جاپوندىق «NHK» تەلەراديوكومپانياسى ءوز كورەرمەندەرىنە قازاقستان جانە «استانا ەكسپو-2017» حالىقارالىق كورمەسى جايىندا 110 مينۋتتىق باعدارلاما تاراتتى دەپ حابارلايدى Qamshy.kz اقپارات اگەنتتىگى.
ارنايى جوبانىڭ اۆتورى، تانىمال جاپوندىق جۋرناليست – وكوشي كەنسۋكە. وسى جىلدىڭ شىلدە ايىندا قازاقستانعا جاپون تەلەارناسىنىڭ ءتۇسىرىلىم توبى كەلىپ، ەلىمىزدىڭ – اتىراۋ، قاراعاندى، سەمەي، اقتاۋ، الماتى جانە ت.ب وبلىستارىنا ىسساپارمەن بارىپ قايتقان بولاتىن.
اتالمىش جوبادا جاپوندىق ارىپتەستەر مەملەكەتىمىزدىڭ دامۋى جايىندا، قازاقستاندىقتاردىڭ تۇرمىس-تىرشىلىگىن، مادەنيەتى مەن ءسالت-داستۇرىن كەڭىنەن كورسەتتى. جاپون جۋرناليستەرىنىڭ ايتۋىنشا، بۇل قازاقستان جايلى جاپون تەليەۆيزياسى تاريحىنداعى كورسەتىلگەن ەڭ العاشقى دا اۋقىمدى باعدارلاما.
سونداي-اق جوبا اياسىندا، باعدارلامانىڭ تۇتاستاي ءبىر بولىگى «QAZAQSTAN» رەسپۋبليكالىق تەلەراديوكورپوراسياسىنىڭ قىزمەتىنە ارنالعان، اسىرەسە ۇلتتىق ارناداعى وزگەرىستەردى ەرەكشە اتاپ وتكەن. جوبا جەتەكشىسى وكوشي كەنسۋكە استاناعا ءوزى ارنايى كەلىپ، شىعارماشىلىق توپپەن ءبىرقاتار باعدارلامالاردىڭ تۇسىرىلىمىنە قاتىسىپ، باسقارما ءتوراعاسى ەرلان قاريننەن سۇحبات الدى. جاپوندىق ارىپتەستەردى تەلەراديوكورپوراسيانىڭ جۇمىس بارىسى، تەلەارناداعى وزگەرىستەر، بىرەگەي فورماتتا شىققان جاڭا دا، تىڭ جوبالار ءتانتى ەتتى.
ايتا كەتەيىك، بۇل باستاما «NHK» جانە «QAZAQSTAN» تەلەراديوكورپوراسيالارى اراسىنداعى ىنتىماقتاستىق ورناتۋداعى ەڭ العاشقى قادام بولماق.
سونىمەن قاتار، وسى جىلدىڭ قازان ايىندا تەلەراديوكورپوراسيانىڭ دەلەگاسياسى جاپونياعا ءىسساپارعا بارۋدى جوسپارلاپ وتىر. وندا، باسقارما ءتوراعاسى ەرلان قارين «NHK» تەلەراديوكومپانياسىنىڭ پرەزيدەنتى ريوچي ۋەدامەن كەزدەسەدى.
ءىسساپار بارىسىندا جاپوندىق ارىپتەستەرمەن قارىم-قاتىناس ورناتىپ، ءتۇسىرىلىم الاڭدارىنا بارىپ، كونتەنت پەن تاجىريبە الماسۋ مۇمكىندىگىن قاراستىرادى.
