وڭتۇستىك كورەيا بيلىگى ورتا ازيا ەلدەرىمەن ساۋدا بايلانىسىن تەرەڭدەتۋ ماقساتىندا ارنايى اگەنتتىك قۇردى، دەپ جازادى Qamshy.kz اقپارات اگەنتتىگى. بۇل باستاما وڭتۇستىك كورەيانىڭ ايماقتارداعى ەكونوميكالىق قاتىسىن كەڭەيتۋگە مۇمكىندىك بەرمەك.

اتالمىش اگەنتتىك – «كورەيا رەسپۋبليكاسى – ورتا ازيا» ىنتىماقتاستىق جونىندەگى فورۋم حاتشىلىعى – وڭتۇستىك كورەيانىڭ «ەۋرازيالىق باستاما» جوباسى بولىپ تابىلادى. جوبا 2013 جىلى ەل باسشىلىعىندا پارك گەۋن-گي بولعاندا شىققان.

ءوز قىزمەتىن رەسمي تۇردە شىلدەدە باستاعان حاتشىلىققا ورتا ازيانىڭ 5 مەملەكەتىنىڭ وكىلدەرى قوسىلدى. ولار – قازاقستان،قىرعىزستان،تاجىكستان، تۇرىكمەنستان جانە وزبەكستان.

حاتشىلىقتىڭ ماقساتى – وڭتۇستىك كورەيا مەن ورتا ازيا اراسىنداعى مادەني بايلانىستى نىعايتۋ. 1930 جىلداردىڭ سوڭعى شەگىندە سوۆەت ۇكىمەتىنىڭ شەشىمىمەن 100 مىڭعا جۋىق ەتنيكالىق كارىستەر كۇشتەۋ ارقىلى وزبەكستان مەن قازاقستان ەلدەرىنە كوشىرىلگەن.

ءبىر ايتا كەتەرلىگى، كورەيانىڭ گەوگرافيالىق قاشىقتىعى، ورتا ازيا ەلدەرىمەن ورتاق شەكاراسىنىڭ جوقتىعى، ال ورتالىق ازيا ەلدەرى ءۇشىن اشىق مۇحيتقا شىعاتىن مۇمكىندىكتىڭ بولماۋى  - ەلدىڭ ەكونومكيالىق  امبيسياسى ءۇشىن باستى توسقاۋىل بولىپ وتىر. ماسەلەن، قازاقستان استاناسى سەۋلدەن 4،5 مىڭ شاقىرىم قاشقتىقتا ورنالاسقان.

حالىقارالىق قارجى قورىنىڭ مالىمەتىنە سايكەس، 2016 جىلى وڭتۇستىك كورەيانىڭ ورتا ازيا ەلدەرىمەن ساۋدا بايلانىسىنىڭ كولەمى كورەيانىڭ جالپى ەكسپورت كولەمىنىڭ 0،33%-ىن جانە يمپورتتىڭ جالپى كولەمىنىڭ 0،06%-ىن قۇراعان.

ەڭ ءىرى كورەي دياسپوراسى مەكەن ەتەتىن وزبەكستان اۋماعى ورتا ازيا ەلدەرىنىڭ اراسىندا كورەيلىك تاۋارلاردىڭ ەڭ ءىرى يمپورتتاۋشىسى بولىپ تابىلادى. وزبەك اۋماعىندا 408-گە جۋىق كورەيلىك كاسىپورىندار جۇمىس ىستەيدى.

107 مىڭعا جۋىق ەتنيكالىق كارىستەر مەكەن ەتەتىن قازاقستاندا 200 كورەيلىك فيرما جۇمىس ىستەيدى.

ونىڭ ۇستىنە، وزبەكستان وڭتۇستىك كورەيا ينۆەستيسيالارىنىڭ ەڭ ءىرى الۋشىسى. 2013 جىلى سەۋل سامارقان وبلىسىنا كۇن ەلەكتر ستانسياسىن سالۋ ءۇشىن بىرلەسكەن كاسىپورىنعا 300 ملن. دوللار قۇيۋ تۋرالى شەشىم قابىلداعان. ءبىر جىلدان كەيىن كورەيلىك رەسمي تۇلعالار گاز ءوندىرۋ جانە حيميا ونەركاسىبى سالالارىنداعى ءتۇرلى جوبالارعا 5 ملرد. دوللار كولەمىندە ينۆەستيسيالاۋ جوسپاردا بار ەكەنىن مالىمدەگەن.

بۇدان بولەك وڭتۇستىك كورەيانىڭ ەڭ ءىرى ينۆەستيسيالىق جوباسى تۇرىكمەنستان ەلى. 2015 جىلى تۇرىكمەنستاندىق Pohang Iron & Steel كومپانياسىنىڭ جوباسى 1 ملرد. دوللارعا باعالاندى.