-بارەكەلدى، قوجەكە!
-دەپۋتات دەپ وسىنى ايت، ءاپ، بارەكەلدى!
-كوپ جاسا، باقىتتى بول،-دەپ جاتىر حالىق، قوشقارباي قوجابايەۆيچتى قۇتتىقتاپ. حالىقتىڭ قوشەمەتىنە كەنەلىپ، اتى اسپانداتىپ كەتەدى دەپ قوشقارباي ويلاماسا كەرەك. نە بولىپ كەتتى ءوزى؟ بەس جىل بويى حالىق قالاۋلىسى بولىپ ءجۇرىپ، حالىقتان قوشەمەت كورە الماعان دەپۋتات، ءبىر كۇندە حالىقتىڭ جاناشىرىنا ۇقساتىلىپ، اتى بۇكىل قازاق ماقتان تۇتاتىن ازاماتقا اينالادى دەپ ويلادى ما؟ جوق. نەگىزى نەدەن باستالىپ ەدى ءوزى؟ 
ء-اي، قوجەكە، باسىڭىزدا ىسىك بار، الدىرماسا بولمايدى، ءالى دە قالشىلداعان 25 تەگى جاس جىگىتتەيسىز، باسىڭىزداعى ىسىكتى الماساق ميىڭىزىڭ ءبارىن الىپ كەتەدى، ويلانىڭىز،-دەگەن تۇعىن ستەپان اداموۆيچ، قوشقاربايدىڭ باسىنداعى ىسىگىن كورىپ. سوندا دا، دەپۋتاتتىعىنان ايرىلىپ قالامىن دەگەن وي، قوشقاربايعا مازا بەرمەي، باسىنداعى ىسىكتى دە ەلەڭ ەتپەگەن ەدى. ۋاقىتتى وتكىزىپ السا كەرەك. كەنەت دەپۋتاتتىڭ باسى قاتتى اۋىرىپ، ستەپان ءاداموۆيچتىڭ الدىنا تاعى كەلدى.
-نۋ، كوجەكە، ىسىك ميىڭىزعا تاراپ كەتكەن، ەندى ميىڭىزدى قوسا الىپ تاستاۋ كەرەك!
-نە، نە اداموۆيچ، بۇلاي بولمايدى، دەپۋتاتتىڭ ميى التىن. ول حالىقتىكى، ماعان ىسىكتى كەتىرەتىن ءدارى بەر،-دەدى قوجەكە قارسىلاسىپ.
-كوجەكە، سىزگە ايتارىم، ءسىزدىڭ ىسىگىڭىزدى الىپ تاستاعانمەن ميىڭىز قايتا جۇمىس ىستەي مە ىستەمەيمە بەلگىسىز، مەنىڭ ۇسىنىسىم بار، ەگەر قابىل ەتسەڭىز....
-ايتا بەر، ايتا بەر..
-مەنىڭشە ميىڭىزدى اۋىستىرۋ كەرەك سياقتى. ءقازىر مەديسينا دامىعان، مەنىڭ كلينيكامدا وتانىڭ ءتۇر-تۇرى جاسالادى، كەلىسسەڭىز، سۋداي جاپ-جاڭا مي سالىپ بەرەمىز.
-ميىمدى اۋىستىراسىڭدار ما؟ تاعى نە اۋىستىرۋعا بولادى سوندا؟،-دەدى قوجەكە تاڭعالىپ.
-مەنىڭ كلينيكامدا ءبارىن، كوز دەسەڭىز كوزدى، قول، اياق، ءتىپتى باس پەن جىنىس مۇشەڭىزدى دە اۋىستىرىپ بەرەمىز، تەك قالاساڭىز بولدى، قوجەكە.
ء-تايت، ءتايت، جاقسى ەكەن، نو جىنىس مۇشەنى اۋىستىرمايمىن، ەتومۋ مۋجيكۋ «دۆاتسات پەرۆىي پالەس» سامومۋ نۋجەن،-دەدى قوشقارباي ءوزىن نۇسقاعان بويدا قارقىلداپ. – دايىن مي بار ما؟ ماعان كارى قۇرتاڭدار ەمەس، سۆەجيي مي كەرەك،-دەدى ارتىنشا. 
