قازاقستان رەسپۋبليكاسىنىڭ ازاماتشاسى قازاق-قىرعىز شەكاراسىندا قايتىس بولدى، دەپ Qamshy.kz اقپارات اگەنتتىگى today.kz سايتىنا سىلتەمە جاساپ حابارلايدى.  

70 جاستاعى قازاقستاندىق ايەل قازاق-قىرعىز شەكاراسىنداعى «اق تىلەك» باقىلاۋ-وتكىزۋ پۋنكتىندە قازا تاپتى. دەرەكتەر بويىنشا، ونىڭ گيپەرتونيالىق كريزى بولعان.

«1947 جىلى دۇنيەگە كەلگەن قازاقستان ازاماتشاسى البينا شاعيموۆا  قىرعىزستان-قازاقستان شەكاراسىنداعى باقىلاۋ بەكەتىندە قايتىس بولدى. ول قازاقستاننان قىرعىزستان شەكاراسىن كەسىپ وتكەن سوڭ ءوزىن جايسىز سەزىنگەن. شەكارا قىزمەتى مەديسينالىق العاشقى كومەك كورسەتتى. سودان كەيىن جەدەل جاردەم شاقىرىلدى»،- دەپ مالىمدەدى قۇزىرەتتى ورگان وكىلدەرى.

قايعىلى وقيعا 13 قازاندا تۇسكى ۋاقىتتا قازاقستان شەكاراسىنان ءوتىپ كەتكەن سوڭ ورىن الدى.

«جولدا كەزىككەن جەدەل جاردەم بريگاداسى ايەلدىڭ قايتىس بولعانىن ايتادى. الدىن-الا مالىمەت بويىنشا، ونىڭ گيپەرتونيالىق كريزى بولدى. ۇلى اناسىنىڭ دەنەسىن قازاقستانعا الىپ كەتتى»، - دەلىنگەن باسپا ءسوز قىزمەتىنىڭ مالىمدەمەسىندە.

قۇزىرەتتى ورگاننىڭ ايتۋىنشا، قايعىلى وقيعا كەزىندە شەكارادا ەشقانداي تەجەۋ بولماعان. قازاقستاننان قىرعىزستانعا ءوتۋ باعىتىندا كەپتەلىس جوق، ادامدار قالىپتى قوزعالىپ جاتقانى حابارلامادا باياندالعان.

ەستەرىڭىزگە سالا كەتەيىك، 11 قازاندا الەۋمەتتىك جەلىدەگى پايدالانۋشىلار قازاقستان مەن قىرعىزستان شەكاراسىندا تۋىنداعان ۇزاق كەزەككە شاعىمدانعان بولاتىن. بۇل كەپتەلىس قورداي باقىلاۋ-وتكىزۋ پۋنكتىندە ورىن الدى. وسىعان بايلانىستى قىرعىزستان رەسپۋبليكاسىنىڭ پرەمەر-مينيسترى ساپار يساكوۆ شەكارادان وتۋشىلەرگە ىڭعايلى جاعداي جاساۋدى تاپسىردى.