قازاقستان ىشكى ىستەر مينيسترلىگى ۋكراينادا ۇستالعان قازاقستاندىق بلوگەر جانار احمەتكە (احمەتوۆا) حالىقارالىق ىزدەۋ جاريالانعانىن راستادى دەپ حابارلايدى Qamshy.kz اقپارات اگەنتتىگى azattyq.org-قا سىلتەمە جاساي وتىرىپ.

مەملەكەتتىك ءتيىل جانە اقپارات دەپارتامەنتىنىڭ ديرەكتورى الماس سادۋبايەۆ جانار احمەتتىڭ بۇعان دەيىن قازاقستاندا "الاياقتىق" ايىبىمەن سوتتالعانىن ايتقان بولاتىن.

ج.احمەتوۆا 2005 جىلدىڭ ناۋرىزىنان 2008 جىلدىڭ قازانىنا دەيىن ازاماتتاردى الداپ، پايىزدىق ۇستەمەمەن قايتاراتىنىن ايتىپ، 50 ميلليون تەڭگەدەن استام قارجىسىن يەمدەنگەنى انىقتالعان

2010 جىلى تامىزدا سوت جانار احمەتتىڭ جازاسىن وتەۋدى ونىڭ ۇلى ون ءتورت جاسقا تولاتىن 2021 جىلدىڭ 5 قاراشاسىنا دەيىن كەيىنگە قالدىرعان.

بيىل كوكتەمدە ۋكرايناعا قاشىپ بارعان جانار احمەت 21 قازاندا كييەۆ تۇبىندە ۇستالعان. جانار احمەتتىڭ ادۆوكاتى ۆلاديسلاۆ گريششەنكو قازاقستان وعان قىلمىستىق كودەكستىڭ 177-بابى ("الاياقتىق") بويىنشا ينتەرپولمەن ىزدەۋ جاريالاپ، سول بويىنشا ۇستالعانىن، ءبىراق ىزدەۋ جاريالانعانى تۋرالى قۇجاتتى ءالى كورسەتپەگەنىن ايتقان.

جانار احمەتتى قازاقستانعا ەكستراديسيالاۋ ماسەلەسى شەشىلگەنگە دەيىنگى بۇلتارتپاۋ شاراسىن بەلگىلەيتىن سوت وتىرىسى 24 قازاندا جالعاسادى.

ۆلاديسلاۆ گريششەنكو جانار احمەت ۋكرايناعا بارعان سوڭ بىردەن وزىنە ساياسي باسپانا بەرۋ تۋرالى ءوتىنىش بىلدىرگەنىن، ونىڭ ءالى قاراۋدا جاتقانىن ايتادى.

جانار احمەت وپپوزيسيالىق "تريبۋنا. ساياسي قالام" گازەتىندە ماقالا جازىپ تۇرعان جانە الەۋمەتتىك جەلىلەر ارقىلى قازاقستاندىق بيلىكتىڭ اتىنا سىني پىكىرلەردى جاريالاپ، تاراتاتىن بەلسەندى رەتىندە تانىلعان.