-نۋ، بار بىزدە ءبىر جاس جىگىت، ەشكىمى جوق بولسا كەرەك، قويشى ما الدە مالشى ما، اداسىپ جۇرگەن بىرەۋ، قالاساڭىز، سول جىگىتتى دونور ەتەيىك. وعان ول ميدىڭ كەرەگى نە، ءبارىبىر ءسىز سياقتى دەپۋتات بولىپ وتىرمايدى، وعان ءسىزدىڭ ىسىگى بار ميىڭىز دا جاراپ قالار،-دەدى دارىگەر. 
-وندا، جاڭا ميىمدى اۋىستىرايىق، ستەپان اداموۆيچ،-دەدى دە بۇلار قارقىلداپ كۇلىپ الدى. 
وتا 48 ساعات 12 مينۋت 3 سەكۋند بويى جالعاستى. ءساتتى شىققان وتا قوشقاربايدى بىر-ەكى كۇننىڭ ىشىندە اق ورنىنان تىك تۇرعىزدى. 
دەمالىستان ورالعان قوشقارباي دەپۋتات تىڭ جاڭالىقتارمەن ورالسا كەرەك. باسىندا ەش وي جوق، جاڭا مي اسەر ەتتى مە، ءوزىن جاس جىگىتشە ۇستاپ، ءار بويجەتكەنگە ءبىر قىلىمسىپ، شابىتتانىپ ولەڭ شىعارىپ، ءانشى بولىپ تا ءجۇر. اياۋلى جارى كوز الدىنا ۇلكەن كورىنىپ، توقال الام دەگەن ءسوزدى دە ءجيى ايتاتىن بولىپ الدى. 
كەزەكتى دەپۋتاتتار جينالىسى بولىپ جاتىر ەدى. ۇيقىسى كەلىپ، ماۋجىراپ وتىر. اندا-ساندا اۋزىن ايقارا اشىپ ەسىنەپ قويادى. ءتىپتى تالقىسىپ، كوزى ءىلىنىپ كەتسە كەرەك. . كەنەت ءسوز قوشقارباي دەپۋتاتقا بەرىلدى. ورنىنان اتىپ تۇرىپ، ورتاعا كەلگەن ول، ءسوز الماستان بۇرىن، شاشىن سيپالاپ، قىلجاقتاپ قويادى
-قۇرمەتتى دەپۋتاتتار، -دەپ باستادى ءسوزىن. جالپى نە ايتقىسى كەلگەن ەدى، ەسىنەن شىعىپ كەتسە كەرەك! ميىن اۋىستىرۋ وتاسىنان بۇرىن، بىرنەشە زاڭدارعا ۇسىنىس جاساعان ەدى. حالىق شۋ شىعارىپ، زاڭدار قابىلدانباي قويدى. ەندى ويىندا ەشتەڭە جوق، سۋداي جاڭا مي ەشتەڭە ويلاعىسى جوق پا، الدە، قويشىنىڭ ميى تەك قوي بولىپ كەتكەن بە؟ كوز الدىنا ماڭىراعان قويلار عانا كەلە بەرەدى! 
- قۇرمەتتى، حالايىق،-دەپ ءسوزىن تاعى جالعاستىردى. ويىنا ءبىر ويلار ساپ ەتە قالدى. – مەنىڭ دە ءبىرتالاي ۇسىنىستارىم بولىپ تۇر، ماسەلەن،-دەدى كوزىن ۇقالاپ قويىپ، قايتا قىرىلداي : - بۇدان بىلاي، ەشقانداي دەپۋتات جينالىستا ۇيىقتاماسىن، مەيلى تۇنىمەن ول ايەلىنىڭ قوينىندا جاتتى ما، جوق توقالىنىڭ با، الدە حالىقتىڭ قامىن جەپ جاڭا زاڭدار جاسادى ما، ءبارىبىر، ەگەر جينالىس ۇستىندە كوزى جۇمىلعان ءبىر دەپۋتات بولسا، سول مىندەتتى تۇردە دەپۋتاتتىقتان شىعارىلسىن،-دەدى. زال شۋ ەتە قالدى. قوشقاربايدىڭ جاڭا تانىتقان قىلىعى وتىرعان دەپۋتاتتاردى ارلى-بەرلى قوزعالاقتاتىپ، سىبىرلاتىپ قويدى.
