پارتيا ءتوراعاسى ازات پەرۋاشيەۆپەن تارازدا "اقجولدىقتاردىڭ" وبلىستىق كونفەرەنسياسىن وتكىزىپ، اسان قوشمانبەتوۆتەي ىسكەر جىگىتتى باسشى ەتىپ سايلاپ، پارتياعا جاڭا مۇشەلەردى قابىلداۋ ءراسىمى باستالىپ جاتقان ءسات ەدى. 
-باۋىرىم، وسى ءسىز جۋرناليست ەمەسسىز بە؟- دەدى بىرەۋى يىعىمنان ءتۇرتىپ،- اناۋ تۇرعان كىسى-اكادەميك ءسابيت باۋبەكوۆ! كەزىندە ءپۋتيننىڭ وزىمەن بەلدەسىپ، جاۋىرىنىن جەر يىسكەتكەن!
بۇل سوزگە اسا ەلەڭدەي قويعان جوقپىن.ۇمىتپاسام پۋتينمەن كۇرەسكەن تاعى ءبىر قازاق جايلى وقىعانمىن. قازاق دەگەن تۋمىسىنان پالۋان حالىق قوي. سوندىقتان بوز كىلەمدە تالاي قانداستىڭ بولاشاق رەسەي پرەزيدەنتىمەن جولدارىنىڭ تۇيىسكەنى انىق. ءبارىبىر جۋرناليستىك قىزىعۋشىلىعىم جىبەرمەدى. ءسابيت اعانى اڭگىمەگە تارتتىق. اعامىز العاشىندا ءوزىمىزدى توسىلتىپ تاستاعانى. 
-"قارتايعاندا باتىر بولعانىڭدى ايتپا،
كەدەيلەنسەڭ باي بولعانىڭدى ايتپا!" دەگەن. وسىنى ايتپاي-اق قويسام دەپ ەدىم،-دەگەنى.
وعان ءبىز قويامىز با! ايتقىزدىق. )) 
...1972 جىلى ستۋدەنت ءسابيت باۋبەكوۆ ماسكەۋدە "بۋريەۆەستنيك" سپورت قوعامىنىڭ ءبىر ايلىق جاتتىعۋ جيىندارىندا بولادى. وعان باسقا قالالاردان دا سامبوشىلار جينالادى. پۋتين مەن باۋبەكوۆتىڭ سالماعى بىردەي بولعاندىقتان ەكەۋى ءبىر اي بويى سپاررينگ ارىپتەس بولىپ كۇرەسىپ جۇرەدى. ۆولوديا ول كەزدە سپورت شەبەرى. تەحنيكاسى دا سابيتتەن جوعارى. جاتتىعۋ جيىندارى اياقتالعان سوڭ وتكەن "بۋريەۆەستنيك" قوعامىنىڭ بىرىنشىلىگىندە پۋتين مەن باۋبەكوۆ فينالدا كەزدەسەدى. قارسىلاسىنىڭ سىرىن بەس ساۋساقتاي ءبىلىپ العان پۋتين بىردەن شابۋىلعا كوشىپ، كەزدەسۋ اياقتالعانعا 10 سەكۋند قالعانعا دەيىن 4-1 ەسەبىمەن ۇتىپ تۇرادى. اتاقتى باپكەر مارات جاحيتوۆتىڭ ۇيرەتكەن قۇپيا ءادىسىن سوڭعى ساتتە قارسى قولدانعان باۋبەكوۆ ءپۋتيندى تازا جەڭىپ، قارسىلاسىن دا، جانكۇيەرلەردى دە تاڭ-تاماشا قالدىرعان ەكەن. جارىس بىتكەن سوڭ ۆولوديا سابيتكە ءۇي تەلەفونىن بەرىپ، حابارلاسىپ تۇرۋىن سۇرايدى. 
ارادا بىرنەشە جىل وتكەن سوڭ ءسابيت اعا ماسكەۋدە اسپيرانتۋرادا وقىپ ءجۇرىپ، ءبىر قياناتقا ۇشىرايدى. وقۋىن، عىلىمدى تاستاپ، ەلگە قايتۋ ءقاۋپى تونەدى. ويعا پۋتين ورالادى. دەرەۋ وعان تەلەفون سوعادى. بۇرىنعى كىلەمدەگى قارسىلاسىن سول كەزدە قاۋىپسىزدىك كوميتەتىندە ىستەيتىن پۋتين جاقسى قارسى الىپ، بۇكىل ماسەلەلەرىن شەشىپ بەرەدى. باۋبەكوۆ ماسكەۋدە قالادى. كەيىن ۇلكەن عالىم اتانادى. ۆولوديا پۋتينمەن تۇسكەن سۋرەتى ۇيدە ساقتاۋلى. رەسەي پرەزيدەنتىنە وتكەندى ايتىپ حات جازۋ ويىندا جوق. ءبىزدىڭ وزىمىزگە ىڭعايسىزدانىپ ازەر ايتتى. امان بولىڭىز،اعا!

ارمان سقابىل ۇلىنىڭ فب پاراقشاسىنان