بيىلدان باستاپ بالا اسىراپ العىسى كەلەتىن اتا-انالاردىڭ ۇمىتكەر رەتىندە ەلەكتروندى تىركەۋگە تۇرىپ، جەتىم جانە اتا-اناسىنىڭ قامقورلىعىنسىز قالعان بالالاردىڭ ەلەكتروندىق دەرەكقورى ارقىلى ىزدەي الادى. سونىمەن قاتار، تامىز ايىنان باستاپ زاڭدى كەڭەستەر ۇسىناتىن زاڭ قىزمەتى قۇرىلدى. ورتالىق ماماندارى ءوتىنىش بەرگەن كليەنتتەرگە عانا ەمەس، تەلەفون ارقىلى حابارلاسقان ازاماتتارعا دا باستاپقى قۇقىقتىق كەڭەستەر بەرەدى دەپ حابارلايدى Qamshy.kz اقپارات اگەنتتىگى.

بۇل تۋرالى ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسياسىندا ق ر ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسىنىڭ م.ا. ەرجان ەرسايىنوۆ مالىمدەدى.

- مۇنداي ءتارتىپتى ەنگىزۋ بالالاردى اسىراپ العىسى كەلەتىن وتباسىلارعا قۇقىقتىق جانە ۇيىمداستىرۋشىلىق كومەك پەن پسيحولوگيالىق-پەداگوگيكالىق قولداۋ كورسەتۋدە ۇلكەن كومەك بولادى. سونىمەن قاتار، بۇل ارقىلى ءبىز بالا تاربيەلەۋدە پايدا بولعان كەدەرگىلەردى ۋاقىتىلى جويىپ، بالانىڭ ينتەرناتتىق مەكەمەلەرگە قايتارىلۋىنا جول بەرمەيتىن ەدىك. تاعى ءبىر ايتا كەتەتىن جايت، قوعامدا جەتىمدەردى جىلاتپاۋعا جانە اتا-اناسىنىڭ قامقورلىعىنان ايىرىلماۋىن الدىن الىپ، ومىرلىك قيىندىقتارعا دۋشار بولعان وتباسىلارمەن جۇمىس جاسايتىن الەۋمەتتىك پاتروناج قىزمەتى ءوز ءىسىن باستادى. بۇل پروسەستەر قولدانىستاعى زاڭناماعا ءبىرقاتار وزگەرىستەر ەنگىزۋدى قاجەت ەتەدى»، - دەدى ق ر ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسىنىڭ م.ا. ەرجان ەرسايىنوۆ.

مينيسترلىك وكىلىنىڭ ايتۋىنشا ەلىمىزدە 27 مىڭ جەتىم جانە اتا-اناسىنىڭ قامقورلىعىنسىز قالعان بالا بار. بۇل ەلىمىز بويىنشا جالپى بالا سانىنىڭ 0،5% قۇرايدى. ونىڭ ىشىندە 21 مىڭ بالا (75%) قازاقستاندىق ازاماتتاردىڭ قامقورلىعىمەن اسىراپ الىنسا، 6 مىڭنان استامى (25%) جەتىم جانە اتا-اناسىنىڭ قامقورلىعىنسىز قالعان بالالارعا ارنالعان 140 مەكەمەدە تاربيەلەنىپ جاتىر.