– ءجون ەمەس، دەپۋتات حالىق قالاۋلىسى، حالىق ءۇشىن تۇنىمەن جۇمىس ىستەيدى، جينالىستا كوزى ءىلىنىپ كەتسە ايىپ جوق، ءبارى حالىق ءۇشىن، حالىق دەپ جۇرگەنىمىزدە، ءۇش مينۋتتىق ۇيقىنى كورىپ قالماس،-دەدى زالداعىلادىڭ ءبىرى. قوشقارباي كونبەدى. قوجەكەڭ ءبىر جاق، قالعاندارى ءبىر جاق. ال، ەلباسى قول قويدى...
حالىقتىڭ اراسىندا سىپ-سىپ سوزدەر كوبەيىپ، قوشقاربايدىڭ اتى ەرەكشە اتالىپ، تەلەديدار بەتىنەن تۇسپەي جاتىر. دەپۋتاتتار نارازى، قوشقاربايدىڭ اتى شىقتى. 
جينالىستان جينالىس. دەپۋتاتتار ەدى قوشقاربايدىڭ نە ايتارىن تاعى باقىلاپ وتىر. الدىڭعى ءسوزى ىسكە اسىپ، ەندى ۇيىقتاپ قالعان دەپۋتاتتار ءبىرىنشى بولىپ، قۇجاتتارىن كەرى تاپسىرىپ، اۋىلدارىن كەتەدى. زاڭ بار. تىكەدەن –تىك وتىرعان ولار، ارا-تۇرا ەسىنەپ قويسا دا، جىلى ورىندارىنا ايىرىلىپ قالمايىن دەپ، كوزدەرىنە سىرىڭكە تىرەپ العانداي، باقىرايىپ وتىر. كەزەكتى ءسوز تاعى دا قوشقاربايدا.
-قۇرمەتتى، دەپۋتاتتار! قۇرمەتتى حالايىق! مەنىڭ تاعى ءبىر ۇسىنىسىم بار، مەنىڭشە ءبىز، دەپۋتاتتار جالاقىنى تىم كوپ الاتىن سياقتىمىز، وسىلاي وتىرىپ الىپ زاڭ شىعارعاننان كورى دالادا تىنىم تاپپاي جۇرگەن حالىق اقشاعا ءزارۋ. ەندى، ايتارىم، ءبىزدىڭ جالاقىنى قىسقارتىپ، قارا حالىققا ءبولىپ بەرىلسىن. بىزدەردىڭ الاتىن ميلليونىمىزدان 100مىڭى جەتەدى، قالعان اقشانى حالىقتىڭ يگىلىگىنە بەرىلسىن،-دەدى شىمىركپەستەن. زال تاعى دۋ-دۋ. سوندا دا، كەيىمەگەن قوشقارباي، ءسوزىن جالعاستىردى:
-حالىق كوبەيسىن دەسەك، ءار تۋىلعان بالانىڭ ەسەبىنە ون مىڭ دوللاردان جىبەرىلىپ، ول ون سەگىزگە كەلگەندە جيىرما مىڭ دوللار بولىپ بەرىلسىن. ەگەر اناسى ول اقشانى كەرەك ەتسە، بانكتەن شەشىپ الا الادى، ال بالاسىنىڭ بولاشاعىن ويلاسا، سول اقشانى ساقتاپ، ونىڭ الداعى ومىرىنە قىزمەت جاساسىن. 
حالىق تاعى قوشقاربايدى ماقتاپ، جار سالىپ جاتىر. 
