قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆانىڭ توراعالىعىمەن مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى رەسپۋبليكالىق كوميسسيانىڭ كەڭەيتىلگەن وتىرىسى ءوتتى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.

جيىنعا پارلامەنت دەپۋتاتتارى، ورتالىق جانە جەرگىلىكتى اتقارۋشى ورگاندار باسشىلارى، قوعام قايراتكەرلەرى، بەلگىلى عالىمدار قاتىستى.

مەملەكەتتىك حاتشى سويلەگەن سوزىندە نۇرسۇلتان نازاربايەۆتىڭ: «ەكى ءداۋىر تۇيىسكەن ءولىارا شاقتا قازاقستانعا تۇبەگەيلى جاڭعىرۋ جانە جاڭا يدەيالار ارقىلى بولاشاعىن باياندى ەتە ءتۇسۋدىڭ تەڭدەسسىز تاريحي مۇمكىندىگى بەرىلىپ وتىر»، – دەگەن پىكىرىن اتاپ ءوتتى. بۇل مۇمكىندىكتى ءتيىمدى پايدالانۋ جانە وعان لايىقتى ۇلەس قوسۋ – ءبىزدىڭ ورتاق مىندەتىمىز.

باسقوسۋدا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ، قارجى مينيسترلىگىنىڭ، سونداي-اق، اتىراۋ، قوستاناي جانە ماڭعىستاۋ وبلىستارى اكىمدەرىنىڭ مەملەكەتتىك رامىزدەردى پايدالانۋ، قولدانۋ جانە ناسيحاتتاۋ ءىسىنىڭ وڭىرلەردەگى جاي-كۇيى جونىندەگى ەسەبى تىڭدالدى.

سونىمەن قاتار قورعانىس جانە اەروعارىش ونەركاسىبى، ينۆەستيسيالار جانە دامۋ مينيسترلىكتەرىنىڭ، «سىربار» سىرتقى بارلاۋ قىزمەتىنىڭ ۆەدومستۆولىق ناگرادالارىن بەكىتۋ تۋرالى ۇسىنىستارى تىڭدالدى.

كوميسسيانىڭ بيىلعى قىزمەتى جانە 2018 جىلعا ارنالعان جۇمىس جوسپارى جونىندەگى ماسەلە قارالدى. مەملەكەتتىك ورگاندار باسشىلارىنا مەملەكەتتىك رامىزدەر تۋرالى زاڭنامالاردىڭ بۇزىلۋىنا جول بەرمەۋ، سونىڭ ىشىندە ىشكى باقىلاۋدى تۇراقتى قامتاماسىز ەتۋ، قولدانىس تاجىريبەلەرىن جەتىلدىرۋ، سونىمەن قاتار مەملەكەتتىك رامىزدەردى قولدانۋ مەن ناسيحاتتاۋ ىسىنە باقىلاۋدى كۇشەيتۋ تاپسىرىلدى.

وتىرىس قورىتىندىسى بويىنشا مەملەكەتتىك رامىزدەرگە قاتىستى قۇقىقتىق ساۋاتتىلىقتى جانە وعان دەگەن قۇرمەتتى ارتتىرۋ جونىندە ناقتى تاپسىرمالار بەرىلدى.

سوڭىندا قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا جينالعانداردى الدا كەلە جاتقان مەملەكەتتىك مەرەكە – قازاقستان رەسپۋبليكاسىنىڭ تۇڭعىش پرەزيدەنتى كۇنىمەن قۇتتىقتادى.