اقمولا وبلىسىنىڭ اكىمى مالىك مىرزالين اتباسار قالاسىن قايتا سۋ باسۋ ءقاۋپى تۋرالى ماسەلەگە قاتىستى پىكىر ءبىلدىردى، — دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

«دايىندىق جۇمىستارى ءجۇرىپ جاتىر — وزەن ارناسىن تازالاۋ جانە تۇزەتۋ بويىنشا ەداۋىر جۇمىستار اتقارىلدى.  اتباساردا ەكى ۇلكەن كوپىر بار — ءبىرى تەمىر جولعا، ەكىنشىسى - اۆتوكولىككە ارنالعان. ولارعا جاقىن ورنالاسقان ۇلكەن اۋماق تازالاندى. ەكىنشىدەن، قۇبىرلاردى اۋىستىرىپ جاتىرمىز، 30 قاراشاعا دەيىن بۇل جۇمىستار اياقتالادى. ونىڭ ۇستىنە، اتباسار بوگەتىنە جەكە ادامداردىڭ ەسەبىنەن جوندەۋ جۇمىستارى جۇرگىزىلىپ جاتىر، وعان بيۋدجەتتەن ەش قاراجات جۇمسالعان جوق. اتباسارداعى شارۋاشىلىقتار تەحنيكاسىنىڭ كومەگىمەن بارلىق تۇرعىندار بوگەتتى قالپىنا كەلتىرىپ جاتىر»، — دەدى مالىك مىرزالين.

الايدا، ءوڭىر باسشىسى اتباسارعا بەتوننان سالىنعان وندىرىستىك بوگەتتىڭ قاجەت ەكەنىن باسا ايتتى. «ءسوزسىز، اتباسارعا قاۋقارلى بوگەت قاجەت. بىزدە ازىرگە توپىراق ءۇيىندىسى عانا بار. اتباسارعا وندىرىستىك بوگەت تۇرعىزۋ بويىنشا جۇمىس ىستەپ جاتىرمىز. وعان ۋاقىت قاجەت. جوبالىق-سمەتالىق قۇجاتتاماسىن ازىرلەۋگە وبلىستىق بيۋدجەتتەن 50 ملن تەڭگە بولدىك. ساراپتاما وتكەن سوڭ، كەلەسى جىلى وندىرىستىك بوگەت قۇرىلىسىنا كىرىسەمىز. 2018 جىلى توپىراق ءۇيىندىسىن قۇرامىز، ال 2019 جىلى اتباساردى تاسقىن سۋدان وندىرىستىك بوگەت قورعايتىن بولادى. تۇرعىندار بىزگە سەنۋى قاجەت، ال اكىمدىك ارقانى كەڭگە سالماي، تىنىمسىز ەڭبەك ەتۋى كەرەك»، — دەدى مالىك مىرزالين.

بۇعان دەيىن ق ر ۇكىمەتى وتىرىسىندا ق ر ءىىم باسشىسى قالمۇحانبەت قاسىموۆ اتباساردى قايتا سۋ باسۋ ءقاۋپى بار ەكەنىن مالىمدەگەن ەدى.