ەندى دەپۋتاتتار قوشقاربايدان شىن قورقايىن دەدى. كۇن سايىن نە شىعاراتىنىن بىلمەي، ونىڭ ءار-جۇرىس تۇرىسىن اڭدىپ، ارتىنان ادام دا سالىنىپ قويدى. ال، قوشقاربايدىڭ تىرشىلىگى سول، ۇيىنە بارادى، ۇيىقتايدى، قايتا تاڭ اتار اتپاستان تۇرىپ الادى دا ويلانىپ وتىرادى. ال بۇگىن، قوجەكەڭ تاعى ءبىر توسىن سىي دايىنداپ كەلىپتى. ۇستىنە كۇندەلىكتى كيىپ-جۇرەتىن شىرتتاي بولعان كوستيۋم-شالبار ەمەس، قاراپايىم قازاقى ەركەكتىڭ ويۋلى جەيدەسى مەن جارعاق شالبار، جولاقتى شاپان كيىپ، باسىنا ماقتادان پىشىلگەن توبەتەي، اياعىنا ساپتاما ەتىپ كيىپ الىپتى. وتىرعان جۇرت مىسقىلداپ دۋ كۇلىپ ءجۇر. قوشقاربايدى اسپاننان كەلگەن وزگە عالامشارلىققا تەڭەپ، اراسىندا «مامبەت» دەپ قالعاندار دا بولدى. ءبىراق ول سوزگە تىپتەن دە ءمان بەرمەگەن قوجەكەڭ، كەلەسى سوزدە ءوز كيىمىن تىلگە تيەك ەتتى:
-ۋا، حالايىق، مەنىڭ تاعى ءبىر ۇسىنىسىم بار، بۇدان بىلاي دەپۋتاتتار، كيىمدەرىڭىزدى ءدال مەنىكىندەي وزگەرتىپ، قازاق ەكەنىمىزدى تانىتساق دەيمىن. ءار حالىق ءوزىنىڭ ۇلتتىق كيىمىن كيىپ، ءوز سالت داستۇرىمەن الەمگە تانىلۋى كەرەك. ەرلەر ەرگە ءتان شاپان، شەكپەن، جارعاق شالبارىن كيسە، ايەلدەرىمىز بۇرمەلى كويلەكتەرى مەن كيمەشەكتەرىن كيسىن. جاس كەلىنشەكتەر دە قايىن جۇرتىنا كەلىن بولىپ تۇسكەن سوڭ، ۇلكەندەردىڭ الدىندا باس كيىمسىز جۇرمەي، بۇدان كەيىن ورامالىن تاعىپ، ءوزىنىڭ انا ەكەنىن تانىتسىن. ال جاس قىزدار، قوس بۇرىمدارىن ءورىپ، شولپىسىن سىڭعىرلاتىپ، قوس ەتەكتى بۇرمەلى كويلەگىن كيسىن. بەلىن بەلدىكپەن بۋىپ، ارىن ساقتاسىن. بوساعان بەلدىك، قىزداردىڭ ارىنىڭ تازا ەمەستىگىن كورسەتكەن. سول سەبەپتى قازاق ەكەنىمىزدى كورسەتەتىن بىردەن ءبىر سەبەپ وسى ۇلتتىق كيىمىمىزدى كيۋدى باستايىق. مەن سولاردىڭ ەڭ العاشقىسىمىن،-دەدى. زالداعى جۇرت تىپتەن تەرلەپ، دەم جەتپەي وتىر. قوشقاربايدىڭ تاعى قانداي ءسوز ايتادى ەكەن دەپ، قورقۋمەن وتىرعان سياقتى.
