ءقازىر سەمەي قالاسىندا وتەتىن شەرۋگە قىزۋ دايىندىق جۇمىستارى جۇرۋدە، دەپ حابارلايدى Qamshy.kz اقپارات اگەنتتىگى Caravan.kz سايتىنا سىلتەمە جاساپ.

ونى جەرگىلىكتى پارتيا وكىلدەرى ۇيىمداستىرۋدا. قوعام بەلسەندىسى مايرا ابەنوۆنىڭ ايتۋىنشا، جەرگىلىكتى بيلىك بەيبىت شەرۋدى وتكىزۋگە ءوز رۇقساتىن بەرگەن كورىنەدى. ونى سەمەي قالاسى اكىمدىگىنىڭ ىشكى ساياسات باسقارماسى باستىعى ايدار سەرىكقازى ۇلى دا راستادى.

«سەمەي قالاسىنىڭ اتقارۋشى بيلىگى ميتينگ وتكىزۋگە كەلىسىم بەردى. ءبىز قالانىڭ ورتالىق الاڭىن سۇراعان ەدىك، ءبىراق بىزگە باسقا جەردى بەردى. ەندى شەرۋ سەمەيدىڭ «پولكوۆنيچيي» دەگەن ارالىندا «ولىمنەن دە مىقتى» دەگەن ەسكەرتىكىش جانىندا وتەدى»، - دەدى مايرا ابەنوۆا.

سەمەي بيلىگى ورتالىق الاڭدا قۇرىلىس جۇمىستارى ءجۇرىپ جاتقاندىقتان ارالدا وتكىزۋدى ۇسىنىپتى. ال وتەتىن ميتينگىدە ەلدى قوس بۇيىردەن قىسىپ بارا جاتقان قىمباتشىلىق ماسەلەسى مەن الەۋمەتتىك تاقىرىپ ءسوز بولماق. پارتيا مۇشەسىنىڭ ايتۋىنشا، سەمەيدە اسىرەسە بەنزين تاپشىلىعى مەن كومىر ماسەلەسى حالىققا اۋىر تيۋدە.

«ءبارى قىمبات، كومىر تاپشىلىعى جىلدا قىس مەزگىلىندە قايتالانادى. بۇل ۇنەمى قولدان جاسالادى. جىلۋ كەرەك بولعان سوڭ قىمبات بولسا دا الاسىڭ، امال قانشا»،- دەدى م. ابەنوۆا.

قوعام بەلسەندىلەرى ەلىمىزدىڭ بارلىق قالالارىندا ميتينگ وتكىزۋدى جوسپارلاعان. ايتسەدە، تەك سەمەي قالاسىندا عانا بيلىك تاراپىنان رۇقسات بەرىلىپتى. پارتيا وكىلدەرى بيلىك تومەنگى حالىقتىڭ مۇڭ زارىن ەستۋى ءتيىس. ازاماتتار ءوز پىكرىن ايتۋعا قۇقىلى، ال ساياسي شارانىڭ ەشقانداي ءقاۋپى جوق، دەپ سەندىرىپ وتىر.