كۇيەۋى – رەسەيلىك فيزيك، ايەلى – قازاقستاندىق حورەوگراف. بۇگىندە ەرلى زايىپتىلار ماسكەۋدە تۇرادى، ۇل مەن قىز ءوسىرىپ وتىرعان باقىتتى اتا-انا. ەكى ءتۇرلى ۇلتتىڭ وتاۋ قۇرۋى ءارى باقىتتى عۇمىرى تۋرالى «مير 24» تەلەارناسىنىڭ ءتىلشىسى ءبىلىپ قايتتى.

ساۋلە جۋكەنوۆا ستۋدەنتتەرگە ءار ءتۇرلى ۇلتتاردىڭ ءبيىن ۇيرەتەدى، ءتۇرلى شارالارعا دايىندايدى. بيشى-حورەوگرافتىڭ ايتۋىنشا، ءبيدىڭ قيىنى جوق، سول سەكىلدى بيگە يكەمى كەلمەيتىن ادام دا بولمايدى. بي ۇيرەتۋدىڭ دە ەرەكشەلىگى بار ەكەنىن ايتادى. وزگەگە قانداي دا ءبىر ۇلتتىڭ بيدەگى قيىمىلىن كورسەتە وتىرىپ، ادامعا سول ۇلتتىڭ مادەنيەتىن ۇيرەتكەندەي كۇي كەشەدى.

«ءبىز بۇگىن قازاقشا بي ۇيرەندىك. قازاقستاندا تۇراتىن نەمەسە مادەنيەتىمەن تانىس ادامدار بي قيمىلدارىن تەز قاعىپ الادى. ال ول ۇلتپەن مۇلدەم تانىستىعى جوقتاردىڭ ستيليستيكانى قابىلداۋى قيىنعا سوعادى. ولارعا قازاقشا بي ۇيرەنۋ قيىن»، - دەدى «الەم مادەنيەتى» جوباسىنىڭ جەتەكشىسى، حورەوگراف ساۋلە جۋكەنوۆا.

حالىقارالىق مادەني قاتىناستار جايى ساۋلەگە ەتەنە تانىس. ورىس ۇلتىنىڭ ەرىمەن وتاۋ قۇرعانىنا 32 جىل. ەكى بالاسى بار. جارى دميتريي ساۋلەنىڭ جاتتىعۋى اياقتالعانشا ەسىك سىرتىندا كۇتىپ وتىرادى. جۇمىسىنان كەيىن بىردەن دايىندىق زالىنا كەلۋگە تىرىسادى ەكەن.

دميتريي – فيزيك، حورەوگرافپەن بىرنەشە جىل ءبىر شاڭىراق استىندا تۇرىپ جاتقان ءوزى دە بيگە ءبىرشاما يكەمدەلىپ قالعان.

ەرلى-زايىپتىلار ماسكەۋدە قاراپايىم پاتەردە تۇرادى. الايدا پاتەردە ەكى ۇلتتىڭ ءسالت-داستۇرى ساباقتاسىپ جاتادى. ەڭ الدىمەن، گاسترونوميالىق جاعى... دميتريي كوبىنە كاۋاپ دايىنداعاندى جاقسى كورەدى، ال ساۋلە ەت اسادى.

ەكەۋى 1980 جىلدارى بي كەشىندە تانىسقان. ساۋلەنى ءبىر كورگەننەن ۇناتقان دميتريي ۋاقىت سوزباي، سۇيگەن قىزىنا ۇسىنىس جاسايدى.

«دميتريي ءسوز سالۋعا كەلگەندە، بىرىنشىدەن ونىڭ جاسى كىشى ەكەنىن، ەكىنشىدەن وزگە ۇلتتىڭ جىگىتى ەكەنىن ءبىلدىم. ماماندىعى – فيزيك، ال مەن – ليريكپىن. وزىنەن جاقسىلاپ ويلانۋىن سۇرادىم، ول كەلىستى»، - دەپ وتكەن كۇندەرىن ەسىنە الدى ساۋلە جۋكەنوۆا.

ول ۋاقىتتا دميتريي كوستيۋم مەن نەكە جۇزىگىن الۋعا كەتكەن ەكەن. قايتا ورالعاندا، جۇپ ۇيلەنۋ تويىن وتكىزدى. العاشىندا ەكى جاقتىڭ دا اتا-اناسى نەكەگە قارسىلىق تانىتقان، الايدا دميتريي قازاقستانعا كەلگەندە ءوزىنىڭ ناعىز وتباسىن تاپقانىن ءتۇسىندى.

«وتباسى مۇشەلەرى مەنى بىردەن قابىلدادى. بۇگىندە ايەلىمنىڭ اعاسى مەنىڭ تۋعان باۋىرىمداي بولىپ كەتكەن. ساۋلەگە ۇيلەنەمىن دەپ، اعالى بولعانىما قۋانامىن»، - دەيدى دميتريي جۋكەنوۆ.

ەرلى زايىپتىلار «ماحاببات ۇلتقا دا، مادەنيەت كە دە، دىنگە دە بولىنبەيدى» دەيدى.