بۇگىن بىشكەكتە المازبەك اتامبايەۆ پرەزيدەنتتىگىنىڭ ناتيجەسى جاريالانعان قورىتىندى باسپا ءسوز ءماسليحاتى بولدى. جالپى ايتقاندا، اتامبايەۆ اسا ماڭىزدى ەشتەڭە ايتا قويعان جوق. ول پىكىرىن تەك ءتۇرلى ەموسياعا سالىپ قانا ءبىر ءسوزدى، ءبىر ويدى باسقاشا جەتكىزىپ وتىردى. بۇل تۋرالى قازاقستاننىڭ حالىقارالىق قاتىناستار جونىندەگى كەڭەسىنىڭ ءتوراعاسى ەرلان قارين مالىمدەدى، دەپ جازادى Qamshy.kz اقپارات اگەنتتىگى.

«باسپا ءسوز ءماسليحاتى بولماس بۇرىن، 2-3 ساعاتقا سوزىلاتىن ۇزاق وتىرىس بولاتىنى جاريالانعان. دەگەنمەن، اتامبايەۆ وندا پرەزيدەنتتىگىن قورىتىندىلايتىن ماڭىزى بار ەشتەمە قوسقان جوق. ماسەلەن، ول جاڭا ءبىر جالپىلاما ساندىق ناتيجە كورسەتكىشى نەمەسە فاكتىلەرمەن بولىسپەي، ادەتتەگىسىنشە، قازاقستانعا شابۋىل جاساۋمەن عانا بولدى. ءبىراق ونىڭ بارلىعى الدىن الا وي ەلەگىنەن وتكىزىلگەن. سەبەبى قازاقستاندى ارالاستىرا وتىرىپ، ول قىرعىز حالقىنىڭ ناقتى پرەزيدەنتتىك قورىتىندى تۋرالى تاقىرىپتان اداستىرۋدى كوزدەگەن. 

«اتامبايەۆ انتيقازاقى مالىمدەمەلەرىمەن ەلدىڭ نازارىن نەگىزگى ماسەلەدەن اۋدارۋدى ويلايدى. سەبەبى، ناتيجە ايتارلىقتاي كوڭىل قونشىتارلىق ەمەس - اتامبايەۆ ءوزىنىڭ مۇراگەرىنە كوپتەگەن شەشىمى تابىلماعان ماسەلەلەر قالدىرا وتىرىپ، پرەزيدەنتتىك تاقتى تاستاپ بارادى. ەكونوميكالىق ساياساتتا دا ول جاعدايدى جاقسارتا الماي، تەك ەلدىڭ جاعدايىن قيىنداتا ءتۇستى. مەملەكەتتىك بيۋدجەتتىڭ جەتىسپەۋشىلىگى 2016 جىلى 20 ملرد سومدى قۇراعان بولاتىن.

بۇل قىرعىزستان ءۇشىن 20 جىلدىڭ ىشىندە ەڭ رەكوردتى كورسەتكىش ەكەنىن ايتا كەتكەن ءجون. اتامبايەۆ پرەزيدەنت بولا باستاعان 2011 جىلدان بەرى بيۋدجەتتىڭ جەتىسپەۋشىلىگى 50 پايىزدان اسىپ كەتتى. بۇعان قوسا جەتىسپەۋشىلىكتى ىشكى قارجى كوزدەرى ەسەبىنەن جابۋ بويىنشا كورسەتكىش 6،5 ملرد سومدى قۇراعان بولاتىن. ال ءقازىر ول سان 19 ملرد سومعا جەتتى»، - دەيدى ول. ەرلان قارين ءوز سوزىندە باسقاشا ايتقاندا، كەتىپ بارا جاتقان پرەزيدەنت جەتىسپەۋشىلىكتى جابۋ ءۇشىن (75 پايىزىن) سىرتقى قارجى كوزدەرىن پايدالانا وتىرىپ، مەملەكەتتىڭ قارىزىن ءوسىرىپ جىبەرگەنىن ايتادى.

ال مەملەكەتتىك قارىز قىرعىزستاندا جالپى ىشكى ءونىمنىڭ 62 پايىزىن قۇراپ وتىر. بۇل دا سوڭعى 25 جىلداعى رەكوردتىق كورسەتكىش. «وسىدان-اق قازاقستاننىڭ ناقتى ماقساتتى قاجەتتىلىككە بەرمەك بولعان 100 ملن دوللارىنان اتامبايەۆتىڭ نەگە باس تارتقانىن اڭعارۋعا بولادى. ەاەو-نىڭ ورتاق ستراتەگياسى ءۇشىن، ياعني فيتوسانيتارلىق جانە كەدەندىك باقىلاۋدى كۇشەيتۋ ماقساتىندا بولىنگەلى وتىرعان قاراجاتتى اتامبايەۆ پەن ونىڭ كومانداسى بيۋدجەتتىڭ جىرتىعىن جاماۋ ءۇشىن قولدانباق بولعان. بۇنىڭ ىسكە اسپايتىنىن بىلگەننەن كەيىن ولار سيرككە ۇقساس قويىلىمدى ۇيىمداستىرىپ جىبەردى»، - دەيدى ەرلان قارين.

ساياساتتانۋشى سونىمەن بىرگە، ساياسي تۇرعىدا دا اتامبايەۆ پرەزيدەنتتىگىنىڭ قورىتىندىسى بىركەلكى ەمەستىگىن ءبىلدىردى.

«ساياسي الاڭ بىر-بىرىنەن اۋىتقىپ قالدى، ول بارلىق وپپونەنتتەرىن ساياسي كەڭىستىككە ىسىرىپ تاستادى. 2010 جىلى ءوزى بىرگە ءساۋىر توڭكەرىسىن ۇيىمداستىرعان جاقتاستارىنىڭ بارلىعىمەن جانجالداستى. ەلدە ءدىني راديكاليزم بەلەڭ الىپ بارادى. قىرعىزستاننىڭ قازاقستانمەن عانا ەمەس، ءبىرسىپىرا ەلدەرمەن قارىم-قاتىناسى ناشارلاي ءتۇستى.

بۇعان قوسا ول پوپۋليستىك مالىمدەمەلەر جاساي وتىرىپ، سانالى تۇردە كەلەسى پرەزيدەنتتىڭ جۇمىسىنا كەدەرگى كەلتىرىپ جاتىر. سوندىقتان، جالپى قورىتىندىعا «جاعىمسىز» دەپ باعا بەرۋگە بولادى. اتامبايەۆ بۇل ماسەلەلەردى شەشۋگە كۇش سالماستان كەتىپ بارادى. ەندىگى كەزەكتە، وسىناۋ اتامبايەۆ «مۇراعا قالدىرعان ماسەلەلەردىڭ» بارلىعىن مۇراگەرى شەشۋى كەرەك بولادى»، - دەيدى ەرلان قارين.