زاڭدىق ساۋاتتىلىق – بۇگىنگى قوعام تالابى. ءوزىڭ ءومىر ءسۇرىپ جاتقان ەلدىڭ زاڭ ەرەجەلەرىن، قۇقىقتىق قاعيدالارىن بىلمەۋدەن كەز كەلگەن ازاماتتىڭ ۇتىلاتىنىن، كەيدە بىلمەستىكتەن ەسەسىن جىبەرىپ الاتىنىن بىلاي قويعاندا، قۇقىقتىق ساۋاتتىلىقتىڭ تومەندىگى – وتە ءقاۋىپتى دەر ەدىك. وسىنداي بىلمەستىكتىڭ سالدارىنان بولار، سوڭعى ۋاقىتتا جاڭالىقتار لەگىندە ءتۇرلى جاعا ۇستاتار، قىنجىلتار جايتتار تۋرالى اقپاراتتار ازايماي تۇر.
ادىلەتسىزدىككە تاپ بولىپ، قولىنا كىسەن سالىنعان ۇلىن قورعاۋ ءۇشىن شارق ۇرعان انا، ارى تاپتالىپ، زورلىققا تاپ بولعان قاراكوز قىزدار، جۇمىس بەرۋشىنىڭ قۇر سوزىنە سەنىپ، قاعاز جۇزىندە راسىمدەمەگەندىكتەن، جۇمىس بەرۋشىگە ەڭبەگىن جەگىزگەن قىز-جىگىتتەر، الاياقتارعا الدانىپ، جەر مەن باسپانا داۋىنىڭ ورتاسىندا قالعان حالىق، تاعىسىن تاعىلار. وسىنىڭ بارلىعى قوعامىمىزداعى قۇقىقتىق سانانىڭ ءالى دە بولسا تومەندىگىن، زاڭدىق ساۋاتتىلىقتىڭ جەتىسپەيتىندىگىن بايقاتسا كەرەك.
وسى تۇستا قازاق جۋرناليستيكاسىنا ەڭبەگى سىڭگەن ارداگەر جۋرناليست نۇرتىلەۋ يمانعالي ۇلى «ەۋرازيا» ءبىرىنشى ارناسىمەن بىرىگىپ، «زاڭ سويلەسىن!» دەپ اتالاتىن جوبانى قولعا الدى،- دەپ حابارلايدى Qamshy.kz اقپارات اگەنتتىگى. جوبانىڭ ماقساتى – حالىققا زاڭ ەرەجەلەرىن ءتۇسىندىرۋ، زاڭعا ساي قانداي قۇقىقتارى مەن مۇمكىندىكتەرى بار ەكەنىن ۇعىندىرۋ، بەلگىلى ءبىر داۋلى ماسەلەلەردەن زاڭ شەڭبەرىندە قالاي شىعۋعا بولاتىنىن كورسەتۋ. سەبەبى زاڭدى تۇبىرىنەن بىلمەيتىن ادام قوعامدا بەلگىلى ءبىر جايتتارعا تاپ بولعاندا، وزىنە سەنىمسىزدىك تانىتىپ، قارسى تاراپقا ءوزىن جىعىپ بەرەدى، جەڭىلىپ بارا جاتقانىن سەزسە، «اقشا ۇستاتىپ»، جەمقورلىققا سۇرلەۋ سالادى.
«مەنىڭ تەليەۆيزيادا 44 جىل جۇرگەندە تۇيگەنىم – ءبىز ءبارىن بىلەمىز. ءبىراق زاڭمەن تانىس ەمەسپىز. كەز كەلگەن تاۋەلسىز قازاق ەلىنىڭ ازاماتى ءوزىنىڭ زاڭمەن تانىس بولماسا، ءتۇپتىڭ تۇبىندە زاڭ ونىمەن تانىساتىنىن ەستەن شىعارماسا دەپ ويلايمىن. «زاڭ جانە زامان» (رەد.ەسك. – باعدارلامانى) دەپ تە اتاۋعا بولار ەدى. ءبىراق، قالاي بولعاندا دا ءبىز ەندىگى جەردە وزىمىزدەن بۇرىن تارتىپكە، ادىلەتكە جۇگىنۋدىڭ جالعىز جولى – زاڭدى سويلەتۋ. زاڭ سويلەسە – كەز كەلگەن كورەرمەنگە كومەك بولادى عوي دەگەن سەنىمىمىز بار.
وكىنىشكە وراي، قازىرگى قازاق تەليەۆيزياسىندا مۇنداي جانر كوپ ەمەس. ءقازىر نە كوپ – شوۋ كوپ، كونسەرتتىك باعدارلامالار كوپ. ال ەلگە كومەك بولاتىنداي، ەلمەن اقىلداساتىنداي، بولىپ جاتقان جاڭالىقتارعا ءۇنىڭدى قوساتىنداي پۋبليسيستيكالىق سۋرەتتەمەلەر، وچەركتەردىڭ ازايۋى قىنجىلتادى. ال بۇل جوبا وسىنداي ولقىلىقتاردىڭ ورنىن تولتىراتىنداي دۇنيە بولاتىنداي كورىنەدى ماعان»، - دەيدى جوبا جۇرگىزۋشىسى نۇرتىلەۋ يمانعالي ۇلى.
قازاق تىلىندەگى جاڭا تەلەونىم سيۋجەتتەر مەن ارنايى رەپورتاجدارعا قۇرىلىپ، جۋرناليستەر قوعامدا ورىن الىپ جاتقان ءىس جۇزىندەگى كەلەڭسىزدىكتەردى اشىپ كورسەتەدى. مۇنىمەن قاتار، «زاڭگەر كەڭەسى» ايدارىندا كەز كەلگەن قازاقستاندىق زاڭ سالاسىنداعى ءوزىن قىزىقتىرعان كوكەيكەستى سۇراقتارعا جاۋاپ الا الادى.
