ەگەردە ءسان ۇلگىسىن كورسەتىپ جاتقان ءىس-شاراعا قاتىسىپ نەمەسە وسى ىسپەتتەس باعدارلامانى كورە قالساڭىز، قاباعىنا قار جاۋعان سانبيكەلەردى كورەسىز. ءسىز سول كەزدە ولاردىڭ نەلىكتەن كۇلىمسىرەمەيتىندىگى جونىندە ويلانىپ كوردىڭىز بە؟
الماتىدا 19-21 قازان ارالىعىندا وتكەن Mercedes-Benz Fashion Week 2017-2018، VIII حالىقارالىق ءسان اپتالىعى وتكەن بولاتىن. بۇل شاراعا بەلسەنە قاتىسقان ءسان فوتوگرافى يان رەي سانبيكەلەردىڭ نەلىكتەن كۇلىمسىرەمەيتىندىگى جونىندەگى سۇراققا جاۋاپ بەردى.
ونىڭ ايتۋىنشا، «جۇرتتىڭ نازارى سانبيكەنىڭ كەرەمەت كۇلكىسى مەن ادەمى تىستەرىنە ەمەس، ءسان ۇلگىسىنە، ۇستىندەگى كيىمگە ءتۇسۋى كەرەك. ونىڭ ۇستىنە ءسان كورسەتەتىن جەر قاشاندا كاسىبي ورىن، سوندىقتان سانبيكەلەردىڭ كۇلىمسىرەمەۋى زاڭدى نارسە».
«سانبيكەلەر نەگە كۇلىمسىرەمەيدى؟» دەگەن سۇراققا بۇدان دا وزگە دە قىزىقتى جاۋاپتار بار. ولاردىڭ ءبىرى، «سانبيكەلەردىڭ قارىندارى اش». ارينە بۇل ازىلمەن ايتىلاتىن جاۋاپتاردىڭ ءبىرى نەمەسە ولار كۇيزەلىسكە ۇشىراعان دەپ جاتادى.
الايدا، 1990 جىلدارى پوديۋمداعى سانبيكەلەردىڭ ەموسيالارى باستى نازار اۋدارۋشى ءادىس بولسا، قازىردە بۇل ءۇردىس كەرىسىنشە بولىپ كەلەدى. يان رەي مىرزا اتاپ وتكەندەي، سانبيكەلەرگە اۋدارىلاتىن نازار بۇگىندى ءتىپتى تومەن بولۋى كەرەك.
«سانبيكەلەردىڭ بەتتەرى تابيعي ەتىپ ارلەنىپ، ءتىپتى وپا-دالاپ جاقپاي-اق ساحناعا شىعارىلۋى سوڭعى كەزدە ەتەك الىپ كەلە جاتقان قۇبىلىس. جۇرت ارۋلاردىڭ سۇلۋلىعىنا سۇقتانباي، ۇستىندەگى شۇبەرەككە نازار اۋدارۋى باستى تالاپ».
ناقتى مىسال كەلتىرە كەتسەك، 2005 جىلى دجون گاليانو دەگەن تانىمال ديزاينەر ءوز توپتاماسىن ەرتەگى كەيىپكەرلەرى ارقىلى جۇرتتىڭ نازارىنا ۇسىنعان بولاتىن. ارينە، الىپ ادامدار، ەگىزدەر جانە وزگە دە كەيىپكەرلەر قاتىسقان ءسان ساۋىعى حالىققا قاتتى ۇناعان. سول كەزدە سانبيكەلەر جينالعان قاۋىمعا قاراپ كۇلىمسىرەپ، باسقا دا قىلىقتار كورسەتكەن. الايدا، ءسان سىنشىلارى مۇنى قۇپتاماي، جۇرت كوڭىلىنىڭ كورسەتىلىپ وتىرعان توپتاماعا ەمەس، سانبيكەلەرگە اۋىپ كەتكەندىگىن ايتقان بولاتىن.
پاريج ءسان سينديكاتىنىڭ پرەزيدەنتى ديدە گريۋمباح: «ەگەر سانبيكە كۇلىمسىرەمەسە، ادەتتە، ول جۇرتتىڭ قىزىعۋشىلىعىن تۋدىرمايدى. سوندىقتان كورەرمەن تەك كيىمگە عانا كوڭىل بولەدى. ال ەگەردە سانبيكەلەر كۇلىمسىرەيتىن بولسا، وندا ادامدار ونىڭ كۇلكىسىنە، تۇر-الپەتىنە قاراپ وتىرىپ، كيىم ۇلگىسى جونىندە ۇمىتىپ كەتۋى ىقتيمال» دەيدى.
