ەلباسى نۇرسۇلتان نازاربايەۆ قوناققا شاقىرعان 7 جاستاعى قىزىلوردالىق نۇرسۇلتان جاقسىكەلدييەۆ استانانى ارالاپ ءجۇر، دەپ Qamshy.kz اقپارات اگەنتتىگى قازاقپاراتقا سىلتەمە جاساپ  حابارلايدى.

ەستەرىڭىزدە بولسا، 5 قازان كۇنى پرەزيدەنت نۇرسۇلتان نازاربايەۆ جۇمىس ساپارىمەن سىر وڭىرىنە كەلگەن بولاتىن. سول ساپارىندا مەملەكەت باسشىسى قىزىلورداداعى  «اراي» سپورتتىق-ساۋىقتىرۋ كەشەنىندە جاستارمەن كەزدەستى. كەزدەسۋگە قامشىبەك قوڭقابايەۆ، اسەم سادىقوۆا، ءمولدىر جاڭبىرباي قاتارلى ەلىمىزگە بەلگىلى سپورتشىلار كەلگەن. سونىمەن بىرگە، ەلباسىمەن جۇزدەسۋگە «نۇرسۇلتان» ەسىمىن يەلەنگەن ۇزدىك وقۋشىلار دا وبلىس اۋداندارىنان ارنايى شاقىرىلعان ەدى. كەزدەسۋ بارىسىندا ارالدىق نۇرسۇلتان جاقسىكەلدييەۆ مەملەكەت باسشىسىنا بولاشاقتا عارىشكەر بولعىسى كەلەتىنىن، جاقىندارىن ۇشاقپەن قىدىرتىپ، استانانى كورگىسى كەلەتىنىن ايتقان. جاس جەتكىنشەكتىڭ بالا ارمانى ەلباسىن بەي-جاي قالدىرماسا كەرەك. كىشكەنتاي اتتاسىنىڭ باسىنان سيپاپ، اتا-اناسىمەن بىرگە استاناعا شاقىرعان بولاتىن. كەزدەسۋ بارىسىندا وبلىس اكىمى قىرىمبەك كوشەربايەۆ الداعى كۇندەرى نۇرسۇلتان مەن ونىڭ جاقىندارىنىڭ ەلىمىزدىڭ باس قالاسىنا بارىپ-كەلۋىنە جاعداي جاسالاتىنىنا ۋادە بەردى.

جاس بالانىڭ ارمانى ورىندالىپ، نۇرسۇلتان اكە-شەشەسىمەن، اجەسىمەن جانە كىشكەنتاي قارىنداسى جانەركەمەن استاناعا كەشە كەلىپتى. كوپتىڭ نازارىنداعى نۇرسۇلتان وجەت بالا. تىلشىلەر قاۋىمىنىڭ ساۋالدارىنا تايسالماي جاۋاپ بەردى. «استاناعا ءبىرىنشى رەت كەلىپ تۇرمىن. قالا ماعان قاتتى ۇنادى. بايتەرەكتى بۇرىن تەك قانا تەلەديداردان كورەتىنمىن. بۇگىن ىشىنە كىرىپ، كەڭ ەكەنىن بايقادىم. كەلەشەكتە پرەزيدەنت بولعىم كەلەدى. ول ءۇشىن كوپ وقۋ كەرەك ەكەنىن بىلەمىن»، - دەيدى بالا نۇرسۇلتان. نەمەرەسىنىڭ استاناعا ەلباسىنىڭ شاقىرتۋىمەن كەلگەنىنە اجەسى ايناگۇل دە قاتتى قۋانىپ ءجۇر. ايتۋىنشا، نەمەرەسىنىڭ اتىن «نۇرسۇلتان» دەپ ىرىمداپ ءوزى قويعان ەكەن. «شىنى كەرەك، نەمەرەمىزدى استاناعا ەلباسى شاقىرادى دەگەن ءۇش ۇيىقتاساق تۇسىمىزگە كىرەر مە ەدى. اتىن ەل ءۇشىن ەڭبەكتەنسىن دەگەن تىلەكپەن ىرىمداپ نۇرسۇلتان قويعان ەدىك. وتباسىمىزبەن ەلباسىنىڭ ارقاسىندا استانانى كورىپ جاتىرمىز. قۇدايعا شۇكىر، نەمەرەمىز ساباقتا ۇزدىك وقۋشىلاردىڭ ءبىرى. ءبىرىنشى سىنىپتى ۇزدىك اياقتادى. كەشە دە وسى جاققا كەلە جاتىپ «مەن ساباعىمنان قالاتىن بولدىم» دەپ ۋايىمداپ قويادى»، - دەپ كۇلەدى اجەسى. نۇرسۇلتان قارىنداسى جانەركەنى بىرگە قىدىرتىپ ءجۇر. «بايتەرەككە شىعىپ، نەمەرەم قولتاڭباعا قولىن سالىپ، قۋانىپ جاتىر. ءبارى دە جاقسى كۇتىپ الدى. ەندىگى كەزەكتە، استانا وپەرا تەاترىنا، ويىن ورتالىقتارىنا اپارماق. حالقىمىزعا بەرەكە-بىرلىك تىلەيمىن. اسىرەسە، ەلباسىمىزعا زور العىسىمىز بەن ىستىق ىقىلاسىمىزدى بىلدىرگىمىز كەلەدى. جاستار ۇلكەن بيىكتەن كورىنە بەرسىن دەپ تىلەيمىن»، - دەيدى بالا نۇرسۇلتاننىڭ اجەسى ايناگۇل.