الماتى اكىمى باۋىرجان بايبەك «بىرىككەن قالالار جانە جەرگىلىكتى بيلىكتىڭ» ەۋرازيالىق ءبولىمىنىڭ باس حاتشىسى راسيح ساگيتوۆپەن كەزدەستى. تاراپتار جەرگىلىكتى بيلىكتىڭ حالىقارالىق دەڭگەيدەگى ءوزارا قارىم- قاتىناسى، قالالارلىڭ دامۋىنا ۋربانيزاسيا مەن جاھاندانۋدىڭ ىقپالى ماسەلەلەرىن، ۇيىم قىزمەتىنىڭ باستى باعىتتارىن تالقىلادى.
مەگاپوليس اكىمى الماتىنىڭ بۇگىنگى تاڭدا ءتۇرلى حالىقارالىق ۇيىمدارمەن بىرىگىپ جۇمىس ىستەۋگە ەرەكشە نازار اۋداراتىنىن اتاپ ءوتتى. مىسالى، العاش رەت وڭىردە، قالادا «ەۋرازيانىڭ ەىدۇ-نىڭ اپتالىعى» ءوتتى، يۋنەسكو اياسىندا الماتىنىڭ 1000 جىلدىعى مەرەكەلەندى، بۇۇ-نىڭ 14 ءوفيسى جۇمىس ىستەيدى، بىرىككەن ۇلتتار ۇيىمىنىڭ وڭىرلىك حابىن اشۋ جوسپارلانعان.
راسيح ساگيتوۆ جاھاندانۋدىڭ ءورىس الۋى بارىسىندا جەرگىلىكتى ورگانداردى حالىقارالىق ارەندا قولداۋ ارقاسىندا قالا مەن تۇرعىندارعا قاتىستى ماڭىزدى ماسەلەلەردىڭ شەشىمىن تاباتىنىن اتاپ ءوتتى.
«ءبىزدىڭ ۇيىمىمىز جەرگىلىكتى بيلىككە حالىقارالىق ۇيىمدارمەن ىنتىماقتاستىقتى جاقسارتۋعا، قالالاردىڭ وڭ ءيميدجىن قالىپتاستىرۋعا، ولاردىڭ ينۆەستيسيالىق جانە تۋريستىك تارتىمدىلىعىن كۇشەيتۋگە ىقپال ەتەدى»، - دەدى ر.ساگيتوۆ.
بىرىككەن قالالار جانە جەرگىلىكتى بيلىك – كوممەرسيالىق ۇيىم ەمەس، وعان الەمنىڭ 60 ەلىنىڭ جەرگىلىكتى بيلىك اسسوسياسيالارى مەن بارلىق كونتينەنتتىڭ مىڭداعان قالالارى مۇشە. شتاب - پاتەرى قازان قالاسىندا ورنالاسقان ەۋرازيالىق بولىمگە قازاقستاننىڭ استانا، اقتاۋ جانە سەمەي قالالارى ەنگەن.
ايتا كەتەر بولساق، ۇيىم 1993 جىلى قۇرىلىپ، ەكى جىلدان كەيىن وسى ۇيىمنىڭ شەشىمىمەن 8 قىركۇيەك الەمدىك قالالار كۇنى بولىپ بەكىتىلگەن بولاتىن. بۇكىلالەمدىك مۇرالار قالالارىنىڭ كونفەرەنسيالارى تۇركيانىڭ ستامبۋل، سافرانبولۋ، قىتايدىڭ ليسزيان، يندونەزيانىڭ سۋراكارترا جانە تاتارستاننىڭ قازان قالاسىندا ەكى رەت وتكىزىلگەن. 2014 جىلى اقتاۋ قالاسى ۇيىمنىڭ (بمقۇ/وگۆن) باقىلاۋشىسى بولىپ بەلگىلەنگەن بولاتىن.
مۇنداي حالىقارالىق بەدەلدى ۇيىمعا قازاقستان قالالارىنان مۇشەلىككە ەنگەن اقتاۋ تۇڭعىش ءارى جالعىز قالا بولدى. ال 2013 جىلدىڭ قاراشا ايىندا مەكسيكادا وتكەن ۇيىمنىڭ كەزەكتى باس قوسۋىندا ەۋرازيالىق ءبولىمىنىڭ باستاماسى بويىنشا 2014 جىلى اقتاۋ قالاسىندا 100-دەن اسا دۇنيەجۇزى قالالارى مەرلەرىنىڭ قاتىسۋىمەن «ەۋرازيا قالالارىنىڭ الەمدىك مۇراسى» VII حالىقارالىق كونفەرەنسياسىنىڭ وتكىزىلۋى ماقۇلدانعان ەدى.
