ءراسىم بارىسىندا مەملەكەت باسشىسى نۇرسۇلتان نازاربايەۆقا اۋعانستان يسلام رەسپۋبليكاسىنىڭ توتەنشە جانە وكىلەتتى ەلشىسى كادام شاح شاحيم، پولشا رەسپۋبليكاسىنىڭ توتەنشە جانە وكىلەتتى ەلشىسى سەليم حازبييەۆيچ، كانادانىڭ توتەنشە جانە وكىلەتتى ەلشىسى نيكوليا برۋسسو، فينليانديا رەسپۋبليكاسىنىڭ توتەنشە جانە وكىلەتتى ەلشىسى ميككو كيۆيكوسكي، بەلگيا كورولدىگىنىڭ توتەنشە جانە وكىلەتتى ەلشىسى الەكسي دە كرومبريۋگحە دە پيكەنداەل، فرانسيا رەسپۋبليكاسىنىڭ توتەنشە جانە وكىلەتتى ەلشىسى فيليپپ مارتينە، ەستونيا رەسپۋبليكاسىنىڭ توتەنشە جانە وكىلەتتى ەلشىسى حەيتي مياەمەەس سەنىم گراموتاسىن تاپسىردى دەپ حابارلايدى Qamshy.kz اقپارات اگەنتتىگى اقوردا باسپا ءسوز قىزمەتىنە سىلتەمە وتىرىپ.

مەملەكەت باسشىسى راسىمگە قاتىسۋشىلارعا ارنالعان سوزىندە ولاردىڭ ديپلوماتيالىق ميسسيالارى قازاقستاننىڭ جاڭا دامۋ كەزەڭىنە تۇسپا-تۇس كەلىپ وتىرعانىن اتاپ ءوتتى.

– ءبىز قازاقستاننىڭ ءۇشىنشى جاڭعىرۋىن ىسكە اسىرۋعا كىرىستىك. «رۋحاني جاڭعىرۋ» اتتى اۋقىمدى باعدارلاما ءاربىر ازاماتىمىز ءۇشىن ەرەكشە مانگە يە بولۋدا، – دەدى قازاقستان پرەزيدەنتى.

نۇرسۇلتان نازاربايەۆ قازاقستانعا ەكونوميكالىق جانە يميدجدىك تۇرعىدان وڭ اسەرى بولعان استانادا وتكەن ءبىرقاتار حالىقارالىق ءىس-شارالاردىڭ ناتيجەلەرىنە توقتالدى. اتاپ ايتقاندا، حالىقارالىق «ەكسپو-2017» مامانداندىرىلعان كورمەسى، شانحاي ىنتىماقتاستىق ۇيىمىنىڭ ءسامميتى، استاناداعى تومەن بايىتىلعان ۋران بانكىنىڭ اشىلۋى جانە يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءسامميتى ءوتتى.

مەملەكەت باسشىسى قازاقستاننىڭ بۇۇ-نىڭ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە جاھاندىق بەيبىتشىلىك پەن قاۋىپسىزدىكتى قامتاماسىز ەتۋ ىسىنە قوسىپ وتىرعان ۇلەسىن ەرەكشە اتاپ ءوتتى.

قازاقستان پرەزيدەنتى ەلىمىزدىڭ شەتەلدىك ارىپتەستەرمەن ساۋدا-ەكونوميكالىق قارىم-قاتىناستاردى نىعايتۋعا مۇددەلى ەكەنىن ايتىپ، ينۆەستيسيالىق احۋالدى جاقسارتۋ ءۇشىن قابىلدانىپ جاتقان شارالارعا توقتالدى.

– قازاقستاندا ەۋرازيالىق ەكونوميكالىق وداققا، ورتالىق ازيا مەن جۇڭگو نارىعىنا شىعاتىن ينفراقۇرىلىم قالىپتاستى. ينۆەستورلارمەن جانە بيزنەسپەن ءوزارا ءتيىمدى ءىس-قيمىل ورناتۋ ماقساتىمەن «قازاق ينۆەست» جانە «قازاق ەكسپورت» ۇلتتىق كومپانيالارى قۇرىلدى. «استانا» حالىقارالىق قارجى ورتالىعى، «جاسىل» تەحنولوگيالاردى دامىتۋ جونىندەگى بۇۇ-نىڭ حالىقارالىق ورتالىعى جانە ءىت-ستارتاپتاردىڭ حالىقارالىق تەحنوپاركى جۇمىسىن باستاۋدا، – دەدى نۇرسۇلتان نازاربايەۆ.

مەملەكەت باسشىسى قازاقستان مەن اۋعانستان اراسىنداعى ءوزارا ساياسي ءىس-قيمىلدىڭ جاندانعانىنا نازار اۋداردى.

– بيىل ءبىز عاني مىرزامەن شانحاي ىنتىماقتاستىق ۇيىمى مەن يسلام ىنتىماقتاستىعى ۇيىمىنىڭ جيىندارىندا كەزدەستىك. ءوزارا ساۋدا كولەمى جارتى ميلليارد دوللارعا جەتىپ، الماتى مەن كابۋل قالالارىندا ساۋدا ۇيلەرى اشىلدى. ءبىز تەحنيكالىق جانە گۋمانيتارلىق كومەك كورسەتۋدى جالعاستىراتىن بولامىز. اۋعانستاننىڭ ءقاۋىپسىز ءارى ورنىقتى دامۋى – وڭىرىمىزدەگى بەيبىتشىلىكتىڭ، تۇراقتىلىق پەن وركەندەۋدىڭ كەپىلى، – دەدى قازاقستان پرەزيدەنتى.

