سيريادا سوعىس باستالعان ۋاقىتتان بەرى 26 000 بالا مەرت بولعان، ولاردىڭ باسىم بولىگى قارۋلى قاقتىعىستار، بومبالاۋ سالدارىنان كوز جۇمعان. سيريا قۇقىققورعاۋ ۇيىمى (SNHR) بايانداماسىندا وسىنداي دەرەكتەر جاريالاندى، دەپ حابارلايدى Qamshy.kz اقپارات اگەنتتىگى kazislam.kz سايتىنا سىلتمە جاساي وتىرىپ. 

بايانداما دەرەكتەرىنە سۇيەنسەك، 2011 جىلى تەرروريستەرگە قارسى سوعىس باستالعان كەزەڭنەن بەرى سيريا الەم بويىنشا بالا قۇقىقتارى بۇزىلعان ەلدەر ءتىزىمىنىڭ كوش باسىندا تۇر. وسىعان بايلانىستى سيرياداعى قاقتىعىستا بالالار ءۇشىن ۇلكەن جاۋاپكەرشىلىك كوتەرەدى. جەتى جىلعا جالعاسقان سوعىس سالدارىنان ەلدەگى 1 378 مەكتەپ پەن بالاباقشا قيراتىلىپ، 3،2 ميلليون بالا ءبىلىم الۋ مۇمكىندىگىنەن ايىرىلعان. ءبىلىم الۋدان اجىراعان بالالار ەرتە جاستان جۇمىسقا جەگىلگەن.

سونىمەن قاتار، SNHR ۇيىمى بۇۇ مەن حالىقارالىق قاۋىمداستىقتاردى سيرياداعى بالالار قاۋىپسىزدىگىن قامتاماسىز ەتۋگە، سوعىس ايماقتارىنداعى تۇرعىندارعا گۋمانيتارلىق كومەكتەردى جەتكىزۋگە اتسالىسۋعا شاقىردى.   ەسكە سالا كەتسەك، سيرياداعى سوعىس 2011 جىلدىڭ ناۋرىز ايىندا باستالدى. بۇۇ مالىمەتىنشە، وسى ۋاقىتتان بەرى 400 مىڭنان اسا ادام قازا تاۋىپ، 10 ميلليوننان اسا تۇرعىن باسپانالارىن تاستاپ كەتۋگە ءماجبۇر بولدى.