-ۋا، حالايىق، سونىمەن قاتار،-دەدى قوجەكەڭ تاعى ءسوزىن جالعاستىرىپ:- بۇدان بىلاي، ۇلتتىق كيىمىمىزبەن قاتار، ەندى ءوز انا تىلىمىزدە سويلەيتىن كەز كەلدى. قازاق ءتىلىن شۇبارلاپ، اراسىندا ورىسشا سويلەپ كەتەتىن قازاقتارىمىز، ءوز انا تىلىندە سويلەگىسى كەلمەسە، تىلدەرى كەسىلىپ، ساقاۋ بولسىن. ءبارىبىر، ءوز انا ءتىلىن قورلاعان ادام، ساقاۋدىڭ ءوزى ەمەس پە؟ بۇدان بىلاي، ءىس-قاعازدار تەك قازاق تىلىندە جۇرگىزىلىپ، مەكتەپ تەك قازاق تىلىندە بولسىن. قازاق ەلىندە ءومىر سۇرەتىن، سۇرگىسى كەلەتىن ءار ءبىر جان، مەيلى ول ورىس، وبەك، تاتار بولسىن، قازاق تىلىندە سويلەۋگە مىندەتتى. قازاق تىلىندە سويلەي الماعان ادامعا، اي سايىن ايىپپۇل سالىنىپ وتىرسىن. ول ايىپپۇل تەك قازاق ءتىلىن ءوز انا تىلىندەي قۇرمەتتەپ، تەك قازاق تىلىندە سويلەي العانعا دەيىن جالعاسسىن. اراكىدىك ءبىر ورىسشا ءسوز ايتىلىپ كەتسە، وندا سول ءسوزدىڭ كولەمىندە ايىپپۇل سالىنسىن. ءار ءبىر ارىپكە مىڭ تەڭگەدەن كەلەر بولسا، ورىسشا ءسوز سويلەمەك تۇگىلى، ورىس ءتىلىن دە ۇمىتار ەدى، مەن بۇدان بىلاي تەك قازاق تىلىندە سويلەيمىن،-دەپ اياقتادى ءسوزىن قوجەكە. دەپۋتاتتاردىڭ ەڭسەسى ءتۇسىپ، حالىق قوجەكەڭدى تاعى كوككە كوتەردى. قوجەكەڭنىڭ ۇسىنىسىنا ەلباسىدا قول قويىپ، ەندى دەپۋتات قوشقاربايدىڭ مەرەيى ۇستەم بولىپ، حالىق قالاۋلىسىنا اينالىپ بارا جاتىر. 
كۇندەر ءوتىپ، ءار جينالىستا ءسوز سويلەگەن قوشقارباي قوجابايەۆيچ ەندى قوجاباي ۇلى بولدى. ناعىز قازاق كەلبەتىن تانىتىپ، تەك قازاق تىلىندە سويلەيتىن، حالىق جاناشىرى، حالىقتىڭ ەڭ مەيىرىمدى دەپۋتاتىنا اينالدى. سويلەگەن ءسوزىن اڭدىپ، كۇتىپ وتىراتىن بولدى حالىق. باسقا دەپۋتاتتار قوشقاربايدىڭ بۇلاي وزگەرىپ كەتكەنىنە تاڭ قالىپ، ونى اڭدىپ، ارباپ، ويىنان قايتۋىن سۇراپ، جالبارىندى.
- جالاقىمىزدى قىسقارتپاسىن، ەش توقال –موقال المايمىز، جينالىستا ۇيىقتامايمىز، تەك سويلەي بەرمەڭىز، بىزگە دە ءبىر ۇسىنسىتارىڭىزدى ايتىڭىز، ءبىز دە ءوز اتىمىزدى شىعارايىق،-دەستى بىرىنەن سوڭ ءبىرى. وعان قوجەكەڭ كونبەدى، نەسىنە كونەدى، قايدان، قالاي وي تۋىپ وتىرعانىن بىلمەيدى، ءدال جينالىستا ويىنا كەلگەن ءسوزدى ايتادى. باسقا كۇندەرى شىركىن سارى دالانى اڭسايدى. كۇرەڭ اتقا ءمىنىپ الىپ، ىسقىرىپ كەلىپ، ماڭىراعان مىڭداعان قويلاردى قايىرىپ، سايىن دالادا شاۋىپ جۇرسە. شىركىن ارمانداعانعا نە جەتسىن. ءبىراق امال تاپتى. قوشقاربايدىڭ كەلەسى ايتار ءسوزى دە وسى سايىن دالا بولماق. 
