الماتى وبلىسىندا تۋعان ۇلىن بىرنەشە جىل بويى زورلاپ كەلگەنى ءۇشىن سوتتالعان بۇرىنعى مەكتەپ ديرەكتورىنا قاتىستى جاڭا دەرەكتەر شىقتى، — دەپ حابارلايدى Qamshy.kz اقپارات اگەنتتىگى tengrinews.kz سايتىنا سىلتەمە جاساي وتىرىپ.

ديرەكتوردىڭ ۇستىنەن پوليسياعا ارىزدانعان ءوز ايەلى بولىپ شىقتى. ايەل ۇلكەن دارەتىن ۇستاي المايتىن ۇلىن دارىگەرگە كورسەتكەنىندە، دارىگەرلەر سەكسۋالدىق ءجابىر كورگەنىن ايتقان. وسى ءجايتتى ۇيىنە كەلىپ كۇيەۋىنە ايتقانىندا، كۇيەۋى ايەلىن ساباپ تاستاعان ەكەن. ال مەكتەپ ديرەكتورىنىڭ ارىپتەستەرى بۇل جاعدايعا ءالى دە كۇمانمەن قاراپ وتىر.

«جوق، سەنبەيمىز. ويتكەنى ول ءوز قىزمەتىن ديرەكتور رەتىندە جاقسى اتقاردى. جاقسى ءمۇعالىم. دەڭگەيلىك مۇعالىمدەردىڭ ءۇش ايلىق كۋرسىنان وتكەن. اۋداندا جارقىن بولاشاق اتتى ديرەكتورلاردىڭ قاۋىمداستىعى قۇرىلعان بولاتىن. سونىڭ جەتەكشىسى بولدى. قانشاما ادىستەمەلىك كومەك كورسەتتى»، — دەيدى ەڭبەكشىقازاق اۋدانىنىڭ ءبىلىم ءبولىمىنىڭ اعا ادىسكەرى ايجان تورتايەۆا.

ەۋرازيا ءبىرىنشى ارناسىنىڭ ءتىلشىسىنىڭ مالىمەتىنشە، وسى جاعدايدان كەيىن اۋىل تۇرعىندارى كوشەگە شىعۋعا جانە بالالارىن مەكتەپكە جالعىز جىبەرۋگە قورقىپ وتىر. مەكتەپ ديرەكتورىن مەشىتتەن ءجيى كورەتىن تۇرعىندار "سىرتى ءبۇتىن، ءىشى ءتۇتىن" بولعانىنا سەنە الماي ءجۇر ەكەن.

«وقۋشىلار تۇرماق، ءبىزدىڭ ءوزىمىز مىنەزىن كورمەدىك. قاتتى سويلەگەنىن كورمەگەنبىز. ءالى دە سەنبەيمىز... ەستىگەننىڭ وزىندە قاتتى تاڭعالدىق. ءقازىر دە تاڭعالىپ وتىرمىز»، — دەيدى اۋىل تۇرعىندارى. 

«ارينە، قورقىنىشتى. ايتۋدىڭ ءوزى اۋىر. ونسىز دا زورلاۋ-قورلاۋ كوپ زاماندا. ال مەكتەپ ديرەكتورىن ەستىگەندە مۇلدەم سەنە الماي قالدىق»، — دەيدى اۋىل تۇرعىندارىنىڭ ءبىرى.

ءوز بالاسىن زورلاعان ديرەكتوردىڭ 15 جىلدىق ەڭبەك ءوتىلى بار بولىپ شىقتى. ءاتى-جونى — رۋسلان يسلام. ءتورت بالانىڭ اكەسى شىلدە ايىندا جۇمىستان ءوز ەركىمەن كەتكەن. بۇرىن تالعار اۋدانىندا ءمۇعالىم بولعان ەكەن.