قىزىلوردادا وتكەن «بايقوڭىر ينۆەست» ءىح ينۆەستيسيالىق فورۋمىندا كوتەرىلگەن نەگىزگى ماسەلەلەردىڭ ءبىرى — «بايقوڭىر» عارىش كەشەنىن دامىتۋ بولدى، — دەپ حابارلادى Qamshy.kz اقپارات اگەنتتىگى
«قازاقستان — رەسەي ارىپتەستىگى اياسىندا بايقوڭىر قالاسىن دامىتۋ» تاقىرىبىنداعى سەكسيا جۇمىسىنا بايقوڭىر كەشەنىندەگى ق ر پرەزيدەنتىنىڭ ارنايى وكىلى، قىزىلوردا وبلىسى اكىمىنىڭ ورىنباسارى سەرىك قوجانيازوۆ جەتەكشىلىك ەتتى. ونىڭ جۇمىسى بارىسىندا «بايقوڭىر» كەشەنىندە بيزنەستى دامىتۋ ۇسىنىستارى ورتاعا سالىندى.
ەكى ەلدىڭ عارىشتى يگەرۋ سالاسىنداعى مەملەكەتتىك ساياساياتى الەمدەگى العاشقى عارىش كەشەنى -— «بايقوڭىردى» جاڭعىرتۋدى كوزدەيدى. ونى دامىتۋدىڭ جاڭا ساتىسى 2016 جىلدىڭ 26 جەلتوقسانى كۇنى ۇكىمەتارالىق دەڭگەيدە بەكىتىلگەن «بايقوڭىر» كەشەنى بويىنشا ودان ارعى ءوزارا ءتيىمدى ىقپالداستىق تۇجىرىمداماسى. قۇجات 2050 جىلعا دەيىن ەسەپتەلگەن جانە ول 9 نەگىزگى باعىتتان تۇرادى.
Cەرىك قوجانيازوۆ اتاپ وتكەندەي، بۇگىندە كەشەن ەكى ەل باسشىلارىنىڭ كەلىسىمى نەگىزىندە الەۋمەتتىك-ەكونوميكالىق دامۋدىڭ جاڭا ساتىسىنا كوتەرىلىپ وتىر.
بايقوڭىردا بيزنەستى وركەندەتۋ تۋرالى بايقوڭىر قالاسى بويىنشا ەكونوميكالىق دامۋ باسقارماسىنىڭ باسشىسى رۋسلان ءامىروۆ بايانداپ بەردى. بۇگىندە جۇلدىزدى قالاشىقتا 76 مىڭ ادام تۇرسا، ولاردىڭ 500-دەن استامى كاسىپكەر. قالانىڭ ەرەكشە ستاتۋسىنا سايكەس كاسىپكەرلەرگە جەر تەلىمىن بەرۋ جايى ەكى جاقتى كەلىسىم نەگىزىندە شەشىلەدى.
ال قالا سىرتىنداعى ەلدىمەكەندەر قازاقستان زاڭى شەڭبەرىندە جۇمىس ىستەيدى. سونداي-اق ق ر اەروعارىش كوميتەتىنىڭ ءتوراعاسى ەركىن شايماعانبەتوۆ قازاقستان مەن رەسەيدىڭ بىرىككەن «بايتەرەك» جوباسىنىڭ بۇگىنگى جايىن اڭگىمەلەپ بەردى. ول جوبا بويىنشا العاشقى ۇشىرىلىم 2022 جىلى جۇزەگە اسىرىلاتىنىن جەتكىزدى.
سەكسيا جۇمىسىن قورىتىندىلاعان سەرىك قوجانيازوۆ قالانىڭ دامۋى ءۇشىن ارنايى باعدارلاما جاسالعانىن، سونىڭ نەگىزىندە الداعى ۋاقىتتا كاسىپكەرلەر كەشەنگە كەرەكتى كاسىپورىندار اشىپ جۇمىس جاسايتىنىن ايتىپ ءوتتى. مۇنان وزگە تۇرعىن ءۇي، الەۋمەتتىك نىساندار بوي كوتەرىپ، قالا جاڭاشا دامۋعا بەت بۇراتىن بولادى. بۇگىنگى كۇنى گاز جەلىسى «بايقوڭىر» قالاسىنا قوسىلىپ ۇلگەرسە، كەلەسى جىلدان باستاپ مۇندا سۋ جەلەلەرى جاڭارتىلماق.
