بۇگىن قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى جانىنداعى الەمدىك ەكونوميكا جانە ساياسات ينستيتۋتىنىڭ (اەسي) الماتىلىق كەڭسەسىندە وتاندىق ساراپشىلار، قوعام قايرەتكەرلەرى مەن زيالىق قاۋىم وكىلدەرىنىڭ قاتىسۋىمەن «قازاق ءتىلىن لاتىنشاعا كوشىرۋ: تۇيتكىلدى ماسەلەلەر مەن ولاردى شەشۋ جولدارى» اتتى دوڭگەلەك ۇستەل ءوتتى دەپ حابارلايدى Qamshy.kz اقپارات اگەنتتىگى.

دوڭگەلەك ۇستەلگە قاتىسۋشىلار لاتىن ءالىپبيىنىڭ بەكىتىلگەن نۇسقاسىن ەنگىزۋدەگى تاجىريبەلىك اسپەكتىلەردى، ونىڭ كەلەشەكتەگى جەتىلدىرىلۋى، مەملەكەتتىك ورگاندار قىزمەتى مەن قازاقستاندىقتاردىڭ ومىرىندە بەلسەندى پايدالانۋىن تالقىلاپ، سونىمەن قاتار، قازاق ءتىلىنىڭ لاتىن الىپبيىنە ءتيىمدى كوشىرىلۋىنە نە اسەر ەتە الادى جانە بۇل ۇردىستەگى كەرى اسەرلەردى قالاي ازايتۋعا بولادى دەگەن ساۋالدارعا جاۋاپ ىزدەدى.

- بۇل ماسەلەگە قاتىستى قوعامدا بولىپ جاتقان وتكىر پىكىرتالاس لاتىن الىپبيىنە كوشۋ كوپتىڭ كوكەيىندە جۇرگەنىن ايعاقتايدى. قازاق ءالىپبيىن لاتىنشاعا كوشىرۋدەگى باستى ارگۋمەنت، ول لاتىن ءالىپبيىنىڭ – ءححى عاسىرداعى حات، عىلىم مەن تەحنيكا، عالامتور جانە ىت-تەحنولوگيالار ءتىلىنىڭ ەڭ كەڭ تاراعان گرافيكالىق جۇيەسى بولىپ تابىلاتىندىعى. سونداي-اق، ول قازاق ءتىلىنىڭ ساقتالىپ قالۋىن قامتاماسىز ەتىپ، وزگە تىلدەن ەنگەن سوزدەردىڭ بەيىمدەلۋ مەحانيزمىن جۇزەگە اسىرادى، - دەدى اەسي-دىڭ جەتەكشى ساراپشىسى ايمان ءجۇسىپوۆا.

ساراپشىنىڭ سوزىنشە، لاتىن الىپبيىنە كوشۋ ناتيجەسىندە جاس بۋىننىڭ كيريلشە جازىلعان مادەني مۇرادان قول ءۇزىپ قالۋى ءقاۋىپ تۋدىرادى، سونىمەن قاتار، حالىقتىڭ ءتۇرلى جازۋ ۇلىگىسىن ۇستاناتىن ەكى توپقا ءبولىنىپ كەتۋ جاعدايى تۋىنداۋى مۇمكىن.

پىكىرتالاس بارىسىندا ساراپشىلار لاتىن الىپبيىنە كوشۋ قازاقستاندىق قوعامنىڭ دامۋىنا، حالىق ساناسىنىڭ جاڭعىرۋىنا، مەملەكەتتىڭ الداعى ۋاقىتتا الەمدىك قاۋىمداستىققا ساياسي، ەكونوميكالىق جانە مادەني ينتەگراسياسىنا قانشالىقتى ىقپال ەتەتىنىن تالقىلادى.

دوڭگەلەك ۇستەل جۇمىسىنا احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى ەردەن قاجىبەك، «قازاق ءۇنى» گازەتىنىڭ پرەزيدەنتى قازىبەك يسا، ساياساتتانۋشى داۋرەن بابامۇراتوۆ جانە ت.ب. قاتىستى.