الماتىدا ءبىرقاتار كوشەلەردىڭ اتاۋلارى قازاقتىڭ رۋحتى باتىرلارى مەن بەلدى تۇلعالارىنىڭ ەسىمىمەن اۋىساتىنى جايلى حابارلاعانبىز. ەندىگى جەردە كەنەسارى حان مەن الاش ارىستارى باستاعان جۇمەكەن ناجىمەدەنوۆ، اقسەلەۋ سەيدىمبەك، ءازىلحان نۇرشايىقوۆ، گەرولد بەلگەر، قۇدايبەرگەن سۇلتانبايەۆ، تۇمانباي مولداعالييەۆ، قادىر مىرزالييەۆ، ءامينا ءومىرزاقوۆا، ەرمەك سەركەبايەۆ، حاديشا بوكەيەۆا، ماقاش ءتاتىموۆ، ت.ب. ۇلت زيالىلارىنىڭ ەسىمدەرى الماتى كوشەلەرىن رۋحتاندىرىپ تۇراتىن بولادى.

ال وزبەكستاندىق vesti.uz پورتالى قازاقتىڭ ەڭ سوڭعى حانى بولعان كەنەسارى حاننىڭ اتىن الماتى كوشەلەرىنىڭ بىرىنە بەرۋ – ناعىز باسسىزدىق دەيدى. سەبەبى، كەنەسارى ۇلت ساتقىنى، بانديت بولعان ەكەن.

Vesti.uz سايتىنىڭ مالىمەتىنشە، كەنەسارى حان 19 عاسىردا رەسەيدە ادام ۇرلاپ، ولاردى تاشكەنت، بۇحار، قوقان بازارلارىنا قۇلدىققا ساتقان. ال قازاق جۇزدەرى رەسەيگە قوسىلعان سوڭ ونىڭ «كاسىبىنە» نۇكتە قويىلعان. رەسەي پولكوۆنيگىنىڭ پوگونىن العان سوڭ ساتقىندىق جولىن جالعاستىرىپ، ۇرلاۋ، توناۋ، ءولتىرۋ سىندى ارەكەتتەرگە بارعان. ءسويتىپ جۇرگەندە قىرعىز ماناپتارىنىڭ قولىنا تۇسەدى. قىرعىز ماناپتارى كەنەسارىنىڭ وتباسىنان باستاپ، ءوزىنىڭ دە دەنە مۇشەلەرىن بولشەكتەپ، باسىن كەسىپ العان. كەسىلگەن باسىن ومسكتەگى وتىرىستا باتىس ءسىبىر گۋبەرناتورى گورچاكوۆقا سىي رەتىندە تابىستادى. ال ءبانديتتىڭ ءقابىرى مەن باس سۇيەگى ءالى كۇنگە دەيىن تابىلمادى. بۇگىندە ساتقىن مەن ءبانديتتى قازاق بيلىگى «ەركىندىك ءۇشىن كۇرەسكەن باتىر» دەپ باعالاپ وتىر.

وزبەكستاندىق اقپارات قۇرالدارى جازعان ماقالا مازمۇنى وسىنداي. اسكەري قولباسشى، قازاق حالقىنىڭ 1837 – 1847 جىلدارداعى ۇلت-ازاتتىق قوزعالىسىنىڭ كوسەمى، قازاق حاندىعىنىڭ سوڭعى حانى كەنەسارى جايلى جوعارىداعىداي توپشىلادى.