنىڭ IV حالىقارالىق فورۋمىنا كەلگەن. فورۋمعا كەلگەن تۇلەكتەردى پرەزيدەنت نازاربايەۆ تا اقوردادا قابىلداعان بولاتىن.

قازاقستانعا رەسەي مەن قازاقستان اراسىنداعى ديپلوماتيالىق قارىم-قاتىناس ورناعانىنا 25 جىل تولۋىنا وراي كەلگەن لاۆروۆتىڭ قازاقستاننىڭ رەسەيدەگى ەكس-ەلشىسى تاجينگە وردەن سىيلاعانى ب ا ق بەتىندە دابىرا بولعان جوق.

«دوستىق وردەنى» - رەسەي فەدەراسياسىنىڭ مەملەكەتتىك سىيلىعى.  بۇل وردەن رەسەي پرەزيدەنتىنىڭ 1994 جىلى 2 مامىرىنان № 442 جارلىعىمەن بەكىتىلگەن. «دوستىق وردەنىمەن» رەسەي فەدەراسياسىنىڭ ازاماتتارى ماراپاتتالادى، وعان قوسا، بۇل وردەن شەتەلدىك مەملەكەتتەردىڭ دوستىق پەن تىنىشتىقتى، مەملەكەتتەر اراسىنداعى تۇسىنىستىكتى، ۇلتتار اراسىنداعى تىعىز مادەني، دوستىق قارىم-قاتىناستى ورناتۋعا  باعىتتالعان ەرەكشە ىستەرى ءۇشىن بەرىلەدى.

لاۆروۆتىڭ قازاقستانعا ساپارى قارساڭىندا رەسەيدەگى ب ا ق بەتتەرىندە «مارات ءتاجين — قازاقستاننىڭ پاتريوتى جانە رەسەي فەدەراسياسىنىڭ دوسى» اتتى ماقالا دا جارىق كوردى. Qamshy.kz ماقالانىڭ اۋدارماسىن وقىرمان نازارىنا ۇسىنادى.

«فيلوسوفيا جانە الەۋمەتتانۋ عىلىمدارىنىڭ كانديداتى، ەكونوميست، الەۋمەتتانۋشى جانە ساياساتكەر – وسىنىڭ بارلىعى مەملەكەت قايراتكەرى مارات ءتاجيننىڭ بويىندا بار. جۇمىس بابىن بىلەتىن، تاجىريبەسى مول، ءوز ءىسىنىڭ  مامانى بولعان ءتاجين باسقا دا تاڭداۋلى ساياساتكەرلەردەن وق بويى وزىق تۇرادى.

الايدا، باسقا دا ساياساتكەرلەرمەن سالىستىرعاندا ءتاجين باق-قا وتە سيرەك سۇحبات بەرىپ، كولەڭكەدە قالاتىن كەزدەرى بولادى. سونىمەن، مارات ءتاجين كىم؟ ونىڭ قازاقستان ءۇشىن ءرولى قانداي؟

مارات ءتاجيننىڭ ساياسات مانسابىنا جەتۋ جولى 1992 جىلى قازاقستاننىڭ پرەزيدەنت اپپاراتى جانە مينيسترلەر كابينەتىنىڭ ىشكى ساياسي باسقارما ءبولىمىنىڭ ءبىرىنشى ورىنباسارى بولىپ تاعايىندالعان كەزىنەن باستالادى. جوعارى مانساپتى شەنەۋنىكتەر قاتارىنا قوسىلعان مارات مۇحانبەتقازى ۇلى ءاردايىم باسقارۋشى ساياساتكەرلەر قاتارىندا بولىپ، جوعارعى لاۋازىمنان تۇسكەن ەمەس.

ول 2001 جىلى ۇلتتىق قاۋىپسىزدىك كوميتەتىن جانە 2007-2009 جىلدارى ق ر سىرتقى ىستەر مينيسترلىگىن باسقارعان، وعان قوسا 2013-2014-كە دەيىن مەملەكەتتىك حاتشى بولسا، 2014-2017 جىلدار اراسىندا قازاقستاننىڭ رەسەيدەگى ەلشىسى بولعان.

وتكەن عاسىردىڭ توقسانىنشى جىلدارى مارات ءتاجين پرەزيدەنت اپپاراتىن  اقپاراتتىق-ساراپتامالىق قىزمەتپەن قامتاماسىز ەتىپ وتىرعان. ءتاجيننىڭ سىرتقى ساياسي الاڭدا جانە ەلىمىزدىڭ ىشكى ماسەلەرىندە  كوپتەگەن باستاماسىن ەلباسى نۇرسۇلتان ءابىش ۇلى ءاردايىم قولداپ وتىرعان. ەكى مىڭىنشى جىلداردىڭ باسىنداعى داعدارىستان شىعۋدا دا ءتاجين جانە ونىڭ كومەكشىلەرى تالماي ەڭبەك ەتىپ،  قيىن-قىستاۋ كەزەڭنەن شىعۋعا مۇمكىندىك جاسادى.»