تۇڭعىش پرەزيدەنت كۇنىنە وراي قازاقستاننىڭ رەسەيدەگى ەلشىلىگىندە ماسكەۋدەگى قازاقستاندىق ارداگەرلەرمەن كەزدەسۋ ءوتتى. ولار جاڭا عيماراتتاعى مۋزەيدىڭ اشىلۋىنا قاتىستى. شاقىرىلعان قوناقتاردىڭ قاتارىندا - ماسكەۋلىك قازاقستاندىق ارداگەرلەر كەڭىەسىنىڭ مۇشەلەرى، بۇرىڭعى پارتيا جانە مەلەكەت قايراتكەرلەرى، سونىمەن قاتار ءار جىلدارى ەلدە ەلباسىمەن بىرگە قىزمەت ەتكەن ازاماتتار. 

مۋزەيدى كورگەن ارداگەرلەر 25 جىلدىق قازاقستان مەن رەسەي دوستىق قارىم-قاتىناسىنىڭ ناتيجەسىندە تۇزەلگەن تاريحي دەرەكتەرمەن ەتەنە تانىسۋعا مۇمكىندىك الدى. اتاپ ايتساق، كوپشىلىكتىڭ نازارىنا قاعازعا قاتتالعان ەكى ەلدىڭ قۇندى قۇجاتتارى ۇسىنىلدى. سونداي-اق تاۋەلسىز مەملەكەتىمىزگە تيەسىلى ەكى ەل اراسىنداعى دوستىق قارىم-قاتىناستى ايعاقتايتىن جانە ماڭىزدىلىعىن كورسەتەتىن قۇجاتتار مەن جەكە توپتامادان الىنعان كىتاپتار، سىيلىقتار جانە دە باسقا  زاتتار تاريحي مۋزەيدەن ورىن تاپتى.

"وسىنداي مۋزەيدىڭ ەلشىلىكتىڭ عيماراتىندا اشىلۋى ەرەكشە ءارى ەستە قالارلىق، قۇپتارلىق شەشىم، -دەيدى راەن اكادەمياسىنىڭ ۆيسە-پرەزيدەنتى اناتوليي سپيسىن. - قازاقستاننىڭ جاڭا مۇمكىندىگىن كورسەتەتىن جانە دە ۇلكەن باعاعا يە كەرەمەت جوبا. بارلىعى بۇگە-شەگەسىنە دەيىن ويلاستىرىلعان. مۇندا قازاقستان حالقىن دا، ەلدىڭ دامۋىن دا، سونداي-اق ەلباسىنىڭ تىنىمسىز ەڭبەگىن، ونىڭ سىرتقى ساياسي باستامالارىن جانە رۋحاني، مادەني ۇلتتىق جاڭعىرۋعا ەرەكشە ءمان بەرگەن قىزمەتىن بايقاۋعا بولادى. ارينە، مۇنداي مۋزەيدىڭ تۇڭعىش پرەزيدەنت كۇنىنە وراي اشىلۋى تەگىن ەمەس".

سونىمەن قوسا ول، رەسەيلىك بەدەلدى عالىمداردىڭ ايتقان سوزدەرىن ارقاۋ ەتىپ، سول كەزدە دۇرىس تاڭدالعان ەكونوميكالىق باعدار قازاقستاننىڭ گۇلدەنۋىنە جەتكىزگەنىن ايتادى. ""وركەندەۋ" ءسوزىن بۇرىڭعى كەڭەس ەلدەرى اراسىندا سيرەك كەزدەستىرەسىڭ، - دەيدى اناتوليي سپيسىن. – سەبەبى 26 جىل بويى حالقىنىڭ وسىپ-ونۋىنە جۇيەلى جۇمىس جاسالدى".

ال ماسكەۋلىك ارداگەرلەر كەڭەسىنىڭ ءتوراعاسى ۆالەريي تەمىربايەۆ، تۇڭعىش پرەزيدەنت كۇنى سەرگەي ەسەنيننىڭ ءسوزىن ەسكە الا وتىرىپ، ولەڭ جولدارىمەن العان اسەرىن جەتكىزۋگە تىرىستى: " بەتپە بەت كەلگەندە ءار نارسەنىڭ ءجۇزىن كورمەيسىڭ. اۋقىمدى ءىس تەك الشاقتان كورىنەر". ونىڭ ايتپاعى، شيراك عاسىر وتكەن سوڭ عانا جاسالعان ەڭبەكتىڭ قۇندىلىعىن باعالاي باستايسىڭ.  

"شىندىعىن ايتايىن، ءبىز بۇرىنىراقتا ايتقان كوپتەگەن سوزدەرىنە كۇمانمەن قارايتىنبىز،-دەدى ۆالەريي تەمىربايەۆ. -الايدا ۋاقىت وتە كەلە،  جاڭا استانانى، حالىقارالىق ىستەردەگى جەتىستىكتەردى، اسىرەسە قازاقستان مەن رەسەي اراسىنداعى جاقسى قارىم-قاتىناستى كورگەن سوڭ جاسالعان ەڭبەكتى باعالايسىڭ، پىكىرىڭ باسقاشا قالىپتاسادى".