وتكەن سەنبىدە قىرعىز پرەزيدەنتى المازبەك اتامبايەۆ الا-ارچا رەزيدەنسياسىندا ەل ازاماتتارىنا قىرعىزستاننىڭ دامۋىنا قوسقان ۇلەسى ءۇشىن ماراپاتتاۋ راسىمىندەگى ءسوزىن ارانداتۋشىلىق، جاۋلىق ريتوريكادا قازاقستان پرەزيدەنتىنە جالا جابۋعا ارناعانى بەلگىلى.

سول كۇنى، كوپ ۇزاماي اتامبايەۆتىڭ وسى سوزىنە بايلانىستى قازاقستان سىرتقى ىستەر مينيسترلىگى ارنايى مالىمدەمە جاسادى. «قازاقستان قىرعىز رەسپۋبليكاسىنىڭ پرەزيدەنتى ا. اتامبايەۆتىڭ قازاقستان رەسپۋبليكاسىنىڭ باسشىلىعىنا قاتىستى سوزدەرىنە بايلانىستى قاتاڭ نارازىلىق بىلدىرەدى جانە مۇنداي سوزدەرگە ەكى دوستاس مەملەكەتتەر اراسىنداعى قاتىناستاردا جول بەرىلمەۋى ءتيىس دەپ سانايدى. قىرعىزستان پرەزيدەنتىنىڭ سايلاۋ الدى ماقساتىنداعى جاۋاپسىز، ارانداتۋشىلىق ءماندى جانە جالعان پىكىرى ەلدەرىمىز اراسىنداعى دوستىق پەن ءوزارا كومەكتىڭ كوپعاسىرلىق بايلانىستارىنا نۇقسان كەلتىرە المايتىنىنا سەنىم بىلدىرەمىز. قازاقستان تاراپى قىرعىز حالقىمەن ءداستۇرلى باۋىرلاستىق قاتىناستارىن دامىتۋ جولىندا بەرىك بولىپ قالا بەرەدى» دەلىنگەن مالىمدەمەدە.

سىرتقى ىستەر مينيسترلىگى نوتاسىنان كەيىن العاش بولىپ قازاقستاننىڭ حالىقارالىق قاتىناستار جونىندەگى كەڭەستىڭ ءتوراعاسى، ساياساتتانۋشى ەرلان كارين المازبەك اتامبايەۆتىڭ سوزدەرىنە بايلانىستى مىنانداي مالىمدەمە جاسادى: «قىرعىز پرەزيدەنتى اكىمشىلىگى قازاقستاندىق فاكتوردى ساياسي تەحنولوگيالىق قۇرال رەتىندە پايدالانۋدى، ال پاتريوتتىق كوڭىل-كۇيدى جاساندى قوزدىرۋ ارقىلى بيلىككە ۇمىتكەردىڭ اينالاسىنا ەلەكتوراتتاردى جۇمىلدىرۋ جانە شوعىرلاندىرۋدى ويلاستىرعانعا ۇقسايدى. كوپشىلىك جاعدايدا مەملەكەتارالىق قارىم-قاتىناستار ساياسي تەحنولوگيانىڭ قۇربانىنا ءجيى ءارى جەڭىل اينالىپ جاتادى. ...ءبىر قۋانتارلىق جايت، قىرعىز قوعامىندا «ەسسىزدىككە» جول بەرۋ، جوعارىدان بەرىلگەن تاپسىرمانى مۇلتىكسىز ورىنداۋ فاكتورلارى بايقالمايدى. ەڭ باستىسى قاراپايىم حالىق بۇل سايلاۋ قيتۇرقىلارى ەكەندىگىن جاقسى تۇسىنەدى. سوندىقتان دا ءبىز سايلاۋ تەزىرەك ءوتىپ، ەكى باۋىرلاس ەلدىڭ ساياساتى تەك ناقتى پروبلەمالار مەن كۇن تارتىبىندەگى وزەكتى ماسەلەلەرمەن اينالىسسا ەكەن دەپ ۇمىتتەنەمىز».

ال دۇيسەنبى كۇنى قازاقستان پرەمەر-مينيسترى ب. ساعىنتايەۆ قىرعىز پرەزيدەنتى ا. اتامبايەۆتىڭ ايتقان سوزدەرىنە قاتىستى مالىمدەمە جاسادى. «اعىمداعى جىلدىڭ 7 قازانىندا قىرعىز رەسپۋبليكاسىنىڭ پرەزيدەنتى ا. اتامبايەۆ قازاقستاننىڭ الەۋمەتتىك-ەكونوميكالىق دامۋىنىڭ جەكەلەگەن اسپەكتىلەرىنە قاتىستى ورىنسىز ءارى ەكى ەلدىڭ ءوزارا دوستىق قارىم-قاتىناسىنا نۇقسان كەلتىرەتىن ءبىرقاتار مالىمدەمە جاسادى. قىرعىز رەسپۋبليكاسىمەن ەكىجاقتى قارىم-قاتىناستى دامىتۋدىڭ بۇلجىماس باعىتىن راستاي وتىرىپ، قىرعىزستان پرەزيدەنتىنىڭ سايلاۋالدى ماقساتتا جاسالعان جاۋاپسىز، ارانداتۋشىلىق ءماندى جانە كوپە-كورىنەۋ جالعان پايىمى ءبىزدىڭ ەلدەرىمىزدىڭ اراسىنداعى عاسىرلار بويى قالىپتاسقان ءوزارا كومەك پەن دوستىقتىڭ دانەكەرىنە نۇقسان كەلتىرمەۋى ءتيىس. وسىعان بايلانىستى مەن قىرعىز جۇرتشىلىعىن قازاقستاننىڭ شىنايى ەكونوميكالىق دامۋى تۋرالى دەرەۋ حاباردار ەتۋدى ءجون دەپ شەشتىم»، دەدى باقىتجان ساعىنتايەۆ. سول كۇنى ەلدىڭ باستى ارناسى – «Qazaqstan» تەلەارناسىنىڭ «باستى تاقىرىپ» ساراپتامالىق باعدارلاماسىندا اتامبايەۆتىڭ مالىمدەمەسىنە تالداۋ جاساپ، اتامابايەۆتى ارانداتۋشى دەپ اتادى.

دۇيسەنبى باقىتجان ساعىنتايەۆ اتامبايەۆتىڭ ەش نەگىزسىز، سيفرلاردى بۇرمالاۋعا نەگىزدەلگەن ورىنسىز سوزدەرىنە بايلانىستى مالىمدەمە جاساعانىن اتاپ ءوتتى. ق ر پرەمەر-مينيسترى سەنىمدى فاكتىلەرمەن بەكىتىلگەن ۇكىمەتتىڭ رەسمي پوزيسياسىن جەتكىزگەنىن باسا ايتتى. سونىمەن قاتار سەيسەنبى كۇنى ەلدىڭ رەسمي گازەتى «ەگەمەن قازاقستاندا» جانە ورىس ءتىلدى «كازپراۆدادا»، اتامابايەۆتىڭ مالىمدەمەسىنە قارسى ماقالالار جاريالاندى. وسىنداي مازمۇنداعى ماقالا «ەگەمەنىڭ» كەشەگى نومىرىندە دە جاريالاندى.

نۇرتاي نۇرعالي