دەموكراتتار باراك وباما، بيل كلينتون مەن دجيممي كارتەر جانە رەسپۋبليكاندىقتار دجوردج گەربەرت بۋش جانە دجوردج بۋش باس قوستى.
اقش-تىڭ ءالى دە ءتىرى، بۇرىنعى بەس پرەزيدەنتى 2013 جىلدان بەرى ءبىرىنشى رەت باس قوستى، ونىڭ تۇيتكىلى امەريكا مەن كاريبتەردەگى داۋىلدان زارداپ شەگۋشىلەرگە قارجىلاي كومەك كورسەتۋ كەرەكتىگى بولدى.
بۇرىندارى پرەزيدەنت قىزمەتىن اتقارعان بەس ساياساتكەر وتانداستارىنا كومەك قولىن ۇسىنۋ ءۇشىن تەحاستا سەنبىدە تۇندە بولعان One America Appeal كونسەرتىندە جينالدى.
بۇل كەزدەسۋگە دونالد ترامپ كەلمەدى، ول جاي عانا بەينە جازبا جىبەرىپ «امەريكانىڭ حالىققا قىزمەت ەتكەن سىيلى ازاماتتارىنا» العىسىن ءبىلدىردى.
اق ءۇي پرەزيدەنت دونالد ترامپ بۇل كەزدەسۋگە شاقىرىلۋ-شاقىرىلماۋىنا بايلانىستى سۇراققا جاۋاپ بەرمەدى.
7 قىركۇيەكتەن باستالىپ، كومەك كورسەتۋگە جينالعان قارجى ءقازىردىڭ وزىندە 31 ميلليون اقش دوللارىنا جەتتى.
باراك وباما: «بۇرىنعى پرەزيدەنتتەر رەتىندە ءبىز زارداپ شەككەندەردىڭ اياعىنان تۇرىپ كەتۋىنە كومەكتەسكىمىز كەلەدى» دەدى.
كلينتون مىرزا بىلاي دەدى: «ادامدار زارداپ شەگىپ جاتىر، ءبىراق ءبىر تەحاستىق ايتقانداي، ءبىزدىڭ ماحابباتىمىز بۇكىل تەحاستاعى سۋدان دا كوپ».
بۇرىنعى پرەزيدەنتتەر تەحاستا بولعان Harvey داۋىلىنان كەيىن-اق باس قوسۋدى جوسپارلاعان بولاتىن.
كونسەرتتە لەدي گاگا جانە ءتورت رەت گرەممي سىيلىعىن ۇتىپ العان ليلي لوۆەتت سىندى مۋزىكانتتار ونەر كورسەتتى.
ال ءوزى كەلە الماي قالعان دونالد ترامپ بەينە جازبادا بىلاي دەدى: «جينالعان قاۋىم ءبىزدىڭ قۇداي استىنداعى ۇيىمداسقان ناعىز ءبىر حالىق ەكەندىگىمىزدى كورسەتەدى جانە بۇل ءبىزدىڭ قۇندىلىقتارىمىز بەن ءبىر بىرىمىزگە دەگەن ادالدىعىمىزدى اڭعارتادى» دەدى.
