تاجىك-اۋعان شەكاراسىندا بولعان اتىس سالدارىنان تاجىكستاننىڭ حاتلون وبلىسى شامسيددين-شوحين اۋدانىندا ورنالاسقان اسكەري ءبولىمنىڭ كومانديرى پولكوۆنيك حايريددين احتاموۆ قازا تاۋىپ، ءتورت اسكەري قىزمەتكەر اۋىر جارالانعان، دەپ جازادى Qamshy.kz اقپارات اگەنتتىگى azattyq.org سايتىنا سىلتەمە جاساي وتىرىپ. 

ازاتتىقتىڭ تاجىك قىزمەتىنە (وزودي) بولعان جايتتان حابارى بار ادامنىڭ ايتۋىنشا، قارۋلى قاقتىعىس وتكەن ءتۇنى لانگۋريحو اۋىلىنىڭ ماڭىندا بولعان.

جارالانعانداردىڭ ۇشەۋىن ساريچاشما اۋىلدى ايماعىنداعى اۋرۋحاناعا، بىرەۋىن ۆوسەي اۋدانىنىڭ اۋرۋحاناسىنا جاتقىزعان. ەكى جارالى قىزمەتكەردى دۋشانبەگە تىكۇشاقپەن جەتكىزۋگە ازىرلەپ جاتقانى حابارلاندى.

بيلىك ورىندارى بۇل وقيعاعا بايلانىستى ازىرگە رەسمي اقپارات تاراتقان جوق. وزوديگە اقپارات بەرگەن ادامنىڭ سوزىنشە، وقيعا بولعان جەرگە كۇش قۇرىلىمدارىنىڭ قىزمەتكەرلەرى بارعان.

تاجىكستان مەن اۋعانستان شەكاراسىنىڭ جالپى ۇزىندىعى - 1400 شاقىرىم. وقيعا بولعان شەكارا ماڭىندا زاڭسىز ەسىرتكى تاسىمالداۋشىلار جانە قارۋلى كونترابانديستەرمەن قاقتىعىستار ءجيى بولىپ تۇرادى. جىل سايىن شەكارانىڭ بۇل تۇسىندا ونى زاڭسىز كەسىپ وتۋگە بايلانىستى ونداعان وقيعا تىركەلەدى.