11 قازاندا الماتى قالاسى مەدەۋ اۋدانى اكىمىنىڭ باستاماسىمەن نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىن جۇزەگە اسىرۋ ماقساتىندا «قازاقستان» قوناق ۇيىندە اۋدان مەكتەپ تۇلەكتەرىنىڭ فورۋمى بولىپ ءوتتى، دەپ حابارلايدى Qamshy.kz اقپارات اگەنتتىگى.

2016 جىلى بۇل فورۋم العاش رەت وتكەن بولاتىن. ال قازىرگى تاڭدا اتالمىش فورۋمدى وتكىزۋ مەدەۋ اۋدانىنىڭ داستۇرلەرىنىڭ بىرىنە اينالعان.

بۇگىنگى وتكەن بۇل فورۋمعا مەدەۋ اۋدانىنىڭ اكىمى ەرجان جۇمات ۇلى، «ق ر ەڭبەك ەرى»، الماتى قالاسىنىڭ قۇرمەتتى ازاماتى، ق ر ءبىلىم ارداگەرى اياگۇل تورە قىزى، كومپوزيتور، پيانيست، حالىقارالىق سايىستاردىڭ لاۋرەاتى راحات-بي تولەگەن ۇلى، تەلەجۇرگىزۋشى ماييا ۆلاديميروۆنا، ق ر پرەزيدەنتىنىڭ مەملەكەتتىك جەكە مۇراعاتىنىڭ ديرەكتورى بوريس الىكەن ۇلى، الماتى قالاسى ءماسليحاتىنىڭ دەپۋتاتى مۇرات ءادىلحان ۇلى جانە دە مەدەۋ اۋدان مەكتەپتەرىنىڭ تۇلەكتەرى قاتىستى.

فورۋمنىڭ مودەراتورى بولعان بوريس الىكەن ۇلى كىرىسپە ءسوزدى ايتىپ، بۇگىنگى وتكىزىلگەن جيىننىڭ ماقساتىمەن تانىستىردى. مەكتەپ تۇلەكتەرى فورۋمىنىڭ باستى ماقساتى – ەلىمىزدىڭ ءتۇرلى سالالارىندا قىزمەت ەتىپ، تاڭداعان ماماندىعىنا بەلگىلى ءبىر جەتىستىكتەرگە جەتكەن كەشەگى مەكتەپ بىتىرگەن تۇلەكتەر مەن مەكتەپ اراسىنداعى ءوزارا بايلانىستى ارتتىرۋ جانە جاستارمەن ۇدايى تۇردە كەزدەسۋلەر ۇيىمداستىرىپ، ءوز تاجىريبەلەرىمەن ءبولىسىپ، ۇرپاق ساباقتاستىعىن جالعاستىرۋ بولىپ تابىلادى.

مەدەۋ اۋدانىنىڭ اكىمى ەرجان جۇمات ۇلى بۇگىنگى فورۋمدا «قوعامدىق سانانى جاڭعىرتۋ، تۋعان جەرگە الەۋمەتتىك قۇرمەت پەن قولداۋ كورسەتۋ – جالپىحالىقتىق وتانشىلدىقتىڭ نەگىزى» تاقىرىبى اياسىندا بايانداما جاساپ، پىكىرىن ايتىپ ءوتتى.

اۋدان اكىمىنىڭ ايتۋىنشا، وتكەن جىلى ۇيىمداستىرىلعان فورۋمعا قاراعاندا بيىلعى فورۋمنىڭ اۋديتورياسى كەڭەيىپ 4 ەسەگە ارتقان.

