شىمكەنتتىڭ شەنەۋنىكتەرى قوعامدىق كولىكپەن قاتىناپ ءجۇر. قالا اكىمى عابيدوللا ءابدىراحىموۆتىڭ ءوزى باستاپ قاراماعىنداعى جەتەكشى قىزمەتكەرلەرگە 1 اي قىزمەتتىك كولىككە مىنۋگە تىيىم سالدى دەپ حابارلايدى Qamshy.kz اقپارات اگەنتتىگى otyrar.kz-كەسىلتەمە جاساي وتىرىپ. ەندى اكىم جانە ونىڭ ورىنباسارلارى، ءبولىم باسشىلارى بۇگىننەن باستاپ جۇمىستارىنا اۆتوبۋسپەن قاتىناي باستادى. جاۋاپتى ماماندار قۇر بارىپ-كەلمەي، جولاۋشىلار كولىگى سالاسىنداعى كەم-كەتىكتەر مەن ەرەجە بۇزۋشىلىقتاردى انىقتاۋى ءتيىس.

شىمكەنتتەگى قوعامدىق كولىكتىڭ جۇمىسى تاپ-تۇيناقتاي. ءار ايالداماعا ايالداۋ ۋاقىتى دا ساقتالعان. ونىڭ ءبىر سەبەبى، جولاۋشىلار كولىگىمەن شەنەۋنىكتەر ءجۇر. قالانىڭ قاق ورتاسىنداعى «سپارتاك» ايالداماسىنان ەڭ ءبىرىنشى بولىپ ءال فارابي اۋدانىنىڭ اكىمى باۋىرجان قالجانوۆ ءتۇستى. ءبىر ەمەس، بىردەن ەكى باعىتتىق كولىكپەن جۇمىسقا جەتكەن شەنەۋنىك قىسىلماي، دەر كەزىندە كەلگەنىن ايتتى.

باۋىرجان قالجانوۆ، ءال فارابي اۋدانىنىڭ اكىمى: «مەن №69 باعىتتاعى اۆتوبۋسقا ءمىندىم. تەز جەتتىم. ءىشى تازا، قىزمەت كورسەتۋ دەڭگەيى جوعارى. بيلەت تە بەردى.»

قۋاتجان جۇماتايەۆ، قالالىق جولاۋشىلار كولىگى جانە اۆتوموبيل جولدارى ءبولىمىنىڭ باسشىسى: «مەن ءبىر ەمەس، ەكى اۆتوبۋسقا ءمىندىم. ارينە، جولاۋشى كوپ. بۇل تاڭعى «چاس-پيككە» بايلانىستى. ءۇش ايالدامادا جولاۋشىلار كوپ ءمىندى. مەن بەكجان بازارى ماڭىنان №12 باعىتتاعى كولىككە وتىردىم. وسى جەرگە دەيىن 29 مينۋتتا جەتتى. ەندى «چاس-پيكتە» جواۋشىلار اعىنى كوپ بولاتىنىن جاسىرمايمىز. ول بارلىق ءىرى قالانىڭ ماسەلەسى. مىنە، جولاۋشى بيلەتىن الدىم. مەن بۇل باستامانى قولدايمىن».

وسىلايشا قالا اكىمىنىڭ تاپسىرماسى بىردەن ورىندالدى جانە ءبىر ايعا جالعاسادى. بايقاعانىمىز — اكىمدىكتىڭ عيماراتىنا ءبىر دە ءبىر قىزمەتتىك كولىك كەلىپ توقتامادى. اكىمدىكتەگىلەردىڭ ايتۋىنشا، قىزمەتتىك كولىك جۇرگىزۋشىلەرى اقىلى ەڭبەك دەمالاسىنا كەتكەن. ياعني ەڭبەك كودەكسى بويىنشا ايلىعىنىڭ 50 پايىزى تولەنەدى. ال قىزمەتتىك كولىكتەردىڭ ەسىگىنە ءمور باسىلىپ، تۇراققا قويىلعان.