قىرعىزستان پرەزيدەنتتىگىنە ۇمىتكەر ومىربەك بابانوۆ پرەسس-كونفەرەنسيا بارىسىندا سايلاۋ پروسەسىندە بولعان جاعدايدىڭ ءبارىن وتكەننىڭ ەنشىسىنە قالدىرۋ كەرەكتىگىن ايتتى، دەپ جازادى Qamshy.kz اقپارات اگەنتتىگى.

16 قازاندا ول وتكەن سايلاۋ تۋراسىندا ۋاقىتتى 2 كەزەڭگە بولەتىنىن مالىمدەدى.

«مەنىڭشە سايلاۋ ۋاقىتى جانە سايلاۋدان كەيىنگى ۋاقىت بولادى. سايلاۋ پروسەسىندەگى بولعان جاعدايلار جابۋلى قازاق نۇيىندە سول جەردە قالۋ كەرەك. پارلامەنتتىك سايلاۋدا ءبىزدىڭ پارتيا ەكىنشى ورىندى يەمدەندى، پرەزيدەنتتىك سايلاۋدا ەكىنشى ورىننان تۇردىم»، – دەدى بابانوۆ.

سونىمەن قاتار ءوزىنىڭ باستى قارسىلاسى سوورانباي جەەنبەكوۆتى جەڭىسىمەن ءالى دە قۇتتىقتاماعانىن ايتتى. ساياساتكەردىڭ ايتۋىنشا، وعان حابارلاسىپ، قۇتتىقتاي سالۋ وڭاي، الايدا كومانداسىمەن سايلاۋ قورىتىندىسى بويىنشا جۇمىستار اتقارۋ كەرەك ەكەندىگىن ەسكەرتتى.

سونداي-اق جاقىن ۋاقىتتا ەلدەن كەتۋ جايىن جوسپارلامايدى. بۇگىندە كوماندانى جيناپ، قىزۋ جۇمىسقا كىرىسۋ كەرەك دەيدى.

بابانوۆتىڭ ايەلى دە سايلاۋدان كەيىن ەرىنە قولداۋ كورسەتكەن كورىنەدى. بابانوۆتىڭ ايتۋىنشا، ايەلى ءدال وسىنداي ناتيجە كۇتپەگەن. سوعان قاراماستان كۇيەۋىنە دەگەن سەنىمى ازايا قويمادى.

«ءبارىنىڭ بىتكەنى جاقسى بولدى. سەن مىقتىسىڭ، قولىڭنان ءبارى كەلەدى»، - دەدى ايەلى سايلاۋ ناتيجەسىنەن كەيىن.

ايتا كەتەيىك، 15 قازاندا قىرعىزستان حالقى ەلدىڭ جاڭا باسشىسىن سايلادى. سايلاۋ قورىتىندىسى بويىنشا، سايلاۋشىلاردىڭ 54،81 پايىزىن جيناعان سوورونباي جەەنبەكوۆ جەڭىسكە جەتتى. 33،74 پايىز داۋىس جيناعان ومىربەك بابانوۆ ەكىنشى ورىننان كورىندى.