جاڭا وتباسىن قۇرىپ، اق نەكەسىن قيىپ جاتقان جاستارعا نەكە تۋرالى بىرنەشە نۇسقاۋلىق ۇسىنعىمىز كەلەدى. ويتكەنى نەكە – كورىنگەننىڭ قولىندا ويىنشىق بولاتىن ەرمەك ەمەس. نەكەنىڭ دە ءوز سەرتى، ءوز زاڭى بار. سونىمەن نەكە دەگەن نە؟ 
نەكە – قىز بەن جىگىتتىڭ ماحابباتىنىڭ جەڭىسى. سەزىم مەن سەنىمنىڭ جەمىسى پىسكەن تۇستا ول نەكەگە كەلىپ ۇلاسادى. نەكەگە وتىرىپ، جۇبايلىق ءومىرىن قۇرمەتتەگەن ەرلى-زايىپتىلار جاماندىق اتاۋلىدان ءارقاشان الشاق بولادى. 
نەكە – ەڭ ءتاتتى سەزىمدەردىڭ توعىسى. ءبىرىن-بىرى سۇيگەن ەكى جاستىڭ ەكەۋى ەكى باعىتقا ەمەس، بىرلەسىپ ءبىر باعىتقا قاراۋىنان ارتىق جاراسىمدىلىق جوق. 
نەكە – جاڭا ءومىردىڭ باستاۋى، جامان قىلىقتىڭ توقتامى. تەنتەكتىك پەن بوسبەلبەۋلىك، ەركەلىك پەن جاۋاپسىزدىقتان قۇتىلاتىن شاق. 
نەكە – وزگەگە كوز سالۋ مەن ءسوز سالۋدى توقتاتۋ. مىڭ ادامنىڭ ىشىنەن تاڭداپ العان جارتىڭدى قالعان ءومىرىڭنىڭ سوڭىنا دەيىن باقىتتى قىلۋعا تىرىساسىڭ. نەكە ءۇشىنشى ادامعا قارسى. ءۇشىنشى بىرەۋ نەكەگە كيلىككەن كەزدە ۇرىس-كەرىس باستالادى. ۇرىس-كەرىس پەن قىزعانىشتىڭ سوڭى اجىراسۋعا كەلىپ تىرەلەدى. ايتكەنمەن نەكەنىڭ ماقساتى – اجىراسۋ ەمەس، ومىرلىك بىرگە بولۋ. 
نەكە – ءوز قامىڭدى عانا ويلاپ، وزىمشىلدىككە سالىنۋدى دوعارۋ. نەكە ەكى ادامنىڭ باستاماسىمەن قۇرىلادى. العاشىندا ەكەۋ، سوسىن كىشكەنتايلار كوبەيەدى. «مەن» ءسوزى «بىزگە» اۋىسىپ ەندىگى جەردە تەك وتاسىنىڭ قامىن عانا ويلاۋ كەرەك بولادى. ءوز جاعدايىڭدى عانا ويلاپ، وزىڭە عانا عاشىق كۇندەرىڭمەن قوشتاسقانىڭ ابزال. 
نەكە – الدەكىمگە كەرەك ەكەنىڭدى سەزىنۋ. ەندى سەن اق نەكەڭ ءۇشىن، ادال جارىڭ ءۇشىن جانە بولاشاق كىشكەنتاي جۇرەك يەلەرى ءۇشىن كەرەكسىڭ. ءوزىڭ ءۇشىن عانا ءومىر ءسۇرۋدى توقتاتىپ، وزگەلەردى ءوز ومىرىڭە ارلاستىر. ولارمەن تىعىز قارىم-قاتىناستا بولىپ، ولارعا ۇيرەن. 
نەكە – جاۋاپتىلىقتى سەزىنۋ. ەندى سەن ءوزىڭنىڭ زاڭدى نەكەڭ ءۇشىن، قارىم-قاتىناسىڭ مەن جارىڭ ءۇشىن جاۋاپتىسىڭ. ءوز جاۋاپكەرشىلىگىڭدى سەزىنە ءبىل.