وزبەكستان پرەزيدەنتى شاۆكات ميرزيايەۆتىڭ كەنجە قىزى شاحنوزا ۋماروۆا بيىل پرەزيدەنت جارلىعىمەن قۇرىلعان مەكتەپكە دەيىنگى ءبىلىم مينيسترلىگىندە جاڭا قىزمەتكە تاعايىندالدى، دەپ Qamshy.kz اقپارات اگەنتتىگى ازاتتىققا سىلتەپ جازادى. 

بۇل تۋرالى ازاتتىقتىڭ وزبەك قىزمەتى پرەزيدەنت وتباسىنا جاقىن اقپارات كوزىنە جانە جوعارى شەندى وزبەك شەنەۋنىكتەرىنىڭ ءبىرىنىڭ ايتقانىنا سىلتەمە جاساپ حابارلادى.

اتالعان مينيسترلىك قىزمەتكەرلەرىنىڭ ءبىرى ازاتتىققا بۇل مالىمەتتى راستاعان. شاحنوزا ۋماروۆا ەندى مەكتەپكە دەيىنگى ءبىلىم جۇيەسىن رەفورمالاۋعا جاۋاپ بەرەتىن بولادى.

پرەزيدەنت شاۆكات ميرزيايەۆ وتكىزگەن سەلەكتورلىق جيىنداردىڭ بىرىندە شاحنوزا ۋماروۆا مەكتەپكە دەيىنگى ءبىلىم ءمينيسترى اگريپپينا ءشيننىڭ جانىندا وتىرعان. شاحنوزا ۋماروۆانىڭ جاسى 31-دە.

وزبەكستاندا مەكتەپكە دەيىنگى ءبىلىم مينيسترلىگى بيىلعى 30 قىركۇيەكتە پرەزيدەنت ميرزيايەۆتىڭ «مەكتەپكە دەيىنگى ءبىلىم جۇيەسىن تۇپكىلىكتى جەتىلدىرۋ شارالارى» تۋرالى جارلىعى بويىنشا قۇرىلعان.

18 جەلتوقساندا وتكەن سەلەكتورلىق جيىندا پرەزيدەنت شاۆكات ميرزيايەۆ وزبەكستان بالا باقشالارىندا «بالانىڭ الەۋمەتتىك، تۇلعالىق، ەموسيونالدىق، سويلەۋ، ماتەماتيكالىق، پسيحولوگيالىق جانە شىعارماشىلىق دامۋىنا قاتىستى وقۋ باعدارلامالارى ەنگىزىلمەگەندىگىن» ، بالا باقشالاردىڭ وقۋ ورنىنا اينالا الماي، «اتا-انالارى جۇمىستا بولعان كەزىندە تەك قانا بالاعا قارايتىن مەكەمە بولىپ» قالعانىن ايتقان.

مەكتەپكە دەيىنگى ءبىلىم ءمينيسترىنىڭ ورىنباسارى قاھرامون اريپوۆ «وزبەكيستون» تەلەارناسىنا بەرگەن سۇحباتىندا ەلدە وڭتۇستىك كورەيا تاجىريبەسى بويىنشا بالا باقشالاردىڭ قۇرىلاتىنىن جاريالاعان. ونىڭ ايتۋىنشا، بالا باقشالار شاعىن جانە 50، 100، 150 ادامعا ەسەپتەلىنىپ قۇرىلادى.