بىلەتىندەر التىنبەك سارسەنباي ۇلى ستۋدەنت كەزىنەن كوكجايلاۋعا جاياۋ شىعۋدى داعدىعا اينالدىرعان دەسەدى. ول ىلعي دا مەدەۋ شاتقالىنان كوكجايلاۋعا اسىپ، الما-اراسان شاتقالىنا قاراي جاياۋ سەرۋەن جاساپ تۇرعان. ءتىپتى، رەسەيدە ەلشى قىزمەتىندە بولعاندا دا الماتىعا جولى تۇسكەن دەمالىسىندا الاتاۋدى اسىپ وتىرعان. ءومىرىنىڭ سوڭعى جىلدارىندا اپتاسىنا ءبىر رەت تاۋ اسىپ كەلۋدى ادەتكە اينالدىرعان ەكەن. جالعىز كوكجايلاۋ ەمەس، شالكودەگە، قايىڭسايعا، الاتاۋدىڭ اسەم تابيعاتىنا ءجيى سەرۋەن قۇرعان. ءتىپتى، 2005 جىلى التىنبەك سارسەنباي ۇلى اۋىلداستارىمەن جۇزدەسىپ: «ءبىر مۇراتىم – الىستان ايبارلانىپ كورىنەتىن لاباسى شىڭىنا شىعۋ. ءدام تارتسا، كەلەر جىلدىڭ جازىندا جۇزەگە اسىرساق»، – دەگەن ەكەن. الاشتىڭ ايبارلى التەكەڭى 2006-نىڭ جازىن كورە الماي كەتتى. 2006 جىلى 11 اقپاندا سۇلۋسايدا قاستاندىققا ۇشىراپ قازا تاپتى. الايدا لاباسى شىڭىن التەكەڭنىڭ ءىزباسارلارى بىرنەشە مارتە باعىندىرعان. التىنبەكتى ارداقتايتىن حالقى قۇمبەلدىڭ ەتەگىندەگى ونىڭ سوقپاعىمەن دە جىل سايىن جۇرەدى.
بۇگىن دە مەملەكەت جانە قوعام قايراتكەرى التىنبەك سارسەنباي ۇلىنىڭ 55 جاسقا تولار تۋعان كۇنىنە وراي، مارقۇمنىڭ ەسكە الۋشى دوستارى، شاكىرتتەرى، ءىزباسارلارى «التىنبەك سوقپاعىمەن» ءجۇرىپ ءوتتى. مارقۇمنىڭ تۋعان كۇنى 12 قىركۇيەكتە ءقابىر باسىندا قۇران باعىشتالعان بولاتىن.
جينالعان 60 شاقتى ادام بۇگىن تاڭعى وندا مەدەۋ شاتقالىنان قۇمبەل تاۋىن بەتكە الىپ كوكجايلاۋعا قاراي استى. 15 شاقىرىمعا سوزىلاتىن جولدى جۇرگىنشىلەر 4 ساعاتتا ءجۇرىپ ءوتتى. ەسكە الۋشىلارعا جولدىڭ سوڭى بولعان كازاچكا شاتقالىندا اس بەرىلدى. التىنبەكتىڭ جولىمەن ءجۇرىپ وتكەندەر اراسىندا 5 جاستاعى بالاتىن 85 جاستاعى قارياعا دەيىن بار.
اس سوڭىندا كەلۋشىلەرگە العىس ايتقان رىسبەك سارسەنباي ۇلى: «تاۋ ادامدى شىڭدايدى. كۇش-قۋات بەرەدى. قيىندىقتا جەڭۋگە ۇيرەتەدى. ءبىر جاعىنان العاندا التەكەڭنىڭ ءومىرى وسىنداي بۇرالاڭ، ورلى-ەڭىستى، قۇز-قيالى، جارتاستى، شىڭدى بولدى. قىسقا عانا ءومىر سۇرسە دە سونىڭ ءبارىن كوردى. سونىڭ بارىنەن ءوتتى. تاۋ ەشقاشان الاسارمايدى. تاۋ الىستاعان سايىن بيىكتەي تۇسەدى. التەكەڭ دە سونداي، ەلى ءۇشىن ول ۇلكەن تاۋ. سىزدەر ءۇشىن دە سولاي. التىنبەكتىڭ ويى الاسارمايدى، ءسوزى مەن ماقساتى، قۇرعان جوسپارى الاسارمايدى. سونىڭ ءبارى ىسكە اسۋى كەرەك. ونى ىسكە اسىراتىن سىزدەر مەن بىزدەرمىز. التەكەڭ ءبىز ءۇشىن ءومىر ءسۇردى. حالىق ءۇشىن، مىناۋ ۇرپاق ءۇشىن جانىن بەردى. ەرتەڭگى كۇنى بالالارىمنىڭ كوزىنە تۋرا قاراي الاتىن بولايىن، سولاردىڭ الدىندا ۇيالمايتىن بولايىن دەدى. ارىن-نامىسىن جوعارى قويدى. سول ءۇشىن دە قۇربان بولعان شىعار. وسى ەلىمىزدىڭ بۇگىنى جاقسى بولسىن، ەرتەڭى ودان دا جاقسى بولسىن، بالالارىمىز الاڭسىز، ۋايىمسىز، قايعىسىز، قيىندىقسىز، قياناتسىز ءبىر مامىراجاي ەلدە، قوعامدا، مەملەكەتتە ءومىر سۇرەتىن بولسىن دەپ ارماندادى. وسىنى قالادى. ءار قازاقتىڭ جاقسى ءومىر سۇرگەنىن، بىر-بىرىنە كۇلىپ قاراعانىن، بىر-بىرىنە جاقسى ءسوز ايتقانىن قالاعان ەدى. التەكەڭنىڭ ءىسىن ەندى جاستار جالعاستىرادى. ماعجان ايتقانداي «مەن دە وسى جاستارعا سەنەمىن». التەكەڭ بەكەر ءومىر سۇرگەن جوق، ءومىرى بەكەر وتكەن جوق. ول جالعاسىن تابادى»، - دەپ اياقتادى ءوز ءسوزىن.
نۇرعالي نۇرتاي.