-ۋا، دەپۋتات مىرزالار، ۋا حالايىق، بۇدان بىلاي، ءار حالىق قالاۋلىسى، ءسىز بەن ءبىز، دەپۋتات، سەنات، مينيسترلەر، سايىن دالاعا بارىپ، ءبىر اپتاعا مالشىلاردىڭ قويىن باعىپ بەرسىن. ايەلدەرى سيىر ساۋىپ، قۇرت-ماي تارتقاندى كورسىن، ەركەكتەر قوي قايىرىپ، جىلقى باعىپ، ونى يت-قۇستان قارىپ، كۇزەتكە تۇرسىن. بۇل ءار باسشى ادامنىڭ جۇمىس ەرەجەسىنە كىرسىن،-دەدى. 
-ويپىرماي، مىناۋ ءبىزدى ولتىرەدى مە؟،-دەدى تاعى ءبىرى. قول قويىلدى. زاڭ قابىلداندى. ەندى باسشىلىق قىزمەتتە جۇرگەن ءار «باسەكە»-لەر ءبىر ايعا مالشىلارعا قولقانات بولىپ، مال باعاتىن بولدى. 
-قوجەكە، تىم قاتتى كەتىپ بارا جاتىرسىز، ەڭ قۇرىعاندا ءبىزدى دە ويلاڭىز، حالىق ءبىزدى دە جاقسى كورسىن، سىزگە استىمداعى «HAMMER» كولىگىمدى بەرەيىن، سىيلىق بولسىن، ماعان ءبىر ويىڭىزدى ايتىپ جىبەرىڭىزشى،- دەپ تۇر جولداس باسشىلاردىڭ ءبىرى. قوجەكەڭنىڭ ويىنا تاعى ءبىر وي كەلدى...
-ۋا، حالايىق! ۋا، دەپۋتات مىرزالار، بۇگىننەن باستاپ «HAMMER»، دجيپ، تايوتا دەگەندى قويىىپ، ەڭ مىقتى كولىك «موكۆيچتى» مىنەتىن بولىڭىزدار، «موسكۆيچ» دەپ اتالماي، بۇدان بىلاي «استانالىق» كولىگى بولسىن، ول كولىك ۇناماسا، قوعامدىق كولىكپەن جۇرىڭىزدەر، حالىققا جاقىن بولاسىزدار! 
قوشقاربايدىڭ نەگە ەكەنى بەلگىسىز، ويىنا قويشى جىگىتتىڭ اكەسى ءتۇسىپتى. ءوزىن كورمەسە دە، كوز الدىنا كەلىپ تۇرعان سياقتى. بايعۇس اكەسى، قوي سوڭىندا جۇرەم دەپ، وسى ءبىر «ماسكۆيچكە» جەتە الماي اق قويىپ ەدى. «الگى «ماسكۆيچتى» السام، انا قويلاردى اڭ قۇسقا بەرگىزبەي، سول ماسكۆيشىمدە جاتىپ اپ كۇزەتەر ەدىم» دەپ ارمانداپ وتىرادى ەكەن. سول اكەسى، كورشىسى ۇيىنە سۋداي جاڭا «ماسكۆيچتى» الىپ كەلگەندە العاش كورىپ، جۇرەگى جارىلىپ قايتىس بولىپتى. قايران جۇيرىك «ماسكۆيچ»!
حالىق ءماز، باسشىلار اشۋلى. قىرىق كىسى ءبىر جاق، قىڭىر كىسى ءبىر جاق. نە كەرەك، قوشقارباي قوجاباي ۇلى حالىقتىڭ جوعىن جوقتاپ، وعىن وقتاپ وتىراتىن عالىم بولىپ شىعا كەلدى. زاڭ قابىلدانىپ جاتىر، قابىلدانىپ جاتىر. 
-ايتارىم بار، -دەدى تاعى دەپۋتات. ءبارى «ەندى بىتتىك» دەگەندەي ءۇنسىز قالدى. – قوسجىنىستىلاردىڭ كوزىن قۇرتىپ، بالا زورلاعىشتاردىڭ جىنىسىن اۋىستىرىپ، وزىنە دە سونداي ايۋۋاندىق جاسالسىن، كورسىن، ءسابيدى جىلاتقان قانداي بولارىن، ودان كەيىن تۇگەلىمەن الىنسىن. 
