قازاقستان پرەزيدەنتى نۇرسۇلتان نازاربايەۆ جىل قورىتىندىسى بويىنشا وتاندىق ب ا ق وكىلدەرىمەن كەزدەسۋ وتكىزدى، دەپ جازادى Qamshy.kz اقپارات اگەنتتىگى.

بۇل تۋرالى اقوردانىڭ فەيسبۋكتەگى پاراقشاسى حابارلادى.

كەزدەسۋ بارىسىندا ەلباسى جۋرناليستەردىڭ وزەكتى سۇراقتارىنا جاۋاپ بەردى.

«جاقىندا ماعان بىرەۋ حات جازدى. وندا «نازاربايەۆقا ەسكەرتكىش ورناتۋدىڭ قاجەتى جوق» دەلىنگەن. مەن ونىمەن تولىق كەلىسەمىن. مۇنىڭ ءبارى بوس اۋرەشىلىك. قاشان دا بۇعان قارسى شىعامىن.

تەك ۋنيۆەرسيتەتتىڭ نازاربايەۆ اتىمەن اتالعانىنا كەلىسكەنمىن. ونداعى ماقساتىم – ۋنيۆەرسيتەتتى مەملەكەت پەن بيلىك قولداۋى كەرەك ەدى. ال بۇرىن-سوڭدى ونداي بولماعان. بۇل وزگە جوعارعى وقۋ ورىندارىنا ۇلگى بولا الاتىن الدىڭعى قاتارداعى ۋنيۆەرسيتەت.

وزگەسىنىڭ ءبارى جەرگىلىكتى بيلىكتىڭ شەشىمى. ارينە، بۇيرىق بەرىپ، بارىنە تىيىم سالۋىم مۇمكىن. قازاقستان ازاماتتارىنا بۇلاي ىستەۋدىڭ قاجەتى جوق دەپ ىلعي ايتىپ وتىرامىن. كەرەك ەمەس! ەل سەنىڭ ىستەگەن ارەكەتىڭدى باعالاپ، سونىمەن ەسىنە الۋ كەرەك. ەسكەرتكىشتەر ورناتۋ ارقىلى ەمەس، ءوز ىسىممەن ەل ەسىندە قالعىم كەلەدى»، - دەي كەلە ءجۋرناليستىڭ فۋرمانوۆ كوشەسىنىڭ نازاربايەۆ دەپ وزگەرۋىنە قاتىستى ساۋالىنا جاۋاپ قاتتى.

«الماتى – مەنىڭ تۋعان قالام. ءبارى ءۇشىن راحمەت. دەگەنمەن قاجەتى جوق ەدى»، - دەدى مەملەكەت باسشىسى.