2017 جىلى 14 جەلتوقساندا بولليۆۋدتىڭ  «Khushi Motion Pictures» كينوكومپانياسى، ش.ايمانوۆ اتىنداعى «قازاقفيلم» اق قاتىسۋىمەن  (ق ر مادەنيەت جانە سپورت مينيسترلىگىنىڭ تاپسىرىسى بويىنشا) تۇسىرىلگەن «تۋعان ءۇيىم- تىرەگىم» («Love you family») اتتى ءۇندى ءفيلمى ۇلتتىق پروكاتقا شىعادى دەپ حابارلايدى Qamshy.kz اقپارات اگەنتتىگى.

اتالعان كينوتۋىندى حۋشي ديەۆاني اتتى ءۇندى قىزىنىڭ تاعدىرى تۋرالى باياندايدى. ءسۇيىپ قوسىلعان كۇيەۋىنەن قورلىق كورگەن ول، الماتىعا كەلىپ، جۇمىسقا ورنالاسىپ، بيىكتەردەن كورىنەدى. 

ەستەرىڭىزگە سالا كەتسەك، بىلتىر شاكەن ايمانوۆ اتىنداعى «قازاقفيلم» اق بولليۆۋدتىڭ «Khushi Motion Pictures» اتتى كومپانياسىمەن ىنتىماقتاستىق تۋرالى كەلىسىم شارتقا قول قويعان بولاتىن.  بىرلەسكەن ءوندىرىس جونىندەگى كەلىسىم بويىنشا، ەكى جاق  «Love you family» تولىقمەتراجدى كوركەم ءفيلمىنىڭ ديستريبۋسياسى سالاسىندا قىزمەت ەتۋگە مىندەتتەلگەن.

- ءفيلمنىڭ ءۇندىستانداعى پروكاتى  تابىستى بولدى. قازاقستاندا ەشقاشان بولماعان ءبىزدىڭ كورەرمەندەر ءۇشىن الماتى قالاسىنىڭ ادەمى كورىنىستەرىن تاماشالاۋ قىزىقتى بولدى. قازاقستاننىڭ مادەنيەت جانە سپورت مينيسترلىگىنە جانە مادەنيەت ءمينيسترى ارىستانبەك مۇحامەديۇلىنا سەنىم ءبىلدىرىپ، قولداعاندارى ءۇشىن العىس ايتامىز. سونىمەن قاتار، «قازاقفيلم» كينوستۋدياسىنا ءتۇسىرىلىم كەزىندە كاسىبي دەڭگەيدە كومەك كورسەتكەندەرىنە العىسىمىز شەكسىز. بىرلەسىپ تۇسىرگەن تۋىندىمىزدىڭ ءساتتى شىققانىنا قۋانىشتىمىن. مەنىڭ بىلۋىمشە، قازاقستاندا ءۇندى فيلمدەرىن ءسۇيىپ تاماشالايتىن كورەرمەندەر كوپ، سوندىقتان دا بۇل فيلم قازاقستاندىقتاردىڭ كوڭىلىنەن شىعادى دەپ ويلايمىن، - دەدى ءفيلمنىڭ پروديۋسەرى ۆيپۋل ديەۆاني.

ءۇندى رەجيسسەرى ساچيندر شارم تۇسىرگەن «تۋعان ءۇيىم - تىرەگىم» ءفيلمىنىڭ ءتۇسىرۋ جۇمىستارى ءۇندىستاندا جانە تايلاندتا ءوتتى.  كارتينانىڭ نەگىزگى قويىلىمدارىن قازاقستاندا، ايتا كەتسەك، الماتى قالاسىنىڭ كورىكتى جەرلەرىندە ءتۇسىرىلدى (رەسپۋبليكا الاڭى، «اربات»، شىمبۇلاق جانە كوك-توبە).

فيلمگە ءۇندىنىڭ تانىمال اكتەرلەرى - پارداساني اكشا سۋنيل، دجوشي مانوي ناۆانەت، سالمان يۋسۋف كحان، شاكتي كاپۋر، ناۆني پاريحار تۇسكەن. بۇل كارتينادا قازاقستاندىق تانىمال اكتەر فارحات ابدرايىموۆ تا بوي كورسەتەدى.   

«قازاقفيلم» كينوستۋدياسىندا قازاق تىلىنە دۋبلياجدالعان (ورىس تىلىندە سۋبتيترلارى بار) «تۋعان ءۇيىم - تىرەگىم» اتتى ءۇندى مەلودراماسى ەلىمىزدىڭ كينوتەاترلارىنان 14 جەلتوقساننان باستاپ كورسەتىلەتىن بولادى.