قازاقستان رەسپۋبليكاسىنىڭ ۇكىمەتى تاعايىنداعان  «دارىن» مەملەكەتتىك جاستار سىيلىعىنىڭ لاۋرەاتتارىن سالتاناتتى تۇردە ماراپاتتاۋ ءراسىمى ءوتتى دەپ حابارلايدى Qamshy.kz اقپارات اگەنتتىگى.  بيىلعى جىلى اتالعان شارا استانا قالاسىنىڭ 20 جىلدىق مەرەيتويىنا وراي وتكىزىلىپ وتىر. ءىس-شارانى ق ر ءدىن ىستەرى جانە ازاماتتىق قوعام مينيسترلىگى ۇيىمداستىردى.

سالتاناتتى شارا راسىمىنە قازاقستان رەسپۋبليكاسى ءدىن ىستەرى جانە ازاماتتىق قوعام ءمينيسترى ن.ەرمەكبايەۆ،  قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى، مەملەكەتتىك ۇيىمداردىڭ، ازاماتتىق سەكتوردىڭ، بۇقارالىق اقپارات قۇرالدارىنىڭ، مادەنيەت جانە ونەر قايراتكەرلەرىنىڭ وكىلدەرى قاتىستى.

«ەلباسى ايتقانداي دارىندى جاستار - ول ەلىمىزدىڭ بولاشاعى جانە الەۋەتى. جاستار ماسەلەسى، ساياساتى، ولاردى جۇمىس ورىندارىمەن قامتاماسىز ەتۋ، جاستاردىڭ الەۋەتىن اشۋ، تالانتىن كورسەتۋگە مۇمكىنشىلىك جاساۋ ءارقاشان دا ەلباسىنىڭ جانە ەل ۇكىمەتىنىڭ نازارىندا. «دارىن» سىيلىعى بۇرىن ەكى جىلدا ءبىر رەت بەرىلگەن بولسا، بيىلعى جىلدان باستاپ جىل سايىن بەرىلەتىن بولادى. ول دا بارلىعىمىزدىڭ ورتاق جەتىستىگىمىز دەپ ويلايمىن»، - دەدى ماراپات يەلەرىن قۇتتىقتاعان نۇرلان ەرمەكبايەۆ.

كوميسسيا شەشىمىمەن سىيلىق الۋ ءۇشىن 213 ۇمىتكەرلەردىڭ ىشىنەن 21 ۇمىتكەر قولداۋ تاپتى، ونىڭ ىشىندە 2 ادامنان قۇرالعان 1 عىلىمي توپ بار. وتكەن جىلدارمەن سالىستىرعاندا سىيلىق الۋعا ۇمىتكەرلەردىڭ سانى ەكى ەسە ارتقانىن اتاپ ءوتۋ كەرەك.  

سىيلىق 10 نوميناسيا بويىنشا - ادەبيەت، عىلىم، بەينەلەۋ ونەرى، جۋرناليستيكا، كلاسسيكالىق مۋزىكا، قوعامدىق قىزمەت، سپورت، تەاتر جانە كينو، ەسترادالىق ونەر، حالىق شىعارماشىلىعى سالاسىندا ۇزدىك دەپ تانىلعان جاستارعا تابىستالدى. 

وسىلايشا، «سپورت» نوميناسياسى بويىنشا قازاقستاندىق مانەرلەپ سىرعاناۋشى  دەنيس تەن جانە ايەلدەر اراسىنداعى حالىقارالىق گروسسمەيستەر، ءتورت دۇركىن الەم چەمپيونى دينارا ءسادۋاقاسوۆا جەڭىمپاز دەپ تانىلدى.  

«ەسترادا» نوميناسياسى بويىنشا  قازاق ەستراداسىنىڭ ءانشىسى   سەرىك يبراگيموۆ پەن  قازاق ۇلتتىق ونەر ۋنيۆەرسيتەتىنىڭ ستۋدەنتى رۇستەم جۋگىنىسوۆ  ماراپاتقا يە بولدى. «كلاسسيكالىق مۋزىكا» نوميناسياسى بويىنشا «Young Eurasian Soloists» كامەرالىق وركەسترىنىڭ ءسوليسى شەرنياز مۇساحان مەن «استانا وپەرا» ۇلتتىق وپەرا جانە بالەت تەاترىنىڭ ءانشىسى  ماريا مۋدرياك «دارىن» سىيلىعىن يەلەندى.  