نۇرسۇلتان نازاربايەۆ قازاقستان كانادامەن كوپ سالالى ىنتىماقتاستىقتى ودان ءارى نىعايتۋعا نيەتتى ەكەنىن ايتتى.

– وتكەن جىلى «G-20» سامميتىندەگى كەزدەسۋدە پرەمەر-مينيستر دجاستين تريۋدومەن ءتۇرلى سالاداعى بايلانىستاردى نىعايتۋ جونىندە ۋاعدالاستىق. بيىلعى ماۋسىم ايىندا استانادا «قازاقستان-كانادا» ىسكەرلىك كەڭەسىنىڭ ءوتۋى – سول ۋاعدالاستىقتىڭ ناقتى ىسكە اسىرىلۋىنىڭ كورىنىسى، – دەدى مەملەكەت باسشىسى.

قازاقستان پرەزيدەنتى بەلگيامەن اراداعى ءىس-قيمىل ءوزارا قۇرمەت پەن سەنىم قاعيداتتارىنا نەگىزدەلگەنىن اتاپ ءوتتى.

– مەنىڭ 2014 جىلعى قازانداعى بريۋسسەلگە جۇمىس ساپارىم جانە جوعارى مارتەبەلى كورول فيليپپەن وتكەن كەلىسسوزدەر ەكىجاقتى ءارى كوپجاقتى ىنتىماقتاستىقتىڭ وزەكتى ماسەلەلەرى جونىندە پىكىر الماسۋعا مۇمكىندىك بەردى. بەلگيا كاپيتالى مەن تەحنولوگيالارىن قازاقستان نارىعىنداعى بىرلەسكەن جوبالارعا بەلسەندى تۇردە تارتۋدى قۇپتايمىز، – دەدى نۇرسۇلتان نازاربايەۆ.

سونداي-اق، مەملەكەت باسشىسى پولشا رەسپۋبليكاسى ورتالىق جانە شىعىس ەۋروپاداعى قازاقستاننىڭ نەگىزگى سەرىكتەسى ەكەنىن ايتتى.

– 2016 جىلعى تامىزداعى ۆارشاۆاعا مەملەكەتتىك ساپارىمنىڭ جانە پولشا پرەزيدەنتى اندجەي دۋدانىڭ بيىلعى قىركۇيەك ايىنىڭ باسىنداعى قازاقستانعا مەملەكەتتىك ساپارىنىڭ قورىتىندىلارىن جوعارى باعالايمىن. وتكەن كەلىسسوزدەر قازاقستان مەن پولشا اراسىنداعى ديالوگتىڭ الەۋەتى زور ەكەنىن دالەلدەپ، ءوزارا ءتيىمدى كوپتەگەن جوبالارعا جول اشتى، – دەدى قازاقستان پرەزيدەنتى.

سونىمەن قاتار، مەملەكەت باسشىسى ەلىمىزدىڭ فينليانديامەن ءوزارا ءىس-قيمىل دەڭگەيىنىڭ جوعارى ەكەنىن اتاپ ءوتتى.

– ءبىزدىڭ ەل مەن فينليانديانى ءداستۇرلى دوستىق قاتىناستار مەن كوپ جىلدان بەرگى ىنتىماقتاستىق بايلانىستىرىپ كەلەدى. استانا مەن حەلسينكي اراسىندا تىكەلەي اۋە رەيسىنىڭ اشىلۋى ايتۋلى وقيعا بولدى. «جاسىل» تەحنولوگيالاردى دامىتۋ جونىندەگى ورتالىق قۇرىلدى، قازاقستاندا جاڭا فين كاسىپورىندارى اشىلۋدا. جوعارى جانە ۇكىمەتارالىق دەڭگەيدەگى ۋاعدالاستىقتاردىڭ ودان ءارى ىسكە اسىرىلۋىن قامتاماسىز ەتۋ قاجەت، – دەدى نۇرسۇلتان نازاربايەۆ.

مەملەكەت باسشىسى قازاقستان مەن فرانسيانىڭ ءوزارا ءتيىمدى ىنتىماقتاستىعىنا توقتالدى.

– ماشينا جاساۋ، عارىش، مەتاللۋرگيا، كولىك جانە باسقا دا سالالاردا تەحنولوگيالىق جوبالار ازىرلەندى. ەلدەرىمىزدىڭ يگىلىگى ءۇشىن فرانسيا پرەزيدەنتى ماكرونمەن جەمىستى بايلانىستى دامىتۋعا نيەتتىمىز، – دەدى قازاقستان پرەزيدەنتى.

نۇرسۇلتان نازاربايەۆ ەستونيامەن قارىم-قاتىناسىمىز قارقىندى دامىپ كەلە جاتقانىن اتاپ ءوتتى.

– ءبىز كولىك جانە ترانزيت، ەنەرگەتيكا، كوممۋنيكاسيا جانە تەحنولوگيالار سياقتى پەرسپەكتيۆالى باعىتتار بويىنشا بىرلەسە جۇمىس جاساۋعا ءازىرمىز. ەۋروپالىق وداقتا ءتوراعالىق ەتىپ وتىرعان ەستونيا باسشىلىعى قازاقستان مەن ەۋروپا سەرىكتەستىگىن ىلگەرىلەتۋگە ۇلەس قوسادى دەپ ويلايمىز، – دەدى مەملەكەت باسشىسى.

سوڭىندا نۇرسۇلتان نازاربايەۆ ەلشىلەردى قازاقستانداعى جاۋاپتى ديپلوماتيالىق قىزمەتتەرىنىڭ باستالۋىمەن تاعى دا قۇتتىقتاپ، جۇمىستارىنا تابىس تىلەدى.