الماتىدا جۇمباق جاعدايدا جوعالعان جىگىتتىڭ ءمايىتى تابىلدى. 16 قاراشادا ۇيىنەن شىعىپ كەتكەن ءاليحان ەشىموۆتى تۋىستارى تاباندارىنان تاۋسىلىپ، ەكى اپتا بويى ىزدەگەن بولاتىن. ال، مارقۇمنىڭ دەنەسى ونىڭ كولىگى تابىلعان اۋەجاي ماڭىنداعى كولدەن شىققان. وندا دا ىزدەۋشىلەر كولدىڭ سۋىن اعىزىپ، ازايتقاننان كەيىن عانا ارەڭ تاۋىپتى، - دەپ حابارلايدى كتك.

24 جاستاعى جىگىت سول كۇنى كولىگى بۇزىلعان دوستارىنا كومەكتەسۋ ءۇشىن كەتكەن ەكەن. تۇندە اناسىنا حابارلاسىپ، كەرى قايتاتىنىن ەسكەرتىپتى. ءبىراق، سودان بەرى حابار-وشارسىز كەتكەن. ەرتەڭىنە ول مىنگەن كولىك اۋەجاي ماڭايىنداعى كولدىڭ جانىنان تابىلادى. ال، كولىك ىشىندەگى جىگىتتىڭ تەلەفونى، قۇندى زاتتارى مەن قۇجاتتارىنا ەشكىم تيىسپەپتى. كەيىن ءاليحاندى ىزدەۋگە ەرىكتىلەر توبى قوسىلىپ، ءتىپتى ساربازدار ءيىسشىل يتتەرمەن توڭىرەكتى شولىپ شىققان. ءقازىر تابىلعان مايىتكە ساراپتاما جاسالىپ جاتىر. پوليسيا تەرگەۋ شارالارىن باستاپ كەتكەن.