ورالدا 5517-اسكەري ءبولىمنىڭ كينولوگى، سەرجانت باقتىعالي ايكەنوۆ ءيتتىڭ كومەگىمەن جوعالعان قىزدى تاپتى دەپ حابارلايدى Qamshy.kz اقپارات اگەنتتىگى ق ر ۇلتتىق ۇلانى «باتىس» وڭىرلىك قولباسشىلىعىنىڭ باسپا ءسوز قىزمەتىنە سىلتەمە جاساپ. 

23 جەلتوقسان كۇنى ساعات كەشكى 20.00 شاماسىندا «سولتۇستىك-شىعىس» شاعىناۋدانىندا ي. دەگەن ازاماتشا ءۇش جاسار قىزى جوعالعانى جونىندە قۇرامىندا كىشى سەرجانت اسحات شالابايەۆ، كينولوگ، سەرجانت باقتىعالي ايكەنوۆ جانە قاتارداعى جاۋىنگەر رومان ريازانوۆ بار توپقا ايتىپ، كومەكتەسۋىن وتىنگەن.

ايەل ءابىلقايىر كوشەسى بويىنداعى «كەرۋەن» دۇكەنىنە كىرىپ، زاتتاردى قاراپ جاتقان مەزگىلدە كىشكەنتاي يرادانىڭ شىعىپ كەتكەنىن بايقاماي قالعان. ب.ايكەنوۆ اناسىنان قىزدىڭ قولعابىن الىپ، شەريف ەسىمدى يتكە يىسكەتىپ، ىزىنە تۇسكەن. 15 مينۋتتان كەيىن قىزمەتتىك يت كينولوگتى ە.وراقبايەۆ اتىنداعى كوشەنىڭ بويىنداعى 8-ۇيگە الىپ كەلگەن.

قورىققان قىز جان-جاعىنا قاراپ، سول جەردە تۇرعان. قىزدىڭ اناسى ينديرا نۇرجانوۆا ۇلتتىق ۇلان جاۋىنگەرلەرىنىڭ قىراعىلىق كورسەتكەنى ءۇشىن «باتىس» وڭىرلىك قولباسشىسى، گەنەرال-مايور الىبەك سەرالييەۆتىڭ اتىنا حات جازىپ، العىسىن ءبىلدىردى.

اتالعان  اسكەري جاساق جاۋىنگەرلەرى اسكەري ءبولىم باسشىلىعىنىڭ   تاراپىنان  ماراپاتتالدى.