جۇرەگىمىز بارادى-اۋ تاسقا اينالىپ

/uploads/thumbnail/20171120170558340_small.jpg

قاراسۋىق.
قاراشا.
قالا كۇزى.
ەكى تاعدىر كوردىم مەن نالا ءجۇزى.
ەكى جەتىم جوق ءۇيى، جوق ازىعى،
تۋا سالىپ تاۋقىمەت تارتاتىنداي،
نە جازىعى بار ەدى،
نە جازىعى؟

سونى ويلادىم،
قالتىراپ كۇز قوينىندا،
كوپ ويلادىم ورانىپ مۇزداي مۇڭعا.
قۇشاقتاسىپ جاتتى ولار،
"ەشكىمنىڭ دە،
حاقىسى جوق، دەگەندەي، ءبىزدى ايىرۋعا!".

اعاسىنىڭ بىلەگىن جاستانىپ اپ،
جاتتى ءىنىسى جانارىن جاسقا بۇلاپ.
قوس مۇڭلىقتى ەلەيتىن ەشبىر جان جوق،
قالا،
دالا،
قالعانداي بوس قاڭىراپ.

تارىقسا دا تابا الماي تۇنەر ورىن،
تاعدىرىنىڭ كۇردەلى كۇرە جولىن، -
جازعىرمايدى ەشقاشان.
تاس جاستىقتا
جاتسا-داعى، جۇپ-جۇمساق جۇرەگى ونىڭ.

ال، ءبىزدىڭ شە،
...قايتەمىز بوسقا ايلا عىپ؟
كەيدە كۇپىر قىلامىز جاستاي نالىپ.
قۇس جاستىقتى قۇشاقتاپ جاتساق-تاعى،
جۇرەگىمىز بارادى-اۋ تاسقا اينالىپ.

قالقامان سارين

جۇرەگىمىز بارادى-اۋ تاسقا اينالىپ

قاتىستى ماقالالار