جىلدا جەلتوقسان جاقىنداعاندا تاۋەلسىز كۇنى مەن جاڭا جىلعا دايىندىق جۇمىستارى ءسوز بولادى. بارشا قازاق ءۇشىن اسا ءقادىرلى تاۋەلسىزدىك مەرەكەسى وتپەي تۇرىپ، جاڭا جىلعا دايىندىقتى باستاۋ ەلدىگىمىزگە سىن. اتالمىش ماسەلە تالاي مارتە كوتەرىلدى، ايتىلدى، حالىق ءوز نارازىلىعىن ءبىلدىردى، ءبىلدىرىپ تە جاتىر. الايدا ودان ەشقانداي ناتيجە جوق. تاريحي ءمانى زور تاۋەلسىزدىك كۇنى جاڭا جىلدىڭ تاساسىندا قالىپ وتىر.

Qamshy.kz اقپارات اگەنتتىگى ەلىمىزدىڭ باستى قالالارى استانا مەن الماتىدا تاۋەلسىزدىك كۇنىنەن دايىندىق قالاي ءجۇرىپ جاتقانىن جازعان. تاۋەلسىزدىك كۇنىنە قاتىستى جوسپار مەن جاڭا جىلعا دايىندىق قاشان باستالاتىنىن ءبىلۋ ماقساتىندا الماتى اكىمدىگىنە ارنايى ساۋال دا جولدادىق.

وندا جاڭا جىلعا دايىندىق تاۋەلسىزدىك كۇنىنەن كەيىن ءبىراق باستالادى دەپ تاسقا تاڭبا باسقانداي جازىلعان. الايدا قالادا جاڭا جىلعا دايىندىق قازىردەن باستالىپ كەتتى. وعان «دوستىق پلازا»، «Esentai mall»، «Mega Park» سىندى ساۋدا ورتالىقتارىنداعى جاڭا جىلدىق بەزەندىرۋلەر مەن ورناتىلعان شىرشا دالەل.

قالا بويىنشا حالىق كوپ جۇرەتىن جەرلەردىڭ ءبىرى – ساياحاتتا جاڭا جىلدىق شىرشا قاسقايىپ تۇرعانى دا ءبىراز ۋاقىت بولدى. سوندا الماتى اكىمدىگىنىڭ دايىندىقتى تاۋەلسىزدىك كۇنىنەن كەيىن باستايمىز دەگەن ءسوزى قايدا؟! الماتى اكىمدىگى ەكى سويلەيتىن بولعانى ما؟

قالادا اكىمدىكتىڭ رۇقساتىنسىز مۇندايعا جول بەرىلمەيتىنى انىق ونىڭ ۇستىنە اكىمدىكتەر ارنايى كاسىپ يەلەرىنە جاڭا جىلعا دايىندىقتى باستاۋ قاجەتتىگىن ەسكەرتەتىنىن، ويتپەگەن جاعدايدا ايىپپۇل سالىناتىنىن ەسكەرتەتىنىن استانالىق كاسىپكەر ايتقان ەدى.

قوعامدىق بەلسەندى، ەكونوميست مۇحتار تايجان الەۋمەتتىك جەلىدە استانادا جاڭا جىلدىق بەزەندىرۋدى توقتاتۋدى، ونىڭ ورنىنا كوشەلەر مەن كوپشىلىك ورىندار ۇلتتىق ناقىشتا، قازاقستان رەسپۋبليكاسىنىڭ مەملەكەتتىك تۋىنىڭ تۇسىمەن بەزەندىرىلۋىن تالاپ ەتتى. بۇل تالاپقا قوسىلاتىندار ءوز اتى-جوندەرى مەن تۇراتىن قالاسىن جازىپ قالدىردى. سونىڭ ناتيجەسىندە جۇزدەگەن ادامنىڭ قولى جينالدى.

مۇحتار تايجان كەشە ق ر پرەزيدەنتى اكىمشىلىگىنە جۇزدەگەن ادامنىڭ تالابىن وتكىزدى.  

حالىقتىڭ تالابى ورىندالادى دەپ سەنەمىز. سەبەبى ۇلتتىق قۇندىلىعىمىزدى ايقىنداماي، ەل، ۇلت ءۇشىن ماڭىزدى قاجەتسىز دۇنيەنىڭ ارا جىگىن اجىراتا الماساق تاريحي تامىرىمىزدان اجىرايمىز. ەلدىگىمىزگە سىن.

اسەم المۇحانبەت