-نە دەپ كەتتى سۇمدىق اي!،-دەستى ءبارى. حالىقتىڭ قوشەمەتىنە لەپىرىپ كەتكەن قوجەكەڭ ەندى شابىتتانا باستادى:
-مەكتەپ بىتىرگەن ءار تۇلەك تەگىن جوو-دا وقىلسىن. جاس وتاۋعا تەگىن ءۇي بەرىلسىن، اجىراسىپ جاتسا ءۇي قايتا ۇكىمەتكە كوشسىن! جۇمىسسىزدىق جويىلسىن! جەزوكشەلىك جويىلسىن! ارلى قارىنداستار بۇرمەلى كويلەك،قىزىل بورىك، سىڭعىرلاتىپ شولپىسىن، ۇلتتىق كيىم، انا تىلدە سويلەنسىن. اشىق-شاشىق جۇرگەندەرگە ايىپپۇلدار جازىلسىن.! جاس پەن كارى تەگىن سپورت مەكتەبىنە بەرىلسىن. بالا كوپتەپ تۋىلسىن! ۇرىلاردىڭ قولى شابىلسىن، جىن-ويناقتار جابىلسىن. تەگىن ەمدەل، تەگىن وتا جاساسىن. تالاي ايتام، ايتا بەرەم ءالى دە، قازاق حالقى، ءاردايىم دا جاساسىن!،-دەپ القىنىپ، ۇستىندەگى شاپانىن شەشىپ تاستاپ، ەكى يىعىن جۇلىپ-جەپ، اندەتىپ جىبەردى. حالىق دۋ ەتتى. دەپۋتاتتار سىرتقا قاراي زۋ ەتتى. نە كەرەك بۇگىن مىنە ميىن اۋىستىرعانىنا ءماز بولىپ وتىرعان قوشقاربايدى حالىق ماقتاپ، ناعىز حالىق قاحارمانى، باتىرى، جاناشىرى، «اللانىڭ ءوزى جىبەردى، كوز تيمەسىن» دەپ جاتىر... حالىق تا تىنىش، قوشقارباي دا ءماز. 
سودان كەيىن-اق، حالىق ۇلتتىق كيىمدەردى كيىپ، كيمەشەكتى اجە، ورامالدى جەڭگە، شولپىلى قىزدار كوبەيدى. تۇماق بورىك، كەستەلى شاپاندى جىگىتتەر كورىندى. تەلەارنا، راديولار تەك قازاق تىلىندە سايراپ، ورىس ءتىلى ۇمىتىلا باستادى. نە كەرەك، قوشقاربايدىڭ ايتقان ۇسىنىستارى زاڭ بولىپ قالىپتاسىپ، ەلگە بىرلىك الىپ كەلىپتى. 
ودان كەيىن نە بولدى دەيسىز عوي؟ ايتايىن، ودان كەيىن قوشقاربايدىڭ ءۇيىن جاعالاپ جۇرگەندەر ونىڭ ايەلىنە قىزىل كويلەك، اق ورامال، كامپيت-سامپيتىن بەرىپتى، ال ايەلى قوشقاربايدىڭ ميىن اۋىستىرعانىن ايتىپتى. وسەك لەزدە تاراپ كەتكەن سەكىلدى...
تەگىن قازاقشاعا وزگەرتكەن ىستەپان ادام ۇلى بىرنەشە كۇننەن بەرى حابار وشارسىز كەتىپتى، بىرەۋلەر وتا جاسايتىن قۇرال-سايماندارىمەن بىرگە ۇرلاپ كەتكەن سياقتى. ال، بىرنەشە دەپۋتاتتار دەرەۋ قويشىلاردىڭ مالىن باعۋعا كەتكەن دەسەدى. بالكىم، بالكىم... ءاۋ، قويشىلارىڭىز ەس ءتۇسسىز جوعالىپ كەتپەسىن!... 
ميى اۋىسسا دا، اۋىسپاسا دا حالىق جاناشىرلارى امان بولسىن!

قارلىعاش سارىبايدىڭ حيكايالارى...