ءدال ءقازىر استانادا «Nur Otan Talks: modernization» كونفەرەنسياسى ءوتىپ جاتىر دەپ حابارلايدى Qamshy.kz اقپارات اگەنتتىگى.
«نۇر وتان» پارتياسىنىڭ ۇيىمداستىرۋىمەن قولعا الىنعان ءىس-شارا TED Talks فورماتىندا وتۋدە. وعان نەگىزىنەن فەيسبۋك جەلىسىنىڭ قولدانۋشىلارى قاتىسىپ جاتىر.
كونفەرەنسيانىڭ مودەراتورى، «نۇر وتان» پارتياسى ءتوراعاسى ءبىرىنشى ورىنباسارىنىڭ كەڭەسشىسى جاننا قۇرمانعالييەۆا پارتيا مۇشەلەرىنىڭ، ساراپشىلاردىڭ، قوعام قايراتكەرلەرىنىڭ، ماسس-مەديا وكىلدەرىنىڭ جانە ەل ەرتەڭىنە بەيجاي قارامايتىن بارشا قازاقستاندىقتاردىڭ قاتىسۋىمەن پارتيانى جاڭعىرتۋدىڭ وزەكتى ماسەلەلەرى تالقىلاناتىن زاماناۋي فورماتتاعى سۇحباتتاسۋ الاڭىن قۇرۋدىڭ ماڭىزى جوعارى ەكەنىن ايتىپ، ءىس-شارانى اشىپ بەردى.
ءوز كەزەگىندە بەلگىلى ساياساتتانۋشى، الەۋمەتتىك جەلىنىڭ بەلسەندىسى ساياسات نۇربەك پارتيانىڭ وسىنداي بەيرەسمي ءارى وتە ءتيىمدى فورماتتا العاش رەت جيىن وتكىزىپ وتىرعانىنا ايرىقشا نازار اۋدارىپ:
– قاي كەزدە دە كەدەرگىلەر مەن قارسى پىكىر بىلدىرۋشىلەر كەزدەسەدى. ياعني، جاڭعىرۋدى قولدايتىن دا، وعان قارسى شىعاتىن دا ازاماتتار بولادى. وسى رەتتە مەن ءتيىمدى كەلىسسوزدەر وتكىزىپ، ەكى اۋديتوريانى ورتاق مۇددەگە توعىستىرا ءبىلۋىمىز كەرەك دەپ سانايمىن، – دەدى.
سپيكەرلەر تاقىرىپ اياسىندا ەركىن پىكىر الماسىپ، ءوز ويلارىن اشىق بىلدىرۋدە. ولاردىڭ اراسىندا ساياسات نۇربەكپەن قاتار، دينارا ءساتجان، ايدوس سارىم، راحىم وشاقبايەۆ، تاڭىربەرگەن بەردوڭعار، نۇرتاس ادامباي سياقتى بەلسەندىلەر دە بار.
ايتا كەتەيىك، پارتيا ساياسي كەڭەسىنىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ پارتيانى جاڭعىرتۋ جانە ونىڭ ساياسي جۇمىسىنا جاڭا ۇلگىلەر مەن ادىستەردى قولدانۋ كەرەكتىگى تۋرالى تاپسىرما بەرگەن بولاتىن. سوعان وراي كونفەرەنسياعا قاتىسۋشىلار قازاقستاننىڭ ءۇشىنشى جاڭعىرۋى جانە پارتيا ساياسي كەڭەسىنىڭ كەڭەيتىلگەن وتىرىسىندا ەلباسى تاپسىرعان پارتيالىق جاڭعىرۋ ماسەلەلەرىن تالقىلاۋدا.
