ۇلتتىق قاۋىپسىزدىك كوميتەتىنىڭ باسپا ءسوز قىزمەتى مەملەكەتتىك شەكارانىڭ بارلىق پەريمەترى بويىنشا ونىڭ ىشىندە قازاق-قىرعىز ۋچاسكىسىندە جوسپارلى شەكارالىق وپەراسيا جۇرگىزىلىپ جاتقاندىعىن حابارلايدى دەپ جازادى Qamshy.kz اقپارات اگەنتتىگى. 

اتالعان وپەراسيانىڭ ماقساتى شەكارا كەڭىستىگىندە زاڭعا قايشى ارەكەتتەردىڭ، تەرروريستىك، كونتراباندالىق جانە وزگە دە قىلمىستىق ءىس-قيمىلدىڭ جولىن كەسۋ، شەكارالىق رەجيمنىڭ جانە كوشى-قون زاڭناماسىنىڭ ساقتالۋىن قاداعالاۋ بولىپ تابىلادى. 

وسىعان وراي، شەكارادان وتەتىن تۇلعالاردى، كولىك قۇرالدارى، جۇكتەر مەن تاۋارلاردى تەكسەرۋ كۇشەيتىلدى. 

سونىمەن بىرگە شەكارانى وتۋگە قانداي دا ءبىر شەكتەۋلەر مەن تىيىمدار سالىنعان جوق. ۇقك شەكارا قىزمەتى بولىمشەلەرى جانە اسكەري قىزمەتكەرلەرىنىڭ ىس-ارەكەتى قازاقستان جانە شەتەل ازاماتتارىنىڭ قۇقىقتارى شەكتەلمەي، قاتاڭ زاڭناما شەڭبەرىندە ىسكە اسىرىلۋدا.