«حالىق شىعارماشىلىعى» نوميناسيا بويىنشا  ايتىسكەر اقىن سىرىم اۋەزحان جانە قازاق ۇلتتىق ونەر ۋنيۆەرسيتەتىنىڭ وقىتۋشىسى داۋلەتحان سارتاي ماراپاتتالدى. «ادەبيەت» نوميناسياسىندا اقىن دينارا مالىكوۆا، «اق جول» دەموكراتيالىق پارتياسىنىڭ يدەولوگيالىق جۇمىسى ءبولىمىنىڭ كەڭەسشىسى ەلدوس توقتاربايەۆتىڭ ەڭبەگى ۇزدىك دەپ تانىلدى.

«تەاتر جانە كينو» نوميناسياسى بويىنشا گ.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر  تەاترىنىڭ اكتريساسى دينارا ابدۋللينا جانە  «استانا وپەرا» مەملەكەتتىك وپەرا جانە بالەت تەاترىنىڭ بالەت ترۋپپاسىنىڭ جەتەكشى ءسوليستى باقتيار ادامجان «دارىن» سىيلىعىنىڭ لاۋرەاتتارى اتاندى.  

 «جۋرناليستيكا» نوميناسياسى بويىنشا Atameken Business Channel  ارناسىنىڭ  «باستى تاقىرىپ»  باعدارلاماسىنىڭ جۇرگىزۋشىسى ەربولات مۇحامەدجانوۆ جانە «رەسپۋبليكالىق راديو» ج ش س جاڭالىقتار قىزمەتىنىڭ رەداكتور-جۇرگىزۋشىسى الىبەك ءابدىلوۆ  جەڭىس تۇعىرىنان كورىنە ءبىلدى.

«ديزاين جانە بەينەلەۋ ونەرى» نوميناسياسى بويىنشا  «دارىن» سىيلىعى قازاق ۇلتتىق ونەر ۋنيۆەرسيتەتىنىڭ ستۋدەنتى نۇربولات اسقار مەن اباي اتىنداعى جامبىل گۋمانيتارلىق كوللەدجىنىڭ وقىتۋشىسى،  ءارى وڭ قولىنان ونەر تامعان زەرگەر حالييەۆ بەرىك جۇماعاليۇلىنا بەرىلدى.

          «قوعامدىق قىزمەت» نوميناسياسى بويىنشا «دارىن» سىيلىعى «جاس وتان» جاستار قاناتىنىڭ حاتشىلىعىنىڭ باسشىسى داۋلەت كارىبەككە جانە اتىراۋ وبلىسىنداعى «قازاقستان-2050» جالپىۇلتتىق قوزعالىسىنىڭ ۇيىمداستىرۋشىسى يلياس قونىسبايەۆقا تابىستالدى.

«عىلىم» نوميناسياسى بويىنشا قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ جەتەكشى مامانى نۇرعالي اقىلبەكوۆ، سونداي-اق ل.ن.گۋميليەۆ اتىنداعى ەۇۋ-نىڭ عىلىمي توبى -يليا كورولكوۆا جانە  دميتريا شليماس ۇزدىك دەپ تانىلدى.

بارلىق جەڭىمپازدارعا قازاقستان رەسپۋبليكاسى ۇكىمەتىنىڭ قاۋلىسىمەن «2017 جىلعى دارىن مەملەكەتتىك جاستار سىيلىعىنىڭ لاۋرەاتى» اتاعى بەرىلدى، جانە ولار  ديپلوممەن، توسبەلگىمەن جانە اقشالاي سىيلىقتارمەن ماراپاتتالدى.

2017 جىلدان باستاپ قازاقستان رەسپۋبليكاسىنىڭ ءدىن ىستەرى جانە ازاماتتىق قوعام مينيسترلىگىنىڭ باستاماسى بويىنشا جىل سايىن «دارىن» سىيلىعى ۇسىنۋ تۋرالى شەشىم قابىلدانعانىن اتاپ وتكەن ءجون.  ەندى كەزەكتى  «دارىن» سىيلىعىنا وتىنىشتەر قابىلداۋ ناۋقانى كەلەر جىلدىڭ ءساۋىر ايىنان باستاۋ الادى.