«ەلباسىنىڭ «رۋحاني جاڭعىرۋ» باعدارلاماسىنىڭ اياسىندا ءبىز مەدەۋ اۋدانىندا ەكىنشى رەت مەكتەپ تۇلەكتەرىن جيناپ فورۋم وتكىزىپ جاتىرمىز. مەدەۋ اۋدانى – الماتى قالاسىنىڭ تاريحي جانە داستۇرلەرى مىقتى ورتالىعى بولىپ تابىلادى. بۇل جەردەگى مەكتەپتەردەن 25 جىلدا 30 مىڭنان استام تۇلەك ءبىتىرىپ شىققان. سولاردىڭ ىشىندە بۇگىنگى تاڭدا بيزنەستە، مەملەكەتتىك قىزمەتتە، ونەردە ۇلكەن جەتىستىكتەرگە جەتكەن ازاماتتارىمىز بار ەكەن. نەگىزگى ماقسات – تۇلەكتەردىڭ تۋعان مەكتەبىنەن قول ۇزدىرمەي، بۇگىنگى ۇرپاقپەن ۇشتاستىرۋ، تۋعان جەرىنە وزدەرىنىڭ ۇلەسىن قوسۋ.

بىلتىرعى فورۋمدى وتكىزگەندە فورماتىمىز باسقاشا، ال اۋديتوريامىز كىشىرەك بولدى، ول كەزدە ءجۇز شاقتى ادام شاقىرىلىپ وتكىزىلگەن بولاتىن. بيىل فورماتىمىز وزگەرىپ، كەڭەيىپ، جالپى 500-دەن استام تۇلەك جينالدى. ولاردىڭ كوپشىلىگى باسقا قالالاردان، باسقا وبلىستاردان، ءتىپتى، شەتەلدەن كەلگەندەرى دە بار. ءبىر جىلدىڭ ىشىندە ءبىز تۇلەكتەردى اۋدانعا شاقىرا وتىرىپ 14 الەۋمەتتىك جوبانى ىسكە اسىردىق. ەكى بالاباقشا اشتىق، مەكتەپ تۇلەكتەرىنىڭ ءبىرى اشىق الاڭا استىندا 4 فۋتبول الاڭىن اشتى.

«ۇرپاقتار ساباقتاستىعى» اقسياسى اياسىندا ءار جىلعى تۇلەكتەر جوعارى سىنىپ وقۋشىلارىمەن كەزدەسىپ، وزدەرىنىڭ ءومىر جولدارىن ايتىپ، تاجىريبە الماسىپ، ءتۇرلى ماماندىقتار تۋرالى بىلۋگە كومەكتەستى. اۋدان اۋماعىندا مەكتەپتەردە 6000-نان استام وقۋشى قاتىسقان جالپى 74 كەزدەسۋ بولىپ ءوتتى»، - دەيدى مەدەۋ اۋدانىنىڭ اكىمى.

العاشقى وتكەن فورۋمنىڭ قورىتىندىسى بويىنشا، 2017 جىلدىڭ قاڭتارىندا تۇلەكتەر سايتى قۇرىلىپ، وندا ءار جىلعى تۇلەكتەر ءتۇرلى دەرەكتەر، وتكىزىلگەن اكسيالار مەن شارالار، دەمەۋشىلىك جانە قايىرىمدىلىق كومەكتەر تۋرالى اقپاراتتارمەن ءبولىستى. سونىمەن قاتار، تۇلەكتەر ءوزارا بايلانىسىپ، باستامالاردى ۇسىنىپ جانە قولداپ، مەكتەپپەن تىعىز قارىم-قاتىناستا بولدى.

مەدەۋ اكىمدىگىنىڭ ايتۋىنشا، الداعى ۋاقىتتا اۋداننىڭ ءار مەكتەبىندە تۇلەكتەر كەڭەسىنىڭ جۇمىسىن ۇيىمداستىرىپ، «ۇرپاقتار ساباقتاستىعى» باعدارلاماسى اياسىندا مەكتەپ وقۋشىلارىمەن كاسىپتىك باعدار بەرۋ جانە تاربيە جۇمىسىن جۇرگىزۋ ءۇشىن اۋدان  مەكتەپتەرىنىڭ تۇلەكتەرىن بيزنەس، مەملەكەتتىك قۇرىلىمدار، عىلىم، مادەنيەت وكىلدەرىن بەلسەندى تارتۋ جۇمىستارى جوسپارلانۋدا.

نازەركە لابيحان