بۇگىن ماجىلىستە وتكەن ۇكىمەت ساعاتىندا اقپارات جانە كوممۋنيكاسيالار ءمينيسترى "ازاماتتارعا ارنالعان ۇكىمەت" مەملەكەتتىك كورپوراسياسىنىڭ قىزمەتىن ۇيلەستىرۋ جانە دامىتۋ ماسەلەلەرى جايلى بايانداما جاسادى دەپ حابارلايدى Qamshy.kz اقپارات اگەنتتىگى اقپارات جانە كوممۋنيكاسيالار مينيسترلىگىنىڭ باسپا ءسوز قىزمەتىنە سىلتەمە جاساپ. 

قازىرگى كۇنى «ازاماتتارعا ارنالعان ۇكىمەتتىڭ» جالپى 350 فرونت-كەڭسەسى بار. ولاردا جۇمىس ىستەيتىن 22 000-عا جۋىق قىزمەتكەر (بارلىعى 21 788) جىل سايىن 37 ميلليوننان استام قىزمەت كورسەتەدى.

د. ابايەۆ مەملەكەتتىك كورپوراسيا جۇمىسىنىڭ ماڭىزدى باعىتىن اتاپ ءوتتى.

"مەملەكەتتىك كورپوراسيا جۇمىسىنىڭ ماڭىزدى باعىتى – شالعايداعى شاعىن اۋىل تۇرعىندارى ءۇشىن قىزمەتتەردىڭ قولجەتىمدىلىگىن ارتتىرۋ. 

وسى ماقساتتا قازاقستان بويىنشا 70 ءموبيلدى قىزمەت كورسەتۋ ورتالىعى جۇمىس ىستەيدى. ولار اۋىلدارعا جىلىنا شامامەن 13 مىڭ رەت بارىپ قىزمەت كورسەتەدى.

بۇدان بولەك، مەملەكەتتىك قىزمەتتەردى «قازپوشتانىڭ» كەڭسەلەرىندە ۇسىنۋ جونىندەگى بىرلەسكەن جوبا جۇزەگە اسۋدا. بۇل رەتتە ەلدى مەكەندەردىڭ باسىم بولىگىن قامتيتىن ۇلتتىق پوشتا وپەراتورىنىڭ الەۋەتى ءتيىمدى قولدانىلۋدا.

قازىرگى كۇنى مەملەكەتتىك كورپوراسيانىڭ كەڭسەلەرى تاڭعى 9-دان كەشكى 8-گە دەيىنگى ۋاقىتتى قامتىعان ءبىرىڭعاي گرافيكپەن جۇمىس ىستەيدى. الايدا، ازاماتتارعا ىڭعايلى بولۋى ءۇشىن استانا مەن الماتىدا جانە شىمكەنت قالاسىندا ءتۇن ورتاسىنا دەيىن جۇمىس ىستەيتىن حالىققا قىزمەت كورسەتۋ ورتالىقتارى ىسكە قوسىلدى" دەدى مينيستر.