«قازاقستان ۇكىمەتىنىڭ وكىلى پاريجدەن 65 ميلليون ەۋروعا ەليتالى پاتەر ساتىپ الدى. بۇل فرانسيا استاناسىندا وسى جىلى جاسالعان ەڭ قىمبات ساۋدا-ساتتىق بولدى». وسىنداي اقپارات ەليتالى جىلجىمايتىن مۇلىك ساۋداسىمەن اينالىساتىن مansionglobal حالىقارالىق اگەنتتىگىنىڭ سايتىندا جاريالانعان، دەپ حابارلايدى Qamshy.kz اقپارات اگەنتتىگى استانا تەلەارناسىنا سىلتەمە جاساپ.

پاتەر ايگىلى ەليسەي الاڭىنا جاقىن جەردە، باي-ماناپتار تۇراتىن اۋداندا ورنالاسقان. اۋماعى - 1200 شارشى مەتر. 5 جاتىن بولمەسى، سپا-ايماق، قىزمەتشىلەر مەن كۇزەتكە ارنالعان بولەك ورىندار قاراستىرىلعان. اسىرەسە، قاۋىپسىزدىگى كەرەمەت. تەرەزەلەرىنەن وق وتپەيدى، جانە باس ساۋعالايتىن ارنايى جەر دە بار.

ساۋدانىڭ بولعانىن ارنا تىلشىلەرىنە بەلگيالىق ريەلتور دە راستاعان.

"جىلجىمايتىن مۇلىك رەسەيلىك وليگارحقا تيەسىلى ەدى. ونى جەكە كەزدەسۋلەر وتكىزۋگە قولايلى ەتۋ ءۇشىن، 100 ملن ەۋروداي قارجى قۇيدى. ساتىپ الۋشى - قازاقستان ۇكىمەتىنىڭ وكىلى. پاتەردىڭ نارىقتاعى باعاسى شارشى مەترى ءۇشىن كەم دەگەندە 20 مىڭ ەۋرو. ياعني ءۇيدىڭ قۇنى 24 ميلليون ەۋرونى قۇرايدى. قوسىمشا كۇشەيتۋلەر، جاڭعىرتۋلار مەن كولىكتەردىڭ قۇنى ءارى كەتسە 5 ميلليون ەۋروعا ءتۇسۋى مۇمكىن"، - دەپ پىكىر بىلدىرگەن بەلگيالىق ريەلتور يگناس ميۋۆيسسەن.

جىلدىڭ ەم قىمبات ساۋداسى تۋرالى مالىمەت ءبىرقاتار باسىلىمداردا جاريالانعان. ال، قارجى ءمينيسترى مەن سىرتقى ىستەر مينيسترلىگىنىڭ رەسمي وكىلى بۇل اقپاراتتان حابارسىز بولىپ شىقتى. ءتىپتى ۆەدومستۆولار ءبىر بىرىنە سىلتەدى.

"بۇل سۇراقتى سىرتقى ىستەر مينيسترلىگىنىڭ وكىلىنە قويىپ تۇرعاندارىڭىزعا تاڭ قالدىم. مەن بۇل سۇراق مينيسترلىكتىڭ قۇزىرەتىندە ەمەس دەپ سەنىممەن جاۋاپ بەرە الامىن. سىرتقى ىستەر مينيسترلىگى قازاقستان ۇكىمەتىنىڭ ارەكەتىنە قاتىستى تۇسىنىك بەرە المايدى"، - دەيدى ق ر ءسىم رەسمي وكىلى ءانۋار جايناقوۆ.