قازاقستاندا 13 كۇنگە جەتەتىن اي-92 بەنزينى بار. بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر ەنەرگەتيكا ءمينيسترى قانات بوزىمبايەۆ ايتتى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

«قابىلدانعان شارالاردىڭ ارقاسىندا ەلىمىزدە كەشەگى كۇنى اي-92 بەنزينىنىڭ جيىنتىق قالدىعى 127 مىڭ توننانى قۇرادى. بۇل  بىرنەشە كۇن بۇرىنعى كولەمنەن 10 مىڭ تونناعا ارتىق نەمەسە قالعان بەنزين مولشەرى 13 كۇن بويى قامتاماسىز ەتۋگە جەتەدى. بۇل ەلدىڭ بارلىق وڭىرلەرىن ساتىلىمدا قانداي دا ءبىر ىركىلىسسىز تولىقتاي قامتاماسىز ەتۋگە جەتەتىن قالدىق دەڭگەيى»، - دەدى بوزىمبايەۆ.

ونىڭ اتاپ وتۋىنشە، قازىرگى كۇنى اي-92 بەنزينىن ساتۋدا شەكتەۋ بار وڭىرلەر جوق دەۋگە دە بولادى. دەگەنمەن، جانارماي ساتاتىن 2 جەلىدە اي-92 بەنزينىن تالونمەن ساتۋ جۇرگىزىلۋدە.

«مەنىڭشە، بۇل جەلىلەر دە تاياۋ بىرنەشە كۇننىڭ ىشىندە ەركىن ساتۋعا كوشەتىن بولادى. بۇعان قوسا، وتكەن اپتادا مينيسترلىكتىڭ كوميسسياسىن مۇناي وڭدەۋ زاۋىتتارىن جاڭعىرتۋ جۇمىستارىنا اۋديت جۇرگىزۋ ءۇشىن جىبەردىم. پاۆلودار مۇناي وڭدەۋ زاۋىتى بويىنشا بارلىق جۇمىستار كەستەگە سايكەس جۇرگىزىلۋدە، زاۋىتتىڭ ىسكە قوسىلۋى 26 قازانعا جوسپارلانعان. قازان ايىنىڭ سوڭىنا دەيىن زاۋىت 65 مىڭ توننا مۇناي وڭدەپ، تاۋلىگىنە اي-92 بەنزينىنىڭ 2،5 مىڭ تونناسىن جونەلتىپ وتىرادى دەپ جوسپارلانۋدا. وسىلايشا، ءبىز وسى اپتادا احۋال تولىقتاي تۇراقتالادى دەپ وتىرمىز. بۇعان قوسا، اپتا سوڭىندا 50 مىڭ توننا يمپورت بەنزين كىرەدى جانە كەلەسى اپتادا قازاقستاندىق بەنزيندى بارىنشا ءوندىرۋ قولعا الىنادى»، - دەدى مينيستر.